পিএম কেয়াৰ্ছ ফাণ্ডক লৈ সংসদত কোনো ধৰণৰ প্ৰশ্ন উত্থাপন কৰিব নোৱাৰিব বুলি কেন্দ্ৰীয় চৰকাৰে লোৱা স্থিতিৰ পাছতে দেশৰ ৰাজনৈতিক মহলত তীব্ৰ বিতৰ্কৰ সৃষ্টি হৈছে। লোকসভা সচিবালয়ক চৰকাৰৰ তৰফৰ পৰা জনোৱা হৈছে যে এই পুজি সংসদীয় তদাৰকৰ আওতাত নপৰে। কেন্দ্ৰীয় চৰকাৰৰ এই স্পষ্টীকৰণৰ পাছতে বিৰোধী দলসমূহে চৰকাৰক লক্ষ্য কৰি আক্ৰমণ তীব্ৰতৰ কৰি তুলিছে আৰু ইয়াৰ স্বচ্ছতাক লৈ প্ৰশ্ন উত্থাপন কৰিছে।
চৰকাৰে ইয়াৰ আঁৰত যুক্তি দিছে যে পিএম কেয়াৰ্ছ ফাণ্ড এটা জনকল্যাণমূলক ট্ৰাষ্ট আৰু ই চৰকাৰী বাজেটৰ অংশ নহয়। এই পুজিত চৰকাৰৰ পৰা কোনো ধৰণৰ অৰ্থ প্ৰদান কৰা নহয়, বৰঞ্চ ই সম্পূৰ্ণৰূপে স্বেচ্ছামূলক অনুদানৰ ওপৰত নিৰ্ভৰশীল। চৰকাৰী ব্যাখ্যা অনুসৰি যিহেতু ইয়াত চৰকাৰী ধন খৰচ কৰা নহয়, সেয়েহে ইয়াৰ কাম-কাজ, অনুদান বা খৰচৰ সবিশেষ জানিব বিচাৰি সংসদত প্ৰশ্ন উত্থাপন কৰাটো নিয়মসংগত নহয় বুলি কেন্দ্ৰই স্পষ্ট কৰি দিছে।
কেন্দ্ৰৰ এই স্থিতিৰ বিৰোধিতা কৰি বিৰোধী পক্ষই কৈছে যে যিহেতু ই জনসাধাৰণৰ পৰা সংগ্ৰহ কৰা ধন, সেয়েহে ইয়াত স্বচ্ছতা আৰু জৱাবদিহিতা থকাটো অতি প্ৰয়োজনীয়। কংগ্ৰেছৰ এজন ৰাষ্ট্ৰীয় মুখপাত্ৰই সামাজিক মাধ্যম এক্সত এই সিদ্ধান্তৰ তীব্ৰ সমালোচনা কৰিছে। তেওঁৰ মতে পূৰ্বে তথ্য জনাৰ অধিকাৰ আইন বা আৰটিআইৰ জৰিয়তে এই তথ্য দিবলৈ অস্বীকাৰ কৰা চৰকাৰে এতিয়া সাংসদসকলৰ বাবেও প্ৰশ্ন কৰাৰ বাট বন্ধ কৰি দিছে। তেওঁ প্ৰশ্ন উত্থাপন কৰিছে যে যদি এই ধন প্ৰকৃততে জনকল্যাণৰ বাবে ব্যৱহাৰ কৰা হৈছে, তেন্তে ইয়াৰ তথ্য ৰাজহুৱা কৰিবলৈ চৰকাৰে কিয় কুণ্ঠাবোধ কৰিছে।
উল্লেখ্য যে ২০২০ চনৰ মাৰ্চ মাহত কভিড মহামাৰীৰ সময়ত জৰুৰীকালীন পৰিস্থিতিৰ মোকাবিলা কৰিবলৈ এই পিএম কেয়াৰ্ছ ফাণ্ড গঠন কৰা হৈছিল। বিভিন্ন ব্যক্তি, কৰ্পোৰেট প্ৰতিষ্ঠান আৰু সংগঠনৰ পৰা ইয়ালৈ বৃহৎ পৰিমাণৰ অনুদান আহিছিল। প্ৰধানমন্ত্ৰীৰ কাৰ্যালয়ে জনোৱা মতে সংসদৰ কাৰ্যবিধিৰ ৪১ নম্বৰ নিয়ম অনুসৰি পিএম কেয়াৰ্ছৰ লগতে প্ৰধানমন্ত্ৰীৰ ৰাষ্ট্ৰীয় সাহায্য পুজি আৰু ৰাষ্ট্ৰীয় প্ৰতিৰক্ষা পুজিৰ বিষয়েও সংসদত প্ৰশ্ন কৰিব নোৱাৰিব। ২০২৩ চনৰ মাৰ্চ মাহৰ হিচাপ অনুসৰি এই পুজিত ৬,২৮৩.৭ কোটি টকা জমা আছিল। চৰকাৰৰ মতে এই আটাইকেইটা পুজি যিহেতু স্বেচ্ছামূলক অনুদানৰ দ্বাৰা চলে আৰু চৰকাৰী ধন ব্যৱহাৰ নহয়, সেয়েহে ইয়াক সংসদীয় তদাৰকৰ বাহিৰত ৰখা হৈছে।
