এজন এম বি এ ছাত্ৰই নিজৰ শিক্ষাৰ খৰচ বহন কৰিবলৈ কিডনী বিক্ৰী কৰিছিল! কিডনী হেৰুৱাই আৰ্থিকভাৱে প্ৰতাৰিত হৈ আৰক্ষীৰ কাষ চাপিছিল। সেই তথ্যৰ ভিত্তিত কানপুৰ আৰক্ষীয়ে দেশত এটা বিশাল কিডনি সৰবৰাহ চক্ৰৰ সন্ধান লাভ কৰিছে। ৫জন চিকিৎসককে ধৰি মুঠ ৬জন লোকক গ্ৰেপ্তাৰ কৰা হৈছে। আৰক্ষীৰ মতে, কানপুৰ, লক্ষ্ণৌ, দিল্লী, মুম্বাই, কলকাতা আৰু নেপালত এই বিশাল কিডনি সৰবৰাহৰ চক্ৰটো বিয়পি আছে।
আৰক্ষীৰ তথ্য অনুসৰি, ডেৰাডুনৰ এখন প্ৰখ্যাত মহাবিদ্যালয়ৰ চতুৰ্থ ষান্মাসিকৰ এম বি এ ছাত্ৰ এজনে নামভৰ্তি মাচুল দিব নোৱাৰাৰ বাবে কিডনি বিক্ৰী কৰাৰ সিদ্ধান্ত লয়। তেনেকৈয়ে ছ’চিয়েল মিডিয়াত সৰবৰাহ চক্ৰ এটাৰ সৈতে তেওঁৰ যোগাযোগ হ’ল। চুক্তি আছিল যে তেওঁক কিডনিৰ বিনিময়ত ১০ লাখ টকা দিয়া হ’ব। অপাৰেচন কৰি কিডনী উলিওৱাৰ পিছত ছাত্ৰজনক ৫০ হাজাৰ টকা কমকৈ দিয়া হয়। ঠগ খাই ছাত্ৰজনে আৰক্ষীৰ কাষ চাপে।
যুৱকজনৰ দাবী অনুসৰি ৫-৬ মাহ পূৰ্বে তেওঁ টেলিগ্ৰামত কিডনী ডোনাৰ গ্ৰুপৰ সৈতে যোগাযোগ কৰিছিল। তাতে কিডনি বিক্ৰী কৰাৰ ইচ্ছা প্ৰকাশ কৰাত দুজন ডাক্তৰ আফজল আৰু বৈভৱে ছাত্ৰজনক কানপুৰলৈ লৈ আহে। অস্ত্ৰোপচাৰৰ পিছত কিডনীটো লোৱা হৈছিল যদিও চুক্তি অনুসৰি ধন দিয়া হোৱা নাছিল।
আৰক্ষীয়ে ঘটনাৰ তদন্ত কৰি চিকিৎসক দুজনক গ্ৰেপ্তাৰ কৰাৰ পিছতে দেশজুৰি বিয়পি থকা এটা ভয়ংকৰ কিডনি বিক্ৰী চক্ৰৰ তথ্য পোহৰলৈ আহে। জানিব পৰা মতে এই চক্ৰৰ লগত কেইবাজনো চিকিৎসক জড়িত হৈ আছে। অকল এই চক্ৰটোৱে এই পৰ্যন্ত ৪০-৫০ জন লোকৰ কিডনি অবৈধভাৱে সৰবৰাহ কৰিছে।
কানপুৰ আৰক্ষী আয়ুক্ত ৰঘুবীৰ লালে কয়, কেৱল কানপুৰতে নহয়, লক্ষ্ণৌ, দিল্লী, মুম্বাই, কলকাতা আৰু নেপালতো এই চক্ৰ বিয়পি আছে। এই ঘটনাৰ তদন্তৰ বাবে ৰাজ্যৰ স্বাস্থ্য বিভাগৰ বিষয়াসকলৰ সৈতে যৌথ দল গঠন কৰা হৈছে।
আৰক্ষীৰ নিৰীক্ষণত আছে মহানগৰীখনৰ তিনিখন ব্যক্তিগত চিকিৎসালয়, আহুজা হাস্পতাল, প্ৰিয়া হাস্পতাল আৰু মেড লাইফ হাস্পতাল। সাধাৰণ জনতাৰ অসহায়তাৰ সুযোগ লৈ এই চক্ৰটোৱে দীৰ্ঘদিন ধৰি এই কু-কাণ্ড সংঘটিত কৰি আহিছে বুলি আৰক্ষীৰ দাবী।
