লৰ্ডছত অষ্ট্ৰেলিয়াক পৰাস্ত কৰি দক্ষিণ আফ্ৰিকাই বিশ্ব টেষ্ট চেম্পিয়নশ্বিপৰ ফাইনেলত জয়লাভ কৰাৰ পিছতে কেমেৰাবোৰে তেওঁলোকক অনুসৰণ কৰিছিল। প্ৰথমগৰাকী হ’ল টেম্বা বাভুমা। ২৭ বছৰৰ মূৰত আই চি চিৰ ট্ৰফী জয় কৰিবলৈ দলটোক নেতৃত্ব দিয়াৰ পিছতো তেওঁ শান্ত আছিল। লৰ্ডছৰ বেলকনিত বহি হাত চাপৰি বজাই আছে। তেওঁ তেতিয়াও বাকীবোৰৰ উত্তেজনাত যোগদান কৰা নাই।
আনগৰাকী ফিলা লোবি। দক্ষিণ আফ্ৰিকাৰ আন ক্ৰিকেটাৰৰ পত্নী আৰু প্ৰেমিকাৰ সৈতে তেওঁ গেলেৰীত বহি আছে। স্বামীৰ এই সাফল্যত তেওঁ চকুপানী ধৰিব পৰা নাই। তেওঁ এজন এজনকৈ সকলোকে সাৱটি ধৰিছে। স্বামী বাভুমাই নিজৰ আৱেগক ধৰি ৰাখিলেও লোবিয়ে নিজৰ আৱেগক ধৰি ৰাখিব নোৱাৰিলে। স্বামীৰ এই সফলতাৰ আঁৰত যে তেওঁৱো আছে।
চাৰি বছৰ ধৰি সম্পৰ্কত থকাৰ পিছত ২০১৮ চনত বাভুমা আৰু লোবিৰ বিবাহ হয়। ২৬ আগষ্টত ৱেষ্টাৰ্ণ কেপৰ ফ্ৰান্সশ্ব’কত দুয়ো বিবাহপাশত আবদ্ধ হয়। ২০২৩ চনত তেওঁলোকৰ এজন পুত্ৰসন্তান জন্ম হয়। তাৰ নাম লিহলে। সেই শিশুটিও লৰ্ডছত আছিল। বাভুমাই ট্ৰফী জিকি নিজৰ সন্তানক হাতত ধৰি খেলপথাৰত ঘূৰি ফুৰিছিল। সেই ছবিখনে ক্ৰিকেটৰ কেনভাছত নিজৰ স্থান দখল কৰিছে।
লোবি এগৰাকী সফল ব্যৱসায়ী। তেওঁৰ ‘লবি প্ৰপাৰ্টিজ’ নামৰ এটা ৰিয়েল এষ্টেট কোম্পানী আছে। ২০১৬ চনত তেওঁ এই কোম্পানীটো আৰম্ভ কৰিছিল। এই কোম্পানীটোৱে মূলতঃ জোহান্সবাৰ্গ আৰু কেপ টাউনত বিলাসী সম্পত্তি বিক্ৰী কৰে।
ব্যৱসায়ৰ লগতে তেওঁ এজন সমাজসেৱিকাও। ২০১৮ চনত তেওঁ অনাথ আৰু অভাৱগ্ৰস্ত শিশুৰ বাবে কাম কৰা ‘ফিলা লোবি ফাউণ্ডেশ্যন’ প্ৰতিষ্ঠা কৰে। লোবিয়ে ফাইনেন্স এণ্ড ৰিয়েল এষ্টেটত স্নাতক ডিগ্ৰী লাভ কৰে। ইয়াৰ পিছতে ব্যৱসায়ত নামে।
লোবি সদায় বাভুমাৰ বাবে ঢাল হৈ আহিছে। জাতীয় দলত অভিষেক ঘটোৱাৰ পাছত বাভুমাক বাৰে বাৰে সমালোচনা কৰা হৈছে। ছ’চিয়েল মিডিয়াত তেওঁৰ বিষয়ে এটাৰ পিছত এটাকৈ মিম ওলাইছে। লোবিয়ে তেওঁক ছ’চিয়েল মিডিয়ালৈ নাচাবলৈ পৰামৰ্শ দিয়ে। কাৰো কথা নুশুনিবলৈ কয়। মাত্ৰ তেওঁ খেলত মনোনিৱেশ কৰক।
পত্নীৰ কথা শুনি বাভুমাইও তেনেকুৱা কৰিলে। পৰিয়ালৰ কোনো দিশত তেওঁ গুৰুত্ব দিব লগা নাছিল। বাভুমাই নিজেও কিছুমান সাক্ষাৎকাৰত লোবিৰ অৱদানৰ কথা কৈছে। দক্ষিণ আফ্ৰিকাৰ অধিনায়কগৰাকীয়ে স্বীকাৰ কৰিছে যে লোবিৰ বাবেই তেওঁ ক্ৰিকেটৰ বাহিৰে আন একোতে মনোনিৱেশ কৰিব লগা হোৱা নাছিল।
নিজৰ ব্যৱসায় চম্ভালাৰ পিছতো লোবিয়ে বাভুমাৰ বাবে খেলপথাৰলৈ গৈছিল। তেওঁ গেলেৰীত বহি স্বামীক সমৰ্থন কৰিছিল। শনিবাৰে যেতিয়া দক্ষিণ আফ্ৰিকাই টেষ্ট বিশ্বকাপ জয় কৰিছিল তেতিয়া লোবিয়ে হয়তো পুৰণি দিনবোৰ মনত পেলাইছিল। সেইবাবেই চাগে তেওঁ নিজৰ আৱেগক ধৰি ৰাখিব পৰা নাছিল। স্বামীৰ এই কৃতিত্বত চকুলো ওলাই আহিছিল।
কিন্তু সফলতাৰ আনন্দতেই সেয়া হৈছিল। ইমান দিনে তেওঁৰ কষ্ট আৰু ত্যাগে ফল দিছে। সেয়ে তেওঁ চকুলো টুকিলেও তেওঁৰ মুখৰ উজ্জ্বল হাঁহিটো মাৰ যোৱা নাছিল।
