বঙাইগাঁও জিলাৰ কোকিলা আৰক্ষী নিৰীক্ষণ চকীৰ অন্তৰ্গত গোলাপাৰাৰ পৰা এসপ্তাহ মান পূৰ্বে এগৰাকী কিশোৰীক অপহৰণ কৰা হৈছিল। সেই সম্পৰ্কে কোকিলা আৰক্ষীক কিশোৰী গৰাকীৰ পৰিয়ালে দাখিল কৰে এখন এজাহাৰ।
কোকিলা আৰক্ষী নিৰীক্ষণ চকীৰ ভাৰ প্ৰাপ্ত আৰক্ষী বিষয়া হৰগোবিন্দ হালৈয়ে ক্ষীপ্ৰতাৰে ঘটনাটোৰ তদন্ত চলাই থাকে।
অৱশেষত কিশোৰী অপহৰণকাৰীক আৰক্ষীয়ে বুধবাৰে খেদি খেদি কৰায়ত্ত কৰে।
জানিব পৰা মতে, বালাৰচৰৰ জুৰান আলী মণ্ডলৰ পুত্ৰ সাইজুদ্দিন মণ্ডল (২২)য়ে প্ৰায় এসপ্তাহ পূৰ্বে গোলাপাৰাৰ পৰা কিশোৰী গৰাকীক বলপূৰ্বকভাৱে অপহৰণ কৰি লৈ যায়।
কোকিলা আৰক্ষী নিৰীক্ষণ চকীৰ ভাৰপ্ৰাপ্ত আৰক্ষী বিষয়াগৰাকীৰ নেতৃত্বত যোৱা আৰক্ষীৰ দলটোক দেখি পথাৰৰ মাজৰে দৌৰি পলাবলৈ চেষ্টা কৰে অপহৰণকাৰী সাইজুদ্দিনে। পিছত গাঁওৰক্ষী বাহিনীৰ সহযোগত আৰক্ষীয়ে খেদি খেদি কৰায়ত্ত কৰে সাইজুদ্দিনক।
ইপিনে, গোলাপাৰা উচ্চতৰ মাধ্যমিক বিদ্যালয়ৰ নৱম শ্ৰেণীৰ ছাত্ৰী কিশোৰী গৰাকীক অপহৰণ কৰি ঘৰত আৱদ্ধ কৰি যৌন নিৰ্যাতন চলোৱা বুলি কিশোৰীৰ পিতৃয়ে অভিযোগ কৰিছে।
পূৰ্বতেও সাইজুদ্দিনে প্ৰেমৰ ছলনাৰে বিয়া কৰাইছিল আন এগৰাকী কিশোৰীক। পিছত সাইজুদ্দিনক কোকিলাৰ আৰক্ষীয়ে বৃহস্পতিবাৰে কাৰাগাৰালৈ প্ৰেৰণ কৰে।
