পাঁচ খন ৰাজ্যৰ নিৰ্বাচন শেষ হোৱাৰ লগে লগে ইন্ধন আৰু গেছৰ মূল্য বৃদ্ধিৰ পথত মোডী চৰকাৰ। সূত্ৰই জনোৱা মতে, ১৫ মে’ৰ পূৰ্বে পেট্ৰ’ল-ডিজেলৰ মূল্য বৃদ্ধি পাব।গেছৰ দামও বৃদ্ধি পাব পাৰে। ইতিমধ্যে মোডী চৰকাৰে এই বিষয়ে চিন্তা-চৰ্চা কৰিবলৈ আৰম্ভ কৰিছে।
জানিব পৰা মতে ইন্ধন তেলৰ মূল্য প্ৰতি লিটাৰত ৪ৰ পৰা ৫ টকা বৃদ্ধি পাব পাৰে। লগতে ১৪.৫ কেজি ৰন্ধন গেছৰ দাম এবাৰতে বৃদ্ধি পাব পাৰে বুলিও কোৱা হৈছে।
পশ্চিম এছিয়াৰ যুদ্ধৰ বাবেই বিশ্বজুৰি তেল সংকটে ভয়াৱহ ৰূপ ধাৰণ কৰিছে। সেই ভয়াৱহ পৰিস্থিতিত বিশ্বৰ বজাৰত খাৰুৱা তেলৰ দাম ভয়ংকৰভাৱে বৃদ্ধি পালেও চৰকাৰে দেশবাসীৰ ওচৰলৈ যুদ্ধৰ প্ৰভাৱ সোমাবলৈ দিয়া নাছিল।
কিন্তু ৫ খন ৰাজ্যৰ নিৰ্বাচন শেষ হোৱাৰ লগে লগে চৰকাৰে এই বিষয়টোৰ ওপৰত চিন্তা কৰিবলৈ আৰম্ভ কৰিছে। চৰকাৰী সূত্ৰৰ উদ্ধৃতি দি কেইবাটাও সৰ্বভাৰতীয় সংবাদ মাধ্যমে দাবী কৰিছে যে আগন্তুক ৫-৭ দিনত প্ৰস্তাৱিত মূল্যবৃদ্ধিৰ সিদ্ধান্ত লোৱা হ’ব পাৰে।
হঠাতে খাৰুৱা তেলৰ মূল্যবৃদ্ধিয়ে তেল বিপণন কোম্পানী (OMC) সমূহৰ ওপৰত যথেষ্ট চাপ প্ৰয়োগ কৰিছে। দীৰ্ঘদিন ধৰি বৰ্ধিত উৎপাদন ব্যয় অ’এমচিয়ে নিজেই বহন কৰি আহিছে। ইয়াৰ বাবে প্ৰতিমাহে কোম্পানীকেইটাৰ লোকচান হৈছে ৩০ হাজাৰ কোটি টকা।
এই বোজা এতিয়ালৈকে গ্ৰাহকৰ ওপৰত জাপি দিয়া হোৱা নাই। ফলত ক্ৰমান্বয়ে লাভৰ পৰিমাণ কমি আহিছে, যাৰ বাবে কোম্পানীসমূহে চৰকাৰৰ ওপৰত হেঁচা বৃদ্ধি কৰিবলৈ আৰম্ভ কৰিছে।
কিন্তু তেলৰ দাম বৃদ্ধি হ’লে দেশত মুদ্ৰাস্ফীতিৰ সৃষ্টি হ’ব পাৰে বুলিও আশংকা কৰা হৈছে। ফলত এই প্ৰভাৱ নূন্যতম কৰিবলৈও চিন্তা-চৰ্চা আৰম্ভ হৈছে।
মন কৰিবলগীয়া যে নিৰ্বাচন শেষ হোৱাৰ লগে লগে চৰকাৰী তেল কোম্পানীসমূহে ইন্ধনৰ মূল্য বৃদ্ধি কৰিবলৈ আৰম্ভ কৰিছে। বাণিজ্যিক গেছৰ ক্ষেত্ৰত প্ৰথম পদক্ষেপ গ্ৰহণ কৰা হৈছে। ১০০-২০০ টকা নহয়, ১৯ কেজিৰ বাণিজ্যিক গেছৰ মূল্য এবাৰতে ৯৯৩ টকাকৈ বৃদ্ধি পালে।
এইটো ইয়াতেই শেষ নহয়, অটোৰ বাবে এল পি জিৰ দামও বৃদ্ধি কৰা হৈছে। অটো ইন্ধনৰ মূল্য একেবাৰতে বৃদ্ধি পাইছে ৬ টকা ৪৪ পইচা। এইবাৰ মধ্যবিত্ত শ্ৰেণীৰ ওপৰত ইন্ধন তেল আৰু ৰন্ধন গেছৰ মাধমাৰ পৰিব পাৰে বুলি আশংকা কৰা হৈছে।
