উত্তৰ লখিমপুৰ পৌৰ পৰিষদৰ এগৰাকী সহকাৰী অভিযন্তাক ২০ লাখ টকাৰ বিত্তীয় খেলিমেলি কৰাৰ অপৰাধত আৰক্ষীয়ে গ্ৰেপ্তাৰ কৰিছে। উত্তৰ লখিমপুৰ দৈনিক বজাৰৰ প্ৰথম মহলাত এটা সেৱা কেন্দ্ৰ নিৰ্মাণ সমিতিৰ সম্পাদকৰ দায়িত্বত আছি পৰাগ দত্ত নামৰ সহকাৰী অভিযন্তাগৰাকী। অতিৰিক্ত উপায়ুক্ত তথা উত্তৰ লখিমপুৰ পৌৰ পৰিষদৰ কাৰ্যবাহী বিষয়া দেবাশিষ গোস্বামীৰ গোচৰৰ ভিত্তিত ভাৰতীয় দণ্ডবিধিৰ ৪২০, ৪০৯, ৩৪ ধাৰা অনুসৰি পঞ্জীয়ন হোৱা ১১০৮/২০১৮ গোচৰৰ ভিত্তিত আৰক্ষীয়ে তেওঁক গ্ৰেপ্তাৰ কৰিছে। পৌৰ পৰিষদখনৰ তদানিন্তন সভাপতি জিতেন গগৈকো দোষী সাব্যস্ত কৰা হৈছে তেওঁ বৰ্তমান পলাতক অৱস্থাত আছে।
উল্লেখ্য যে ২০১৩-১৪ চনত উত্তৰ লখিমপুৰ পৌৰ পৰিষদে উত্তৰ লখিমপুৰ দৈনিক বজাৰৰ প্ৰথম মহলাত ২০ লাখ টকা ব্যয়সাপেক্ষে এটা সেৱা কেন্দ্ৰ নিৰমাণ কৰিছিল কিন্তু আজিকো পতি তাক ব্যৱহাৰ নকৰাকৈ পেলাই থৈ দিছে।
উত্তৰ লখিমপুৰ পৌৰ পৰিষদ চহৰখনৰ দৈনন্দিনৰ বিভিন্ন খেলিমেলিৰ বাবে দায়ী বুলিও ইতিমধ্যে প্ৰতীয়মান হৈছে। পৰিষদখনে ঠায়ে ঠায়ে অপৰিকল্পিত নিৰ্মাণৰ বাবে দিয়া অনুজ্ঞাৰ বাবে ইয়াৰ বাসিন্দাসকল ভুগিবলগীয়া হৈছে।
বাণিজ্যিক নিৰ্মাণসমূহ পৌৰ পৰিষদৰ অনুমতিতেই জধে-মধে নিৰ্মাণ কৰা হৈছে। বেমেজালী আঁতৰোৱাৰ বাবে প্ৰাথমিকভাৱে আইন বলৱৎ কৰাৰ বাবেও পৌৰ পৰিষদত কোনো তাই তাৰ পৰিৱৰ্তে নিৰ্বাচিত প্ৰতিনিধিসকলে ৰাজনৈতিক লাভালাভৰ অংকতহে অধিক আগ্ৰহী। নলা-নৰ্দমাবোৰ উন্মুক্ত হৈ থাকে। আনকি উপায়ুক্তৰ কাৰ্যালয়ৰ ওচৰতে গাহৰিৰ পাম থকাটোৱে নাগৰিক সভাখনৰ অমনোযোগিতাকেই দেখুৱায়।
চহৰখনত ৰাজহুৱা পৰিবহণৰ বাছ আৰু অন্যন্য যান-বাহনসমূহ য’তে ত’তে ৰখোৱা দেখা যায়। ব্যক্তিগত বাহনসমূহো চহৰখনৰ য’তে ত’তে পাৰ্ক কৰি থোৱা দেখা যায়।
এই সকলোবোৰৰ বাবে উত্তৰ লখিমপুৰ চহৰ ইয়াৰ বাসিন্দাসকলৰ বাবে বিপজ্জনক হৈ পৰিছে। যিহেতু চহৰখনত অভিভাৱকহীনতা দেরা গৈছে সেয়েহে সংশ্লিষ্ট কৰ্তৃপক্ষই এই বিষয়ত হস্তক্ষেপ কৰাৰ এয়াই প্ৰকৃষ্ট সময়।