যোৱা বুধবাৰে নিশা জুবিন গাৰ্গক আক্ৰমণৰ চেষ্টা চলোৱা ঘটনাৰ মূল অভিযুক্ত হীৰকজ্যোতি ৰাজবংশীক আৰক্ষীয়ে গ্ৰেপ্তাৰ কৰিছে।
বৃহস্পতিবাৰে মহানগৰ আৰক্ষীয়ে হীৰকজ্যোতিক গ্ৰেপ্তাৰ কৰে।
আনহাতে, জুবিন গাৰ্গক আক্ৰমণ কৰাৰ ঘটনাত জড়িত থকাৰ অভিযোগ উত্থাপনৰ পাছতে NSUIয়ে হীৰকজ্যোতিক সংগঠনটোৰ পৰা অপসাৰণ কৰিছে।
জুবিন গাৰ্গে বুধবাৰে নিশাই দাখিল কৰা এজাহাৰৰ ভিত্তিত মহানগৰ আৰক্ষীয়ে হীৰকজ্যোতি ৰাজবংশীক কৰায়ত্ত কৰিবলৈ ব্যাপক অভিযান চলাইছিল।
উল্লেখ্য যে বুধবাৰে নিশা ষ্টুডিঅ’ত গান ৰেকৰ্ডিং কৰি কাহিলিপাৰাৰ বাসগৃহলৈ উভতি অহাৰ পথতে গণেশগুৰিৰ গণেশ মন্দিৰৰ সন্মুখত জুবিনক ৬ জন দুৰ্বৃত্তই আক্ৰমণৰ চেষ্টা চলাইছিল।
ঘটনা বিবৰণী অনুসৰি গণেশ মন্দিৰৰ সমীপত ৰাজপথত কাম কৰি থকা শ্ৰমিকক অশালীন গালি-গালাজ কৰি আছিল সুৰামত্ত ৬ জন যুৱকে৷
সেই সময়তে সেই ঠাইৰে পাৰ হৈ গৈছিল জুবিন গাৰ্গ৷
জুবিনে গাড়ী ৰখাই যুৱককেইজনক বাধা দিবলৈ চেষ্টা কৰোঁতে যুৱকেইজনে জুবিনক আক্ৰমণ কৰিবলৈ আগবাঢ়ি আহে।
আনকি জুবিনক বহু অশ্ৰাব্য ভাষা প্ৰয়োগ কৰি গালি-গালাজ কৰে যুৱককেইজনে।
নিশা প্ৰায় ১২:৪০ বজাত এই ঘটনা সংঘটিত হোৱা বুলি এজাহাৰত উল্লেখ কৰিছিল জুবিনে।
এজাহাৰত জুবিনে উল্লেখ কৰা অনুসৰি দুৰ্বৃত্তৰ দলটো AS-01BY-0675 নম্বৰৰ গাড়ীত আহিছিল৷
জুবিনক আক্ৰমণৰ চেষ্টা কৰা যুৱক অহা গাড়ীখনৰ সৈতে আছিল গাড়ীখনৰ গৰাকী হীৰক ৰাজবংশী। AS 01BY 0675 নম্বৰৰ গাড়ীখনত দুৰ্বৃত্ত অহা বুলি এজাহাৰত উল্লেখ কৰিছিল জুবিনে।
জে বি আইন মহাবিদ্যালয়ত অধ্যয়নৰত হীৰকজ্যোতি ৰাজবংশী কামৰূপ মহানগৰ NSUI ৰ উপ সভাপতি আছিল।