গোৱালপাৰা জিলাৰ কৃষ্ণাই বজাৰত অনুজ্ঞাপত্ৰহীন অটোৰিক্সাৰ বিৰুদ্ধে আৰক্ষী প্ৰশাসনে তীব্ৰ অভিযান চলাইছে৷ অতৰ্কিত এই অভিযান কালত আৰক্ষীয়ে প্ৰায় অৰ্ধ শতাধিক অটোৰিক্সা জব্দ কৰে৷ কৃষ্ণাই আৰক্ষী থানাৰ দায়িত্বত থকা ডিএছপি মৌচুমী দাসৰ নেতৃত্বত চলা এই অভিযানত জব্দ কৰা অটোৰিক্সা সমূহৰ কোনো এখনৰে প্ৰয়োজনীয় নথি-পত্ৰ নথকাৰ লগতে প্ৰায়বোৰ চালকৰে অনুজ্ঞাপত্ৰ নাই বুলিও আৰক্ষী সূত্ৰত প্ৰকাশ৷
অৱশ্যে সমূখত শাৰদীয় দুৰ্গোৎসৱ থকাৰ পৰিপ্ৰেক্ষিতত প্ৰতিখন অটোৰিক্সাৰ বিপৰীতে এহেজাৰ টকাকৈ জৰিমনা আদায় কৰি বাহনসমূহ মোকলাই দিয়ে প্ৰশাসনে৷ জানিব পৰা মতে অতিশীঘ্ৰে নথি-পত্ৰসমূহ ঠিক কৰি নোলোৱা অটোৰিক্সা সমূহৰ বিৰুদ্ধে প্ৰশাসনে পূজাৰ পিছতে কঠোৰ ব্যৱস্থা গ্ৰহণ কৰিব৷
সচেতন মহলে প্ৰশাসনৰ এই প্ৰশংসনীয় কাৰ্যক ধন্যবাদ জনাইছে যদিও আৰক্ষী চকীৰ প্ৰায় কাষতে থকা তেল ডিপোটোৰ সমুখত ৩৭ নম্বৰ ৰাষ্ট্ৰীয় ঘাইপথৰ প্ৰায় ওপৰতে দিনে নিশাই ৰখাই থোৱা ডাঙৰ যান-বাহনৰ বিৰুদ্ধে একো ব্যৱস্থা গ্ৰহণ নকৰাত ক্ষোভ ব্যক্ত কৰিছে৷
এইদৰে নীতি বহিৰ্ভূত ভাবে ৰখাই থোৱা যান বাহন সমূহৰ বাবে কৃষ্ণাই বজাৰত যানজঁটে দেখা দিয়াৰ লগতে দুৰ্ঘটনাৰ আশংকাও বৃদ্ধি কৰিছে৷ উল্লেখ্য যে এই ডিপোটোৰ ঠিক সমুখতে পথৰ উত্তৰ ফালে কৃষ্ণাই হাইস্কুলখন অৱস্থিত হোৱাৰ বাবে বিষয়টোৰ ওপৰত গুৰুত্ব আৰোপ কৰিবলৈ প্ৰশাসনক দাবী জনাইছে অঞ্চলটোৰ ৰাইজে৷