মুখ্য ন্যায়াধীশ ডি ৱাই চন্দ্ৰচুড়ৰ ঘৰত গণেশ পূজাত উপস্থিত মোডী; ফটোক কেন্দ্ৰ কৰি নতুন জল্পনা

উচ্চতম ন্যায়ালয়ৰ মুখ্য ন্যায়াধীশ ডি ৱাই চন্দ্ৰচুড়ৰ বাসগৃহত গণেশ পূজাত অংশগ্ৰহণ কৰে প্ৰধানমন্ত্ৰী নৰেন্দ্ৰ মোডীয়ে। শেহতীয়াকৈ গণেশ চতুৰ্থীৰ দিনা মুখ্য ন্যায়াধীশ ডি ৱাই চন্দ্ৰচুড়ৰ ঘৰত পূজাত অংশ লৈছিল নৰেন্দ্ৰ মোদীয়ে। সেই ছবিখনে এতিয়া ছ’চিয়েল মিডিয়াত ভাইৰেল হৈছে। ৰাজনৈতিক মহলত এই ছবিখন যথেষ্ট তাৎপৰ্যপূৰ্ণ বুলি গণ্য কৰা হৈছে।

বুধবাৰে নিশা নতুন দিল্লীত মুখ্য ন্যায়াধীশ ডি ৱাই চন্দ্ৰচুড়ৰ চৰকাৰী বাসগৃহৰ অভ্যন্তৰীণ দৃশ্যই এতিয়া বিভিন্ন ছ’চিয়েল মিডিয়া প্লেটফৰ্মত দেখা গৈছে। সিদিনা মুখ্য ন্যায়াধীশৰ বাসগৃহত গণেশ পূজাত অংশগ্ৰহণ কৰে প্ৰধানমন্ত্ৰী নৰেন্দ্ৰ মোদীয়ে। ভাইৰেল হোৱা ছবিখনত প্ৰধানমন্ত্ৰীয়ে আৰতিৰ পুষ্পপাত্ৰ লৈ গণপতিৰ সন্মুখত পূজা কৰা দেখা গৈছে। তেওঁৰ এফালে মুখ্য ন্যায়াধীশ আৰু আনফালে মুখ্য ন্যায়াধীশৰ পত্নী কল্পনা দাস থিয় হৈ আছিল।

লগতে পঢ়কঃ মধ্যপ্ৰদেশত ভয়ংকৰ ঘটনা, সেনা বিষয়াৰ গাড়ী ৰখাই প্ৰেয়সীক দলবদ্ধ ধৰ্ষণ দুষ্কৃতিকাৰীৰ!

প্ৰধানমন্ত্ৰী নৰেন্দ্ৰ মোডীৰ মূৰত দেখা গৈছিল মহাৰাষ্ট্ৰৰ টুপী। এক্স (পূৰ্বৰ টুইটাৰ) হেণ্ডেলত নৰেন্দ্ৰ মোদীয়ে লিখিছে, ‘মুখ্য ন্যায়াধীশ ডি ৱাই চন্দ্ৰচুড়জীৰ বাসগৃহত গণেশ পূজাত অংশগ্ৰহণ কৰিছিলো। ভগৱান শ্ৰী গণেশে সকলোকে সুখ, সমৃদ্ধি আৰু সুস্বাস্থ্যৰ আশীৰ্বাদ কৰক’।

আন এটা ভিডিঅ’ ভাইৰেল হৈছে য’ত ডি ৱাই চন্দ্ৰচুড়ে সপত্নীক প্ৰধানমন্ত্ৰীক তেওঁলোকৰ বাসগৃহলৈ আদৰণি জনোৱা দেখা গৈছে। মুখ্য ন্যায়াধীশে প্ৰতি বছৰে দহ দিন গণপতি বাপ্পাক পূজা কৰে। বুধবাৰে প্ৰধানমন্ত্ৰীয়ে পূজাত অংশগ্ৰহণ কৰে। অৱশ্যে পূজাৰ অন্তত সৌজন্যমূলক সাক্ষাৎ কৰি তেওঁ গুচি যোৱা বুলি জানিব পৰা গৈছে।

PM Modi at the residence of CJI DY Chandrachud for Ganesh Chaturthi festival. pic.twitter.com/UKKwuzQynX

— Arvind Gunasekar (@arvindgunasekar) September 11, 2024

উল্লেখ্য যে শেহতীয়া কেইবাটাও ৰায়ত কেন্দ্ৰীয় চৰকাৰৰ নীতিক সমালোচনা কৰা দেখা গৈছে উচ্চতম ন্যায়ালয়ৰ মুখ্য ন্যায়াধীশে। কিন্তু এই ছবিখনে বিভিন্ন মহলত এক নতুন জল্পনাৰ সৃষ্টি কৰিছে। ইপিনে, শীৰ্ষ আদালতত কেইবাটাও গুৰুত্বপূৰ্ণ গোচৰৰ ৰায় আহিবলগীয়া আছে। এই পৰিস্থিতিত কোৱা বাহুল্য যে চন্দ্ৰচুড়ৰ সৈতে প্ৰধানমন্ত্ৰীৰ এই ছবিখনে বহু প্ৰশ্নৰ উদ্ৰেক কৰিছে।