যৌন সম্পৰ্কক লৈ সমগ্ৰ বিশ্বতে আজিও বহুতো সামাজিক বাধা বা ধাৰণা আছে। আজিকালি লিভ-ইন সম্পৰ্কই ধৰ্ষণৰ আইনত বহুতো জটিলতাৰ সৃষ্টি কৰিছে। এনে অৱস্থাত হিমালয়ৰ দেশ নেপালে এক বৈপ্লৱিক সিদ্ধান্ত ল’বলৈ গৈ আছে। দেশখনে এখন নতুন আইন আনি কিশোৰ-কিশোৰীৰ মাজত পাৰস্পৰিক সন্মতিত হোৱা শাৰীৰিক সম্পৰ্কক মান্যতা দিবলৈ ওলাইছে। এই কথা পোহৰলৈ অহাৰ পিছতে এতিয়া চাৰিওফালে তীব্ৰ বিতৰ্কৰ সৃষ্টি হৈছে।
নেপালৰ বৰ্তমানৰ আইন অনুসৰি ১৮ বছৰৰ তলৰ যিকোনো কিশোৰ বা কিশোৰীৰ মাজত হোৱা যিকোনো ধৰণৰ শাৰীৰিক সম্পৰ্কক ধৰ্ষণ হিচাপে গণ্য কৰা হয়। ইয়াত পাৰস্পৰিক সন্মতিক কোনো গুৰুত্ব দিয়া নহয়। সন্মতি থাকক বা নাথাকক, নাবালকৰ শাৰীৰিক সম্পৰ্কক আইনমতে ধৰ্ষণ বুলিয়েই ধৰা হয়। আনহাতে, নেপালত বিয়াৰ আইনী বয়স হৈছে ২০ বছৰ। দেশখনৰ যুৱ সমাজে বহুবাৰ প্ৰশ্ন উত্থাপন কৰিছে যে যদি ১৮ বা ১৯ বছৰ বয়সত শাৰীৰিক সম্পৰ্কৰ বাবে আইনগত সন্মতি থাকে, তেন্তে সেই বয়সত বিবাহৰ বাবে কিয় বাধা থাকিব? এতিয়া এই সকলোবোৰ জটিলতাৰ অন্ত পৰিব বুলি ভবা হৈছে।
জেন-জি বিপ্লৱৰ জৰিয়তে ক্ষমতালৈ অহা নেপালৰ সবাতোকৈ কম বয়সীয়া প্ৰধানমন্ত্ৰী বলেন্দ্ৰ শ্বাহে এই ঐতিহাসিক আইনখন কাৰ্যকৰী কৰিবলৈ ওলাইছে। তেওঁৰ চৰকাৰে সমবয়সীয়া কিশোৰ-কিশোৰীৰ মাজত সন্মতিসাপেক্ষে হোৱা শাৰীৰিক সম্পৰ্কক অপৰাধ হিচাপে গণ্য কৰিব নিবিচাৰে। ফলস্বৰূপে, আইনখনত একেলগে দুটা সংশোধনী হ’বলৈ গৈ আছে। প্ৰথমতে, পাৰস্পৰিক সন্মতিত কিশোৰ-কিশোৰীৰ মাজত হোৱা শাৰীৰিক সম্পৰ্কক আৰু ধৰ্ষণ বুলি ধৰা নহ’ব। দ্বিতীয়তে, আইনী বিবাহৰ বয়স ২০ বছৰৰ পৰা কমাই ১৮ বছৰ কৰা হ’ব।
ইতিমধ্যে আইন, বিচাৰ আৰু সংসদীয় পৰিক্ৰমা মন্ত্ৰালয়ৰ অধীনত গঠন কৰা এখন টাস্ক ফ’ৰ্চে উচ্চতম ন্যায়ালয় আৰু আইন বিশেষজ্ঞসকলৰ মতামতৰ ভিত্তিত দুয়োটা সংশোধনী প্ৰস্তুত কৰি উলিয়াইছে। বৰ্তমান মন্ত্ৰীসভাই এই বিষয়টো পৰ্যালোচনা কৰি আছে। নতুন ধাৰাটোৰ প্ৰস্তাৱিত নাম দিয়া হৈছে ৰোমিঅ’-জুলিয়েট। এই ধাৰা অনুসৰি, যদি সম্পৰ্কত জড়িত দুয়োখন পক্ষৰ বয়স ১৬ ৰ পৰা ১৮ বছৰৰ ভিতৰত হয়, তেন্তে তেওঁলোকৰ পাৰস্পৰিক সন্মতিক আইনী স্বীকৃতি দিয়া হ’ব।
অৱশ্যে প্ৰস্তাৱনাত এই কথাও স্পষ্টকৈ উল্লেখ কৰা হৈছে যে নতুন আইনখনৰ অৰ্থ এইটো নহয় যে যিকোনো শাৰীৰিক সম্পৰ্কতেই ৰেহাই পোৱা যাব। যদি কোনো পক্ষক জোৰ-জুলুম কৰি, ব্লেকমেইল কৰি, ক্ষমতাৰ অপপ্ৰয়োগ কৰি বা আৰ্থিক লেনদেনৰ জৰিয়তে শাৰীৰিক সম্পৰ্ক স্থাপন কৰা হয়, তেন্তে সেয়া অপৰাধ বুলিয়েই গণ্য কৰা হ’ব। নতুন চৰকাৰখন এই আইনৰ সপক্ষে থাকিলেও পুৰণি চিন্তাধাৰাৰ লোকসকলে এই বিষয়টোক সহজভাৱে লোৱা নাই। তেওঁলোকে এনে ধৰণৰ হঠকাৰী সিদ্ধান্ত লোৱাৰ পৰা বিৰত থাকিবলৈ সকীয়াই দিছে।
