Unique total lunar eclipse today আজি বছৰটোৰ অন্তিমটো চন্দ্ৰগ্ৰহণ। কলকাতা, গুৱাহাটীকে ধৰি উত্তৰ-পূব ভাৰতৰ পৰা এই পূৰ্ণগ্ৰাস চন্দ্ৰগ্ৰহণ দেখা পোৱা যাব। কলকাতাত আবেলি ৪:৫২ বজাত চন্দ্ৰ উদয় হ’ব। তেতিয়াৰ পৰা পূৰ্ণগ্ৰাস চন্দ্ৰগ্ৰহণ সন্ধিয়া ৫:১১ বজালৈকে অব্যাহত থাকিব। অৰ্থাৎ কলকাতাত পূৰ্ণগ্ৰাস চন্দ্ৰগ্ৰহণৰ সময় হৈছে ১৯ মিনিট। চন্দ্ৰগ্ৰহণ সন্ধিয়া ৬:১৯ বজাত শেষ হ’ব। ৫:১১ বজাৰ পৰা সন্ধিয়া ৬:১৯ বজালৈ আংশিক চন্দ্ৰগ্ৰহণ। কলকাতাত ১ ঘণ্টা ৮ মিনিটৰ বাবে এই আংশিক চন্দ্ৰগ্ৰহণ দৃশ্যমান হ’ব। গুৱাহাটীতো চন্দ্ৰগ্ৰহণৰ সময়সূচী প্ৰায় একেই থাকিব।
আজি কেৱল বছৰটোৰ অন্তিম চন্দ্ৰগ্ৰহণেই নহয়, আকাশত বিৰল দৃশ্য দেখাৰ সুযোগো এই বছৰ শেষবাৰৰ বাবে উপলব্ধ হ’ব। পৃথিৱী বিজ্ঞান মন্ত্ৰালয়ৰ মতে মঙলবাৰে পূৰ্ণগ্ৰাস চন্দ্ৰগ্ৰহণত ভাৰতৰ বিভিন্ন প্ৰান্তৰ পৰা আকাশত ৰঙা চন্দ্ৰ দেখা যাব। গ্ৰহণৰ সময়ত পৃথিৱীৰ একমাত্ৰ উপগ্ৰহটোৰ চেহেৰা এনেকুৱাই হ’ব যিটো বিৰল। অৱশ্যে ই পৃথিৱীৰ বহুতো ঠাইৰ পৰা দৃশ্যমান নহ’ব।
বিজ্ঞানীসকলে জানিবলৈ দিছে যে চন্দ্ৰগ্ৰহণ মঙলবাৰে দুপৰীয়া ২:৪০ বজাত আৰম্ভ হ’ব। অৱশ্যে চন্দ্ৰ আবেলি ৩:৪৬ বজাত সম্পূৰ্ণ স্থিতিত আহিব। গ্ৰহণৰ মৌলিক বিজ্ঞান অনুসৰি পৃথিৱী-সূৰ্য-চন্দ্ৰ সৰল ৰেখাত অৱ স্থান কৰিলে চন্দ্ৰগ্ৰহণ হয়। মঙলবাৰে গ্ৰহণৰ সময়ত চন্দ্ৰ পৃথিৱীৰ ছাঁত ঢাক খাই পৰিব। ইয়াৰ ৰং ৰঙা হ’ব। সন্ধিয়া আকাশত ৰঙা চন্দ্ৰ চাব পাৰিব।
চন্দ্ৰগ্ৰহণৰ সময় অনুসৰি ই দিনটোৰ পোহৰত আৰম্ভ হ’ব যদিও ইয়াক সন্ধিয়াহে খালি চকুৰে দেখা যাব। দিল্লী আৰু মুম্বাইত আংশিক চন্দ্ৰগ্ৰহণ দৃশ্যমান হ’ব। দিল্লীত সন্ধিয়া ৫:২৮ বজাত গ্ৰহণ আৰম্ভ হ’ব। শ্ৰেষ্ঠ দৃশ্যটো সন্ধিয়া ৫:৩১ বজাত দেখা যাব। মুম্বাইবাসীয়ে সন্ধিয়া ৬ বজাৰ অলপ পিছত গ্ৰহণ চাবলৈ সক্ষম হ’ব।
নাগপুৰ, বেংগালুৰু, ভুৱনেশ্বৰ, হায়দৰাবাদ, চেন্নাই, চণ্ডিগড় আৰু নয়ডাতো সন্ধিয়া ৫.৩০ বজাত বছৰটোৰ অন্তিমটো পূৰ্ণগ্ৰাস চন্দ্ৰগ্ৰহণ চাবলৈ সক্ষম হ’ব। ভাৰতৰ উপৰিও উত্তৰ আমেৰিকাৰ আকাশ, দক্ষিণ আমেৰিকা, অষ্ট্ৰেলিয়া, নিউজিলেণ্ডৰ কিছু অংশত ৰঙা চন্দ্ৰ দেখা যাব। ইয়াৰ পিছত ২০২৫ চনৰ মাৰ্চ মাহত পৰৱৰ্তী পূৰ্ণগ্ৰাস চন্দ্ৰগ্ৰহণ দেখা যাব।
