প্ৰদেশ কংগ্ৰেছৰ সভাপতি পদৰ পৰা ৰিপুণ বৰাক অপসাৰণৰ দাবী তুলি শনিবাৰে দিচপুৰ প্ৰেছ ক্লাবত সংবাদমেল সম্বোধন কৰি বৰাই মুক্তিযোদ্ধা আৰু কংগ্ৰেছীক জোতাৰ মালা পিন্ধাই গহপুৰত ঘূৰুৱা বুলি এক গুৰুতৰ অভিযোগ আনিছিল ধীৰেন চন্দ্ৰ শইকীয়াই। শইকীয়াৰ এই অভিযোগৰ পাছতেই উভটি ধৰিছে গহপুৰৰ পূব ছয়দুৱাৰ ব্লক কংগ্ৰেছে। শইকীয়াই অনা অভিযোগ সম্পূৰ্ণ ভিত্তিহীন বুলি ব্লক কংগ্ৰেছৰ বৰ্তমানৰ সভাপতি যতীন বৰাই দাবী কৰাৰ লগতে শইকীয়া কংগ্ৰেছৰ কোনো সদস্য নহয় বুলিও দাবী কৰিছে।
সংবাদ মাধ্যমলৈ প্ৰেৰণ কৰা এক বিজ্ঞপ্তিত যতীন বৰাই কয়, “ধীৰেন্দ্ৰ নাথ শইকীয়া কেতিয়াও গহপুৰ ব্লক কংগ্ৰেছ কমিটিৰ সভাপতি নাছিল। তেওঁ নিজকে স্বয়ম্ভু ব্লক কংগ্ৰেছৰ সভাপতি বুলি পৰিচয় দিয়াটো অতি লজ্জাজনক। তেওঁ ১৯৯১ৰ পৰা ১৯৯৬লৈকে কংগ্ৰেছৰ এগৰাকী সদস্য আছিল যদিও ১৯৯৬ চনৰ পৰা কংগ্ৰেছ দলটোৰ লগত কোনো যোগসূত্ৰ নাই। তেওঁ কোনো ৰাজনৈতিক দলৰ অস্ত্ৰ হিচাপে ব্যৱহৃত হৈছে।”
লগতে পঢ়ক– মুক্তিযোদ্ধা, কংগ্ৰেছীক ‘জোতাৰ মালা’ পিন্ধাই গহপুৰত ঘূৰোৱা ৰিপুণ বৰাৰ অপসাৰণ দাবী
ইয়াৰোপৰি, ৰিপুণ বৰাই কোনো কংগ্ৰেছী নেতা আৰু মুক্তিযোদ্ধাক জোতাৰ মালা পিন্ধোৱা বুলি অনা অভিযোগৰ সত্যতা প্ৰমাণ কৰিবলৈ আহ্বান জনাই ছয়দুৱাৰ ব্লক কংগ্ৰেছৰ সভাপতিগৰাকীয়ে কয়, “গুৱাহাটী বিশ্ববিদ্যালয়ত ছাত্ৰাৱস্থাত ৰিপুণ বৰা এন এছ য়ু আইৰ কৰ্মী আছিল আৰু ১৯৭৮ চনত জনতা দলৰ চৰকাৰে কংগ্ৰেছৰ আন্দোলনত লাঠিচাৰ্জ কৰিছিল। য’ত বৰা আঘাতপ্ৰাপ্ত হৈ দীৰ্ঘদিন চিকিৎসাধীন হৈ থাকিবলগীয়া হৈছিল। শইকীয়া প্ৰকৃত কংগ্ৰেছী হোৱাহেঁতেন এই কথা জানিলেহেঁতেন।”
লগতে পঢ়ক– প্ৰদেশ কংগ্ৰেছৰ সভাপতি পদৰ পৰা পদত্যাগৰ সিদ্ধান্ত ৰিপুন বৰাৰ
আনহাতে শেহতীয়া লোকসভা নিৰ্বাচনত কংগ্ৰেছৰ বিপৰ্য্যয়ৰ পিছতো অসমৰ সভাপতিৰ দায়িত্ব এৰিব নোখোজা বুলি শইকীয়াই তোলা দাবীও ব্লক কংগ্ৰেছে অগ্ৰাহ্য কৰিছে।
“প্ৰদেশ কংগ্ৰেছৰ সভাপতি ৰিপুণ বৰাই সভাপতি পদৰ পৰা অব্যাহতি বিচাৰি দলৰ হাইকমাণ্ডলৈ পদত্যাগ পত্ৰ প্ৰেৰণ কৰিছে। কিন্তু এই বিষয়ত কোনো সিদ্ধান্ত নোহোৱা পৰ্য্যন্ত তেওঁক দিয়া নিৰ্দেশৰ ভিত্তিত তেওঁ দলটো চলাই আছে। এনেস্থলত কংগ্ৰেছৰ লগত কোনো সম্পৰ্ক নথকা স্বয়ম্ভু নেতাই ৰিপুণ বৰাক অপসাৰণৰ দাবী তোলাটো হাস্যকৰ। যোৱা ২৩ বছৰত শইকীয়াৰ ঠগবাজী গহপুৰৰ ৰাইজে জানে,” বিজ্ঞপ্তিত এইদৰে উল্লেখ কৰে যতীন বৰাই।
কাৰোবাৰ ষড়যন্ত্ৰৰ দ্বাৰা পৰিচালিত হোৱা শইকীয়াৰ অসত্য, মনে সজা, ৰাজনৈতিক উদ্দেশ্যপ্ৰণোদিত কথাত ৰাইজক বিভ্ৰান্ত নহ’বলৈ ছয়গাওঁ ব্লক কংগ্ৰেছৰ সভাপতিগৰাকীয়ে আহ্বান জনায়।