আফ্ৰিকান ছোৱাইন ফেভাৰ(ASF)ত আক্ৰান্ত হৈ মৃত্যু হোৱা গাহৰিৰ বিপৰীতে ব্যৱসায়িক ভিত্তিত গাহৰি পালন কৰা থলুৱা গাহৰি পালকসকলে লাভ কৰিব লগীয়া চৰকাৰী ক্ষতিপূৰণ লাভ নকৰাৰ আশংকাই দেখা দিছে।
উল্লেখ্য যে চলিত বৰ্ষৰ মে’ মাহৰ পৰা ধেমাজি, লখিমপুৰ, শিৱসাগৰৰ লগতে উজনি অসমৰ বিভিন্ন জিলাত আফ্ৰিকান ছোৱাইন ফেভাৰ(ASF)ত আক্ৰান্ত হৈ বহু গাহৰি মৃত্যু হৈছিল।
ৰাজ্যত ASFত আক্ৰান্ত হৈ ১৮ হাজাৰৰো অধিক গাহৰিৰ মৃত্যু হোৱা বুলি ৰাজ্য চৰকাৰৰ পশু চিকিৎসা বিভাগে পূৰ্বতে ঘোষণা কৰিছিল যদিও এতিয়া চৰকাৰে সেই পৰিমাণ হ্ৰাস কৰি ১২ হাজাৰ কৰিছে বুলিও গাহৰি পালকসকলে অভিযোগ উত্থাপন কৰিছে।
ইফালে ৰাজ্যৰ মুখ্যমন্ত্ৰী সৰ্বানন্দ সোণোৱালেও ১২ হাজাৰ গাহৰিৰ বাবেহে ক্ষতিপূৰণ দিবলৈ নিৰ্দেশ দিয়া বুলি জানিব পৰা গৈছে।যাৰ ফলত ৰাজ্যৰ বহু থলুৱা গাহৰি পালকে চৰকাৰী ক্ষতিপূৰণৰ লাভৰ পৰা বঞ্চিত হোৱাৰ আশংকাই দেখা দিছে।
ASFত আক্ৰান্ত হৈ গাহৰিৰ মৃত্যু হোৱাৰ ফলত ব্যৱসায়িক ভিত্তিত গাহৰি পালন কৰা বহু থলুৱা গাহৰি পালক যথেষ্ট পৰিমাণে আৰ্থিক লোকচানৰ সন্মুখীন হৈছিল।
এনেদৰে আৰ্থিকভাৱে ক্ষতিগ্ৰস্ত গাহৰি পালকসকলক ৰাজ্য চৰকাৰে ক্ষতিপূৰণ দিয়া হ’ব বুলি কথা ঘোষণা কৰিছিল। ৰাজ্যিক পশুপালন আৰু পশু চিকিৎসা বিভাগৰ আয়ুক্ত আৰু সচিব এছ জগনাথনে জনোৱা অনুসৰি পালকসকলৰ এই ক্ষতিপূৰণৰ ধন কেন্দ্ৰীয় আৰু ৰাজ্য চৰকাৰে ৫০%কৈ বহন কৰিব।
কিন্তু ৰাজ্য চৰকাৰে এতিয়াও আৰ্থিকভাৱে ক্ষতিগ্ৰস্ত এই থলুৱা গাহৰি পালকসকলক ক্ষতিপূৰণ দিয়াতো নায়ে বৰং ASFত আক্ৰান্ত হৈ মৃত্যু হোৱা গাহৰিৰ সংখ্যাৰ তথ্য চৰকাৰে হ্ৰাস কৰাৰ ফলত বহু থুলৱা গাহৰি পালকৰ জীৱনলৈ সংকট নামি অহাৰ আশংকাইহে দেখা দিছে।
