২৭১ গৰাকী যাত্ৰীসহিতে মাজ আকাশত এখন বিমান। হঠাতে বিমানত লাগিল হুৱাদুৱা। বিমানখনৰ বাথৰুমত অকস্মাতে শাৰীৰিক অসুস্থতাৰ বাবে বাগৰি পৰি মৃত্যু ঘটিল এগৰাকী পাইলটৰ। অতৰ্কিতে ঘটা এনে অকল্পনীয় পৰিস্থিতিয়ে সৃষ্টি কৰে তীব্ৰ আতংকৰ।
অৱশ্যে এই আতংকময় পৰিস্থিতিৰ মাজতে আন কোনো হানি-বিঘিনি নঘটাকৈ বিমানখনৰ জৰুৰী অৱতৰণ কৰোৱা হয়। এই ঘটনা সংঘটিত হৈছে আমেৰিকাত। মিয়ামিৰ পৰা চিলি অভিমুখে যাত্ৰা কৰিছিল উক্ত বিমানখন।
কিন্তু এই আকস্মিক ঘটনাৰ বাবে সহকাৰী পাইলটে বিমানখন পানামাত জৰুৰী অৱতৰণ কৰে। বিমানত মৰ্মান্তিক মৃত্যু ঘটা পাইলটগৰাকীৰ নাম কেপ্তেইন ইভান আন্দৌৰ বুলি জানিব পৰা গৈছে।
প্ৰকাশিত খবৰ অনুসৰি, লাটাম এয়াৰলাইন্সৰ বিমানখন উৰণৰ তিনি ঘণ্টাৰ পিছত অসুস্থ অনুভৱ কৰিছিল আন্দৌৰে। অসুস্থ আন্দৌৰক ক্ৰুৱে জৰুৰীকালীন চিকিৎসা প্ৰদান কৰিছিল যদিও এই চেষ্টা অথলে যায়।
পানামা চহৰৰ টকুমেন আন্তঃৰাষ্ট্ৰীয় বিমানবন্দৰত বিমানখন অৱতৰণ কৰাৰ পিছতে চিকিৎসকে পাইলটগৰাকীৰ স্বাস্থ্য পৰীক্ষা কৰে যদিও ইতিপূৰ্বেই মৃত্যু ঘটে।
বিমান সংস্থাটোৱে এক বিবৃতি যোগে এই হৃদয়বিদাৰক ঘটনাটোৰ বিষয়ে সদৰী কৰি আন্দৌৰৰ মৃত্যুত শোক প্ৰকাশ কৰে আৰু তেওঁৰ পৰিয়াললৈ সমবেদনা জ্ঞাপন কৰে।
মৃত্যুৰ সময়লৈকে নিজৰ ২৫ বছৰীয়া কেৰিয়াৰত আন্দৌৰে আগবঢ়োৱা অৱদানৰ বাবে সংস্থাটোৱে কৃতজ্ঞতা জ্ঞাপন কৰে। ইফালে আন্দৌৰৰ মৃত্যুৰ পাছত বিমানখনে পানামাৰ পৰা পুনৰ চিলি অভিমুখে যাত্ৰা কৰে বুলি বিমান সংস্থাটোৱে সদৰী কৰে।
