২০১৫ চনৰ পৰা ২০২৫ চনৰ ভিতৰত প্ৰধানমন্ত্ৰী নৰেন্দ্ৰ মোদীৰ বিদেশ ভ্ৰমণৰ খৰচৰ সম্পৰ্কত শেহতীয়াকৈ কেন্দ্ৰীয় বৈদেশিক পৰিক্ৰমা মন্ত্ৰালয়ে লোকসভাত এক গুৰুত্বপূৰ্ণ তথ্য দাঙি ধৰিছে। এই চৰকাৰী তথ্য অনুসৰি যোৱা দহ বছৰত প্ৰধানমন্ত্ৰীৰ বিদেশ ভ্ৰমণৰ নামত চৰকাৰী ৰাজকোষৰ পৰা মুঠ ৭৬২ কোটি টকা ব্যয় হৈছে। শুকুৰবাৰে লোকসভাত এক লিখিত উত্তৰৰ জৰিয়তে মন্ত্ৰালয়ে এই খৰচৰ সবিশেষ হিচাপ ৰাজহুৱা কৰে।
প্ৰকাশিত তথ্য অনুসৰি ২০২৪ চনত প্ৰধানমন্ত্ৰীৰ বিদেশ ভ্ৰমণৰ বাৰ্ষিক ব্যয় ১০০ কোটি টকাৰ ওপৰত আছিল। ২০২৫ চনত এই পৰিমাণ যথেষ্ট বৃদ্ধি পায় আৰু ১৭৫ কোটি টকা অতিক্ৰম কৰে। সেই বৰ্ষত প্ৰধানমন্ত্ৰী মোদীয়ে আমেৰিকা, ইউৰোপৰ বিভিন্ন দেশ, আফ্ৰিকা আৰু পূব এছিয়া ভ্ৰমণ কৰিছিল। মন্ত্ৰালয়ে জনোৱা মতে ভ্ৰমণৰ সময়ত আতিথ্যৰ অধিকাংশ খৰচ আয়োজক দেশসমূহে বহন কৰে যদিও ভাৰত চৰকাৰে নিৰাপত্তা ব্যৱস্থা, চৰকাৰী প্ৰতিনিধি দল, সংবাদ মাধ্যমৰ দল আৰু অন্যান্য লজিষ্টিক দিশত এই বৃহৎ পৰিমাণৰ ধন ব্যয় কৰিবলগীয়া হয়।
প্ৰধানমন্ত্ৰীৰ সৈতে যোৱা প্ৰতিনিধি দলৰ আকাৰৰ ক্ষেত্ৰতো পৰিৱৰ্তন দেখা গৈছে। ২০১৪ চনৰ পৰা প্ৰধানমন্ত্ৰীৰ লগত যোৱা দলটোত সদস্যৰ সংখ্যা সাধাৰণতে ২৭ৰ পৰা ৭২ জনৰ ভিতৰত আছিল। কিন্তু ২০২৫ চনত পাঁচখন দেশ ভ্ৰমণ কৰা এটা বিশেষ ভ্ৰমণত প্ৰতিনিধি দলটোৰ সদস্য সংখ্যা ৯৫ জনলৈ বৃদ্ধি পাইছিল। ক’ভিড মহামাৰীৰ সময়ছোৱাত এই ভ্ৰমণৰ ব্যয় সৰ্বনিম্ন আছিল যদিও মহামাৰীৰ পিছৰ পৰ্যায়ত দ্বিপাক্ষিক আৰু বহুপক্ষীয় সম্পৰ্ক বৃদ্ধিৰ বাবে ভ্ৰমণৰ খৰচ পুনৰ বৃদ্ধি পাবলৈ ধৰে।
বৈদেশিক পৰিক্ৰমা মন্ত্ৰালয়ে পূৰ্বৰ ইউ পি এ চৰকাৰৰ সৈতেও এই ব্যয়ৰ এক তুলনামূলক চিত্ৰ দাঙি ধৰিছে। তথ্য মতে প্ৰাক্তন প্ৰধানমন্ত্ৰী ড০ মনমোহন সিঙৰ দিনত বিদেশ ভ্ৰমণৰ ব্যয় তুলনামূলকভাৱে বহুত কম আছিল। উদাহৰণস্বৰূপে ২০১১ চনত আমেৰিকা ভ্ৰমণত ১০.৭৪ কোটি আৰু ২০১৩ চনত ৰাছিয়া ভ্ৰমণত ৯.৯৫ কোটি টকা খৰচ হৈছিল। অৱশ্যে বৰ্তমানৰ ব্যয় বৃদ্ধিৰ অন্তৰালত মুদ্ৰাস্ফীতি, বিদেশী মুদ্ৰাৰ মূল্যৰ তাৰতম্য, ভ্ৰমণ কৰা দেশৰ সংখ্যা বৃদ্ধি, দূৰত্ব আৰু নিৰাপত্তাৰ কঠোৰ প্ৰয়োজনীয়তাৰ দৰে কাৰকসমূহ দায়ী বুলি মন্ত্ৰালয়ে স্পষ্ট কৰি দিছে।
