কেন্দ্ৰীয় মন্ত্ৰীসভাত (মোডী কেবিনেট) বৃহৎ পৰিৱৰ্তনৰ জল্পনা-কল্পনা তীব্ৰতৰ হৈ পৰিছে। অহা দেওবাৰ বা সোমবাৰে প্ৰধানমন্ত্ৰী নৰেন্দ্ৰ মোডীৰ মন্ত্ৰীসভা সম্প্ৰসাৰণ আৰু পুনৰ সালসলনি হ’ব পাৰে বুলি ৰাজনৈতিক মহলত তীব্ৰ চৰ্চা চলিছে।
সূত্ৰসমূহে দাবী কৰিছে যে কেন্দ্ৰীয় গৃহমন্ত্ৰী অমিত শ্বাহে বৃহস্পতিবাৰে ৰাষ্ট্ৰপতি দ্ৰৌপদী মুৰ্মুক সাক্ষাৎ কৰি সম্ভাৱ্য সালসলনিৰ সময়সূচী সন্দৰ্ভত আলোচনা কৰে। অৱশ্যে এতিয়ালৈকে কোনো আনুষ্ঠানিক ঘোষণা কৰা হোৱা নাই।
সূত্ৰ অনুসৰি এইবাৰ এই সালসলনিয়ে কেইবাটাও গুৰুত্বপূৰ্ণ মন্ত্ৰালয়ৰ দায়িত্বত পৰিৱৰ্তন আনিব পাৰে। তদুপৰি, কেবিনেটত কিছু নতুন মুখ কেবিনেট মন্ত্ৰী হিচাপে অন্তৰ্ভুক্ত হ’ব পাৰে।
ৰিজাৰ্ভ বেংকৰ প্ৰাক্তন গৱৰ্ণৰ তথা প্ৰধানমন্ত্ৰীৰ প্ৰাক্তন প্ৰধান সচিব শক্তিকান্ত দাসক পূৰ্ণ পৰ্যায়ৰ মন্ত্ৰী হিচাপে কেবিনেটত অন্তৰ্ভুক্ত হ’ব পাৰে বুলি জল্পনা-কল্পনাৰ সৃষ্টি হৈছে।
আনহাতে, বৰ্তমানৰ বিত্তমন্ত্ৰী নিৰ্মলা সীতাৰমনক মানৱ সম্পদ উন্নয়ন (শিক্ষা) মন্ত্ৰালয়ৰ দায়িত্ব দিয়া হ’ব পাৰে বুলিও ৰাজনৈতিক মহলত চৰ্চা চলিছে।
জল্পনা-কল্পনাৰ মতে বৰ্তমানৰ কেন্দ্ৰীয় মন্ত্ৰী ধৰ্মেন্দ্ৰ প্ৰধান আৰু হৰদীপ সিং পুৰীক কেবিনেটৰ পৰা বাদ দিয়া হ’ব পাৰে।
শক্তি মন্ত্ৰী মনোহৰ লাল খট্টৰে বৰ্তমানৰ শক্তি মন্ত্ৰালয়ৰ দায়িত্ব হেৰুৱাব পাৰে বুলিও সূত্ৰই দাবী কৰিছে।
ইয়াৰ উপৰিও অৰ্ধ ডজনৰো অধিক ৰাজ্যিক মন্ত্ৰীকো কেবিনেটৰ পৰা অপসাৰণ কৰিব পাৰে বুলি চৰ্চা চলিছে।
ইপিনে, উদ্ধৱ থাকৰেৰ শিৱসেনাৰ ছয়জন সাংসদক এন ডি এক সমৰ্থন কৰি ওলাই অহাৰ পিছত পুৰস্কৃত হ’ব পাৰে বুলি জল্পনা-কল্পনাৰ সৃষ্টি হৈছে।
এনে পৰিস্থিতিত শিৱসেনাৰ সাংসদ শ্ৰীকান্ত শিন্দেক হয়তো পূৰ্ণকালীন মন্ত্ৰী দিব পাৰে। তদুপৰি প্রতাপৰাও জাধৱৰ স্বাস্থ্য বিভাগৰ ৰাজ্যিক মন্ত্রীৰ দায়িত্ব সলনি কৰি সঞ্জয় দীনা পাটিলক দিব পাৰে৷ অৱশ্যে সূত্ৰই দাবী কৰিছে যে জাধৱৰ আয়ুষ মন্ত্ৰালয় থাকিব পাৰে।
আনহাতে, প্ৰাক্তন কেন্দ্ৰীয় মন্ত্ৰী অনুৰাগ ঠাকুৰেও পূৰ্ণকালীন মন্ত্ৰী হিচাপে কেবিনেটলৈ ঘূৰি আহিব পাৰে বুলি তীব্ৰ চৰ্চা চলিছে।
ইয়াৰ উপৰিও খাজুৰাহোৰ সাংসদ বিষ্ণু দত্ত শৰ্মা আৰু বিহাৰৰ মহাৰাজগঞ্জৰ সাংসদ জনাৰ্দন সিং চিগ্ৰীৱাল কেবিনেটত অন্তৰ্ভুক্ত হ’ব পাৰে।
অহা বছৰ উত্তৰ প্ৰদেশৰ বিধানসভা নিৰ্বাচনৰ পৰিপ্ৰেক্ষিতত কেবিনেটত ৰাজনৈতিক ভাৰসাম্য গঢ়ি তোলাৰ প্ৰয়াস কৰা হ’ব পাৰে।
ইফালে পঞ্জাৱত আম আদমী পাৰ্টি এৰি যোৱা নেতাসকলকো হয়তো গুৰুত্ব দিয়া হ’ব পাৰে। ৰাঘৱ চাড্ডা আৰু অশোক মিত্তলৰ এজনে কেবিনেটত স্থান পাব পাৰে বুলি জল্পনা-কল্পনাৰ সৃষ্টি হৈছে।
আনহাতে, কেন্দ্ৰীয় মন্ত্ৰী ৰবিনীত সিং বিট্টুৰ সলনি আৰ এছ এছৰ ঘনিষ্ঠ নেতা তৰুণ চুঘক দায়িত্ব দিয়া হ’ব পাৰে বুলিও সূত্ৰই দাবী কৰিছে।
যিহেতু জে ডি ইউৰ মুৰব্বী নীতিশ কুমাৰে এন ডি এত ৰাজনৈতিক গুৰুত্ব অব্যাহত ৰাখিছে, সেয়েহে তেওঁৰ দলৰ পৰাও কেবিনেটলৈ নতুন মুখ আহিব পাৰে বুলি চৰ্চা চলিছে।
মন কৰিবলগীয়া যে এই সকলোবোৰ তথ্য এতিয়াও ৰাজনৈতিক উৎস আৰু জল্পনা-কল্পনাৰ ওপৰত ভিত্তি কৰিয়েই চলি আছে। কেবিনেট সালসলনি বা নতুন অন্তৰ্ভুক্তি সন্দৰ্ভত এতিয়ালৈকে কেন্দ্ৰীয় চৰকাৰ বা প্ৰধানমন্ত্ৰীৰ কাৰ্যালয়ে কোনো আনুষ্ঠানিক ঘোষণা কৰা নাই। ফলত সম্ভাৱ্য পৰিৱৰ্তনৰ বিষয়ে চূড়ান্ত ছবিখন আনুষ্ঠানিক ঘোষণাৰ পিছতহে স্পষ্ট হ’ব।
