আজি পুৱাৰ পৰা পঞ্চায়ত নিৰ্বাচনৰ প্ৰথম পৰ্য্যায়ৰ ভোটগ্ৰহণ আৰম্ভ হৈছে। ৰাজ্যৰ মুঠ ১৬খন জিলাৰ বিভিন্ন ঠাইত এই ভোটগ্ৰহণ প্ৰক্ৰিয়া চলি আছে।
মুঠ ১৪,০৭৭টা কেন্দ্ৰত এই ভোটগ্ৰহণ সম্পন্ন হ’ব। ৰাজ্যিক নিৰ্বাচনী বিষয়াৰ কাৰ্য্যালয়ৰ তথ্যমতে, এই পৰ্য্যায়ৰ ভোটগ্ৰহণত মুঠ ৪৩,৫১৫গৰাকী প্ৰাৰ্থীয়ে প্ৰতিদ্বন্দ্বিতা কৰিছে।
মুঠ ভোটাৰৰ সংখ্যা ৯১,১৯,৯৩৮গৰাকী। ইয়াৰে পুৰুষ ভোটাৰ ৪৭,৪৬,৮২১জন আৰু মহিলা ভোটাৰ ৪৪,৭৩,১১৭গৰাকী। প্ৰথম পৰ্য্যায়ৰ ভোটকেন্দ্ৰবোৰৰ ভিতৰত মুঠ ১৭৯৯টাক অতি স্পৰ্শকাতৰ আৰু ৫,১৬২টা কেন্দ্ৰক স্পৰ্শকাতৰ বুলি গণ্য কৰা হৈছে।
এইবাৰৰ পঞ্চায়ত নিৰ্বাচনৰ অন্যতম বিশেষত্ব হৈছে যে পঞ্চায়ত নিৰ্বাচনৰ বাবেও ৰাজ্যৰ শাসকীয় দল বিজেপিয়ে অতি ব্যয়বহুল প্ৰচাৰত নমাটো। দলটোৱে এইবাৰ নিৰ্বাচনী প্ৰচাৰৰ বাবে হেলিকপ্টাৰ ব্যৱহাৰ কৰিছে, যিটো ৰাজ্যৰ বাবেই প্ৰথম উদাহৰণ। নাগৰিকত্ব সংশোধনী বিধেয়ক বিৰোধী ঢৌৰ বাবে শংকাত থকা বিজেপি এইবাৰ নিৰ্বাচনী প্ৰচাৰত আনবোৰ দলতকৈ আগ বাঢ়ি থকা পৰিলক্ষিত হ’ল। ইমান জোৰদাৰ প্ৰচাৰ চলোৱাৰ পিছত নিৰ্বাচনৰ ফল আশানুৰূপ নহ’লে দলটোৰ বাবে নিশ্চয়কৈ এটা লাজৰ কথা হ’ব।
আনহাতে কংগ্ৰেছ আৰু অগপৰ বাবেও এই নিৰ্বাচন সন্মানৰ প্ৰশ্ন হৈ পৰিছে। ৰাজ্যত নাগৰিকত্ব সংশোধনী বিধেয়ক আৰু অন্যান্য প্ৰতিষ্ঠান বিৰোধী ঢৌ সত্ত্বেও যদি ৰাইজে পুনৰ কংগ্ৰেছৰ কাষ নাচাপে, ৰাজ্যখনত দলটোৰ ভৱিষ্যৎ প্ৰায় অস্পষ্ট হৈ পৰিব।
একেদৰে ৰাজ্যত মিত্ৰতাৰে চৰকাৰত থকা কিন্তু সুকীয়াকৈ পঞ্চায়ত নিৰ্বাচন খেলা অগপৰ প্ৰতি মানুহৰ সমৰ্থনেও প্ৰমাণ কৰিব আঞ্চলিকতা আৰু জাতীয়তাবাদৰ প্ৰতি মানুহৰ আস্থা কিমান। পঞ্চায়ত নিৰ্বাচনত অগপই সন্মানজনক অৱস্থানত উপনীত হ’ব নোৱাৰিলে বিজেপিৰ ওচৰত তেওঁলোক অধিক সৰু হৈ যাব যে খাটাং।