পাটনাত ক’চিং চেন্টাৰৰ সংঘাতক কেন্দ্ৰ কৰি সৃষ্টি হোৱা এক উত্তপ্ত পৰিস্থিতিৰ পিছত বিখ্যাত শিক্ষক ফৈজল খান চমুকৈ খান চাৰৰ বিৰুদ্ধে আৰক্ষীয়ে গোচৰ ৰুজু কৰিছে। যোৱা ২ জুনৰ নিশা পাটনাৰ কদমকুৱান থানা অঞ্চলত থকা খান গ্লোবেল ষ্টাডিজ নামৰ ক’চিং প্ৰতিষ্ঠানখনৰ সন্মুখত একাংশ লোকে উপদ্ৰৱ চলাই শিলগুটি নিক্ষেপ কৰাৰ লগতে ভাঙি-ছিঙি লণ্ডভণ্ড কৰে। এই ঘটনাৰ পিছতে পৰিস্থিতি অধিক ভয়াৱহ হৈ পৰে আৰু তাত গুলী চালনাৰ দৰে ঘটনাও সংঘটিত হয়। সমগ্ৰ ঘটনা সন্দৰ্ভত পাটনা আৰক্ষীয়ে খান চাৰ আৰু আন দুজন ব্যক্তিৰ বিৰুদ্ধে এজাহাৰ দাখিল কৰিছে।
আৰক্ষীৰ সূত্ৰই প্ৰকাশ কৰা অনুসৰি, ২ জুনৰ নিশা প্ৰায় ১০:১০ বজাত এই আক্ৰমণৰ ঘটনাটো ঘটিছিল। ঘটনাৰ পিছতে আৰক্ষীয়ে তদন্ত আৰম্ভ কৰে আৰু এটা ভিডিঅ’ উদ্ধাৰ কৰে, য’ত ক’চিং চেন্টাৰটোৰ দুজন নিৰাপত্তাৰক্ষীক শূন্যলৈ গুলী চলোৱা দেখা গৈছিল। এই ভিডিঅ’টোৰ আধাৰতে আৰক্ষীয়ে প্ৰতিষ্ঠানখনৰ সৈতে জড়িত দুজন নিৰাপত্তাৰক্ষীক গ্ৰেপ্তাৰ কৰিছে আৰু তেওঁলোকৰ হাতৰ পৰা অস্ত্ৰ-শস্ত্ৰসমূহ জব্দ কৰি ফৰেনছিক পৰীক্ষাগাৰলৈ প্ৰেৰণ কৰিছে। সমগ্ৰ ঘটনাক উচতনি দিয়াৰ অভিযোগত ভাৰতীয় ন্যায় সংহিতা আৰু অস্ত্ৰ আইনৰ অধীনত খান চাৰৰ বিৰুদ্ধে এই গোচৰ ৰুজু কৰা হৈছে। এই সংঘাতৰ সময়ত এজন নিৰাপত্তাৰক্ষী আহত হয় আৰু তেওঁক চিকিৎসালয়ত ভৰ্তি কৰোৱা হয়।
এই ঘটনাৰ পিছদিনা অৰ্থাৎ ৩ জুনত ক’চিং চেন্টাৰটোৰ সন্মুখত সহস্ৰাধিক ছাত্ৰ-ছাত্ৰী সমবেত হৈ প্ৰতিবাদ সাব্যস্ত কৰে। ছাত্ৰ-ছাত্ৰীসকলে নিজৰ নিৰাপত্তা আৰু ন্যায়ৰ দাবীত বিভিন্ন শশ্লোগান দিয়ে, যাৰ ফলত অঞ্চলটোত তীব্ৰ উত্তেজনাময় পৰিস্থিতিৰ সৃষ্টি হয়। পৰিস্থিতি নিয়ন্ত্ৰণ কৰিবলৈ অঞ্চলটোত বৃহৎ সংখ্যক নিৰাপত্তাৰক্ষী মোতায়েন কৰিবলগীয়া হয়। আনহাতে পাটনা আৰক্ষীয়ে ছাত্ৰ সমাজক ক’চিং প্ৰতিষ্ঠানসমূহৰ মাজত থকা ব্যৱসায়িক প্ৰতিযোগিতা বা শত্ৰুতাৰ বলি নহ’বলৈ আৰু কাৰো উচতনিত ভোল নাযাবলৈ আহ্বান জনাইছে। অপৰাধ নিয়ন্ত্ৰণ আৰু আইন-শৃংখলা ৰক্ষাৰ ক্ষেত্ৰত কোনো ধৰণৰ আপোচ কৰা নহ’ব বুলিও আৰক্ষীয়ে স্পষ্ট কৰি দিছে।
