দুইমাহতকৈ অধিক সময় ধৰি অব্যাহত থকা হিংসাত্মক পৰিস্থিতিৰ এতিয়াও শাম কটা নাই মণিপুৰত। ৰাজ্যখনৰ এই অশান্ত জৰ্জৰ পৰিস্থিতিৰ মাজতে কালি ইম্ফলত হত্যাৰ বলি হ’ল শেষগৰাকী কুকি মহিলাও। অগ্নিগৰ্ভৰ মণিপুৰত এতিয়া কেৱল হিংসাৰ দাবানল। কিন্তু এই ভয়াৱহতাই এতিয়াও যেন স্পৰ্শ কৰিব পৰা নাই প্ৰধানমন্ত্ৰী নৰেন্দ্ৰ মোদীক।
নিজ ভাষণত উত্তৰ-পূবক অষ্টলক্ষ্মী আখ্যা দিয়া মোদী এতিয়াও নিশ্চুপ অষ্টলক্ষ্মীৰ অংগ মণিপুৰৰ জৰ্জৰিত অৱস্থা সন্দৰ্ভত। মোদীৰ এই মৌনতাক পূৰ্বৰে পৰা তীব্ৰ আক্ৰমণ চলাই আহিছে মণিপুৰবাসীৰ লগতে দেশৰ বিৰোধী শক্তিসমূহেও। বিশেষকৈ প্ৰধান বিৰোধী দল কংগ্ৰেছে মোদীৰ এই মৌনতাক ধাৰাবাহিক সমালোচনা কৰি আহিছে।
কিন্তু বিৰোধীৰ এই সমালোচনাৰ পিছতো মণিপুৰক লৈ মৌন হৈয়েই ৰৈছে প্ৰধানমন্ত্ৰী মোদী। এই মৌনতাৰ বাবে মোদীক বৃহস্পতিবাৰে পুনৰ আক্ৰমণৰ লক্ষ্য কৰি লয় কংগ্ৰেছে। মণিপুৰ সন্দৰ্ভত মোদীৰ এই আচৰণ ‘আশ্চৰ্যকৰভাৱে অদ্ভুত’ আখ্যা দিছে বিৰোধী দলটোৱে।
কংগ্ৰেছৰ জ্যেষ্ঠ নেতা জয়ৰাম ৰমেশে মোদীক সমালোচনা কৰি কয় যে ৬৬ দিনৰ পাছতো প্ৰধানমন্ত্ৰী মোদীয়ে মণিপুৰৰ হিংসাত্মক ঘটনা সন্দৰ্ভত এটা শব্দও উচ্চাৰণ কৰা নাই। জয়ৰাম ৰমেশৰ মতে, মণিপুৰৰ এই অগ্নিগৰ্ভৰ পৰিস্থিতিৰ অৱসানৰ বাবে মোদীৰ নাই কোনো আবেদন আৰু কোনো যন্ত্ৰণা।
ৰমেশে কয়, “কাইলৈ প্ৰধানমন্ত্ৰীয়ে ছত্তীশগড় আৰু উত্তৰ প্ৰদেশ ভ্ৰমণ কৰিব। ইয়াৰ পিছদিনা তেওঁ তেলেংগানা আৰু ৰাজস্থানত থাকিব। এই সময়ত অধিক ‘ফটো-অপাৰেচন’ হ’ব, অধিক বিকৃত তথ্যৰ উপস্থাপন হ’ব, বিৰোধীক লক্ষ্য কৰি অধিক অপমান কৰা হ’ব। সমান্তৰালভাৱে হ’ব অধিক আত্মমহিমা।”
“কিন্তু ৬৬ দিনৰ পাছতো তেওঁ মণিপুৰৰ ওপৰত এটা শব্দও নহয়। যন্ত্ৰণা, দুখ আৰু বেদনা প্ৰকাশৰ এক ক্ষুদ্ৰ শব্দও উচ্চাৰণ নহয়। শান্তি, সম্প্ৰীতি আৰু মিলনৰ বাবে তেওঁৰ কোনো আবেদনো নাই। মণিপুৰৰ বিষয়ত তেওঁৰ আচৰণ আশ্চৰ্যকৰভাৱে অদ্ভুত।”- এক টুইট যোগে এইদৰে কয় ৰমেশে।
ইফালে এই অশান্ত জৰ্জৰ পৰিস্থিতিৰ মাজতে শেহতীয়াকৈ মণিপুৰ ভ্ৰমণ কৰা কংগ্ৰেছ নেতা ৰাহুল গান্ধীয়েও হিংসাত্মক পৰিস্থিতিৰ পৰিপ্ৰেক্ষিতত নিজৰ আপোনজনক হেৰুওৱা মণিপুৰৰ বাসিন্দাৰ সৈতে হোৱা সাক্ষাতৰ এক ভিডিঅ’ শ্বেয়াৰ কৰি মণিপুৰবাসীক ঘৃণা ত্যাগ কৰি একত্ৰিত হ’বলৈ আহ্বান জনায়।
“ঘৃণাৰ বাবে আপোনজনক হেৰুৱালে কি কষ্ট হয় মই জানো। য’ত হিংসা হয়, সেই সমাজ বা দেশ কেতিয়াও আগবাঢ়িব নোৱাৰে। ঘৃণা ত্যাগ কৰক, মণিপুৰক একত্ৰিত কৰক।”- হিন্দীত এক টুইটযোগে এইদৰে কয় গান্ধীয়ে।
আনহাতে মণিপুৰ কংগ্ৰেছৰ মুখপাত্ৰ নিংগোম্বম বুপেণ্ডা মেইটেইয়েও এক টুইট যোগে মণিপুৰৰ বিষয়ত প্ৰধানমন্ত্ৰী মোদীক কিহে বাধা দিছে বুলি প্ৰশ্ন কৰে। টুইটটোত তেওঁ কয়, “প্ৰধানমন্ত্ৰী বা সংসদৰ সদস্য নহয় যদিও ৰাহুল গান্ধীয়ে আমাক মণিপুৰত সাক্ষাৎ কৰিবলৈ আহিছিল। কিন্তু ৰাজ্যত ২ মাহৰ অবিৰত অস্থিৰতাৰ পাছতো মণিপুৰবাসীক লগ ধৰাত প্ৰধানমন্ত্ৰী নৰেন্দ্ৰ মোদীক কিহে বাধা দিছে!”
উল্লেখ্য যে, ৩ মে’ৰ পৰা মণিপুৰত সংঘটিত হোৱা গোষ্ঠীগত হিংসাৰ পৰিপ্ৰেক্ষিতত প্ৰায় ১২০ গৰাকী লোকৰ মৃত্যু হোৱাৰ লগতে ৩ হাজাৰৰো অধিক লোক আহত হৈছে। গৃহহাৰা হৈছে হাজাৰ হাজাৰ লোক। মণিপুৰৰ এই উদ্বেগজনক পৰিস্থিতিৰ বিষয়ে সংসদৰ গ্ৰীষ্মকালীন অধিৱেশনত উত্থাপন কৰাৰ প্ৰতিশ্ৰুতি দিছে বিৰোধী কংগ্ৰেছে।
