পেৰা মিলিটাৰী বাহিনীৰ অধীনত সমগ্র ভাৰততে কাইলৈ আৰক্ষী স্মৃতি দিৱস অনুষ্ঠিত হ’ব। সেই অনুযায়ী গোৱালপাৰা জিলাত থকা চি আৰ পি এফৰ ১৫২ নং বেটেলিয়েনে আজি কৃষ্ণাই হাব্ৰাঘাট হাই স্কুলত ছহিদ মহিবুল ইছলামৰ সোঁৱৰণত আৰক্ষীৰ স্মৃতি দিৱস অনুষ্ঠিত কৰে।
উল্লেখযোগ্য যে ২০০৭ চনৰ ৯ অক্টোবৰত মণিপুৰৰ উখৰুল জিলাত নিৰ্বাচনৰ সময়ত কৰ্তব্যৰত অৱস্থাত থকা সময়তে উগ্ৰপন্থী সংগঠনৰ সৈতে হোৱা সংঘৰ্ষত গোৱালপাৰা জিলাৰ কৃষ্ণাই আৰক্ষী থানাৰ অন্তৰ্গত ভেলাখামাৰ গাঁৱৰ মেৰাজুদ্দিন আলী আৰু জহেৰা বিবিৰ পুত্ৰ চি আৰ পি এফৰ ২৬ নং বেটেলিয়েনৰ মহিবুল ইছলামৰ মৃত্যু হৈছিল।
ছহিদ মহিবুল ইছলামৰ সোঁৱৰণত আজি পুৱা ৯ৰ পৰা ১১ বজালৈ তেওঁ পঢ়া বিদ্যালয়খনত অনুষ্ঠিত স্মৃতি দিৱসৰ লগত সংগতি ৰাখি ছাত্ৰ-ছাত্ৰীসকলৰ মাজত ৰচনা প্ৰতিযোগিতা অনুষ্ঠিত হোৱাৰ লগতে বিদ্যালয়খনৰ পৰা সুখ্যাতিৰে উত্তীৰ্ণ ৬ গৰাকী ছাত্ৰ-ছাত্ৰীক পুৰস্কাৰ প্ৰদান কৰা হয়। তদুপৰি সভাত মহিবুলৰ পিতৃ-মাতৃক চি আৰ পি এফৰ দ্বাৰা উপহাৰ প্ৰদান কৰা হয়।
আজিৰ সভাত মুখ্য অতিথি হিচাপে উপস্থিত থাকি গোৱালপাৰাৰ আৰক্ষী অধীক্ষক অমিতাভ সিংহাই ভাষণ প্ৰসংগত কাইলৈ অসম পুলিচৰ দ্বাৰা বগুৱান উচ্চ মাধ্যমিক বিদ্যালয়ত আৰক্ষী স্মৃতি দিৱস পালন কৰা হ’ব বুলি জানিবলৈ দিয়ে।
উল্লেখযোগ্য যে ২০১৬ চনত কৃষ্ণাইৰ এক ভিতৰুৱা অঞ্চলত আলফাৰ সৈতে হোৱা সংঘৰ্ষত বগুৱান গাঁৱৰ সপোন কুমাৰ নাথ নামৰ কামণ্ড’ বেটেলিয়েনৰ এজন জোৱানৰ মৃত্যু হৈছিল।
ছহিদ সপোন কুমাৰ নাথৰ স্মৃতিত তেওঁ পঢ়া বগুৱান উচ্চ মাধ্যমিক বিদ্যালয়তে কাইলৈ এই দিৱস উদযাপন কৰাৰ কথা সদৰী কৰি সিংহাই লগতে ছহিদ নাথৰ স্মৃতিত আৰু তেওঁৰ নামত অসম পুলিচে এটা লাইব্ৰেৰী গৃহ প্ৰদান কৰাৰ কথা প্ৰকাশ কৰে।
আজিৰ সভাত হাব্ৰাঘাট হাই স্কুলৰ প্ৰধান শিক্ষক মুষ্টাক আহমেদ, চি আৰ পি এফৰ দ্বিতীয় সেনা বিষয়া পি কে সিং, সেনা বিষয়া নিথ্যানন্দ চাবি, কৃষ্ণাই আৰক্ষী থানাৰ বিষয়া টি বড়ো, বিদ্যালয়খনৰ শিক্ষক-শিক্ষয়িত্ৰীৰ উপৰি স্থানীয় বহু লোক উপস্থিত থাকে।