ব্যৱসায়িক ভিত্তিক গাহিৰ পালন কৰা লখিমপুৰ জিলাৰ এজন গাহৰি পালক বিদৰ্ভ ৰাজখোৱাই নৰ্থ ইষ্ট নাওৰ সাংবাদিকৰ আগত কয় যে, “ক্ষতিপূৰণ লাভ কৰিম বুলি মই এতিয়াও নিশ্চিত নহয়। মই জানিব পৰা মতে ক্ষতিপূৰণৰ ৫০ শতাংশ কেন্দ্ৰীয় চৰকাৰে ধন ইতিমধ্যে আৱণ্টন দিছে। কিন্তু ৰাজ্য চৰকাৰ অংশ এতিয়াও আৱণ্টন দিয়া হোৱাই নাই। যাৰ ফলত সমগ্ৰ প্ৰক্ৰিয়াটো বিলম্ব হৈছে।”
উল্লেখ্য যে ৰাজখোৱাৰ লখিমপুৰৰ কদমত প্ৰায় ১ বিঘা মাটি জুৰি এখন গাহৰি ফাৰ্ম আছিল, য’ত ৩০৫ জনী ডুৰেক প্ৰজাতি গাহৰি আছিল। আফ্ৰিকান ছোৱাইন ফেভাৰত আক্ৰান্ত হৈ তেওঁৰ ফাৰ্মৰ ২৮০ জনীৰো অধিক গাহৰি মৃত্যু মুখত পৰে। বৰ্তমান মাত্ৰ ২৫ জনী গাহৰি থকা ৰাজখোৱাই প্ৰায় ৫০ লাখ টকাৰ আৰ্থিক লোকচন হোৱা বুলি দাবী কৰিছে।
“গাহৰি পোৱালিৰ বাবত মই গ্ৰাহকৰ পৰা অগ্ৰিম ধনো লৈছিলো। এতিয়া মই সেই ধনো পৰিশোধ কৰিব লাগিব,” তেওঁ লগতে কয়।
ৰাজখোৱাই ASFত আক্ৰান্ত হৈ মৃত্যু হোৱা গাহৰিৰ সংখ্যা চৰকাৰে হ্ৰাস কৰাত আৰ্থিক সংকটত পৰিব বুলিও শংকিত হৈছে।
ইফালে ধেমাজিৰ মৰিধলৰ এজন গাহৰি পালক প্ৰণৱজ্যোতি ফুকনৰ ১০৬ টা গাহৰি পোৱালিৰ মৃত্যু হৈছিল। ফুকনৰ ফাৰ্মত ২০ ৰপৰা ৬০ কেজি ভিতৰত ৪৬ টা আৰু ৬০ কেজিৰ ওপৰৰ ৫৭ টা গাহৰি ASFত মৃত্যু হৈছিল।
কিন্তু তেওঁৰ ফাৰ্মৰ মৃত গাহৰিৰ চৰকাৰীৰ নমুনা পৰীক্ষাত ৰিজাল্ট নিগেটিভ আহিছে। যাৰ ফলত চৰকাৰী ক্ষতিপূৰণ নোপোৱাৰ আশংকাত ভুগিছে থলুৱা গাহৰি পালকজনে।
ইফালে থলুৱা গাহৰি পালকসকলৰ বিপৰীতে চৰকাৰী পক্ষই ইয়াৰ বিপৰীত মেৰুত অৱস্থান কৰা পৰলিক্ষিত হৈছে।
“এই তথ্যসমূহ জিলা পশু চিকিৎসা বিষয়াৰ তথ্য অনুসৰি সংকলিত কৰা হৈছে,” ৰাজ্যৰ পশুপালন আৰু পশু চিকিৎসা বিভাগৰ এজন বিষয়াই এইদৰে কয়।
উল্লেখ্য যে ASFত আক্ৰান্ত হোৱা গাহৰিবোৰ ১০৪ৰ পৰা ১০৮ ডিগ্ৰী ফৰেনহাইটৰ উচ্চ জ্বৰত ভুগিছিল। আন লক্ষণবোৰৰ ভিতৰত ভোক, বমি আৰু ৰক্তাক্ত প্ৰস্ৰাৱৰ সৈতে ডায়েৰিয়াও আছিল।
অধ্যয়ন অনুসৰি আফ্ৰিকান ছোৱাইন জ্বৰ সাধাৰণতে সচৰাচৰ হোৱা জ্বৰৰ দৰে হয় যদিও এই জ্বৰ আৰু সচৰাচৰ জ্বৰৰ পাৰ্থক্য নিৰ্ণয় কৰিবলৈ পৰীক্ষাগাৰৰ বিশেষ পৰীক্ষাৰ প্ৰয়োজন হয়।
