বাংলাদেশৰ সংখ্যালঘু, মূলতঃ হিন্দুসকলক, ভাৰতৰ নাগৰিকত্ব প্ৰদানৰ বাবে শাসকীয় বিজেপি আৰু একাংশ সংগঠনে দিয়া “নিৰ্য্যাতন”ৰ দোহাইক সাধুকথাত পৰিণত কৰি দুৰ্গা পূজাত ঢাকাৰ এটা মন্দিৰক ভূমি দান কৰিছে ইছলামী দেশখনৰ প্ৰধান মন্ত্ৰী শ্বেখ হাছিনাই।
দেশখনৰ আটাইতকৈ বৃহৎ মন্দিৰ ঢাকেশ্বৰী দৰ্শন কৰি সোমবাৰে মন্দিৰটোক কাষৰীয়া ১.৫ বিঘা ভূমি দান কৰে প্ৰধান মন্ত্ৰীগৰাকীয়ে। দান কৰা ভূমিখিনিৰ মূল্য বাংলাদেশী মুদ্ৰাৰ হিচাপত ৫০ কোটি টাকা।
অসমৰ সত্ৰৰ দৰে বাংলাদেশৰ মন্দিৰটোতো হোৱা বেদখলৰ সমস্যা আৱামী লীগৰ নেত্ৰীগৰাকীয়ে সমাধান কৰাৰ লগতে হিন্দু কল্যাণ ন্যাস (Hindu Kalian Trust) নামৰ ন্যাসটোৰ পুঁজি ২১ কোটি টকাৰ পৰা ১০০ কোটি টকালৈ বৃদ্ধি কৰিছে।
হিন্দু নিৰ্য্যাতনৰ দাবীৰ বিপৰীতে ইছলামী ৰাষ্ট্ৰখনৰ হাছিনা চৰকাৰৰ শ্ল’গান হৈছে “ধৰ্ম নিজৰ নিজৰ, উৎসৱ সকলোৰে”।
“বাঙালী ঐক্য” শিৰোগত কৰি আগবঢ়া ইছলামী দেশখনত ২০১৭ বৰ্ষত ৩০ হাজাৰ দুৰ্গা পূজা হোৱাৰ বিপৰীতে এই বছৰ পূজা মণ্ডপৰ সংখ্যা বৃদ্ধি পাইছে ৩১,২৭২ খনলৈ। দেশখন ভ্ৰমণ কৰা কালত পোৱা এই অভিজ্ঞতাৰ কথা পূৰ্বে অসমৰ প্ৰাক্তন মুখ্য মন্ত্ৰী প্ৰফুল্ল কুমাৰ মহন্তয়ো উল্লেখ কৰিছিল।
লগতে পঢ়ক– বাঙালী সংগঠন নালাগে বিজেপি চৰকাৰেও পাতিব নোৱাৰিব সমাৱেশ, বজ্ৰ ঘোষণা জিতেন দত্তৰ
দুৰ্গা পূজা বাংলাদেশৰ জাতীয় উৎসৱ। এই পূজাত দেশজুৰি ৫ দিনীয়া চৰকাৰী বন্ধ থাকে আৰু দেৱী দুৰ্গাৰ উটনি যাত্ৰাত অগণন ইছলাম লোকে অংশগ্ৰহণ কৰে।
তাৎপৰ্য্যপূৰ্ণভাৱে বাংলাদেশৰ সংখ্যালঘু হিন্দুৰ ‘‘বন্ধু” হাছিনাই হিন্দুসকলৰ মংগলৰ বাবে লোৱা কাৰ্য্যসূচীক পৰ্য্যাপ্ত নহয় বুলিহে সমালোচনা কৰি আহিছে বিৰোধী দল তথা অধিক ইছলামবাদীৰূপে পৰিচিত বি এন পি আৰু ইয়াৰ সহযোগী জামাত-এ-ইছলামিয়ে।
এই পৰিস্থিতিত বিজেপি উত্থাপিত নাগৰিকত্ব বিধেয়কে অসমৰ সকলো খিলঞ্জীয়া লোকৰে নিদ্ৰা হৰণ কৰাৰ সময়ত স্বাভাৱিকতেই প্ৰশ্ন উঠিছে— ক’ত নিৰ্য্যাতন হিন্দুক?
