পঞ্জাৱৰ অমৃতসৰত সংঘটিত হৈছে এক অতি মৰ্মান্তিক তথা চাঞ্চল্যকৰ ঘটনা। দিন দুপৰতে আততায়ীৰ গুলীত প্ৰাণ হেৰুৱালে পঞ্জাৱৰ জনপ্ৰিয় মেকআপ আৰ্টিষ্ট তথা ছ’চিয়েল মিডিয়াৰ প্ৰভাৱশালী মেডী সান্ধুৱে।
স্থানীয় সংবাদ মাধ্যমৰ সূত্ৰ অনুসৰি অমৃতসৰ চহৰৰ ব্যস্ত এলেকাত তেওঁক অতৰ্কিত আক্ৰমণ কৰি গুলীবৰ্ষণ কৰা হয়। গুৰুতৰভাৱে আহত অৱস্থাত তেওঁক উদ্ধাৰ কৰা হয় যদিও বচাব পৰা নগ’ল।
ছচিয়েল মিডিয়াত অতি জনপ্ৰিয় আৰু পৰিচিত মুখ আছিল মেডী সান্ধু। তেওঁৰ মেকআপ টিউটৰিয়েল আৰু ৰিলে হাজাৰ হাজাৰ অনুৰাগীৰ হৃদয় জয় কৰিছিল। হঠাৎ সমগ্ৰ চহৰখনতে তেওঁৰ ওপৰত এই মাৰাত্মক আক্ৰমণৰ খবৰ পোহৰলৈ অহাৰ লগে লগে স্থানীয় বাসিন্দা আৰু ছ’চিয়েল মিডিয়া জগতত শোকৰ ছাঁ পৰে।
ঘটনাৰ খবৰ পোৱাৰ পিছতে স্থানীয় আৰক্ষী প্ৰশাসনে তদন্ত আৰম্ভ কৰিছে। আক্ৰমণকাৰী কোন আৰু কি উদ্দেশ্য আছিল সেয়া এতিয়াও স্পষ্ট হোৱা নাই। অঞ্চলটোৰ চিচিটিভি ফুটেজ পৰীক্ষা কৰি প্ৰত্যক্ষদৰ্শীক সোধা-পোছা কৰা হৈছে। আৰক্ষীয়ে জনোৱা মতে, ঘটনাৰ মূল কাৰণ উদ্ঘাটন কৰিবলৈ সবিশেষ তথ্য জানিবলৈ চেষ্টা অব্যাহত আছে।
পঞ্জাৱৰ সংগীত আৰু মনোৰঞ্জনৰ জগতখনত বন্দুকধাৰীৰ আক্ৰমণ আৰু নৃশংস হত্যাকাণ্ডই কেইবাবাৰো শিৰোনাম দখল কৰিছে। ইয়াৰে আটাইতকৈ মৰ্মান্তিক আৰু চৰ্চিত হৈছে সিদ্ধু মুছেৱালাৰ হত্যাকাণ্ড। ২০২২ চনৰ ২৯ মে’ত পঞ্জাৱৰ মানছা জিলাত দিনৰ পোহৰতে তেওঁক নিৰ্মমভাৱে গুলীয়াই হত্যা কৰা হৈছিল। লৰেন্স বিষ্ণোই আৰু কানাডাস্থিত গেংষ্টাৰ গোল্ডি ব্ৰাৰৰ দলটোৱে এই হত্যাকাণ্ডৰ দায়িত্ব স্বীকাৰ কৰিছে।
ইয়াৰ লগতে কিংবদন্তি পাঞ্জাবী পপ গায়ক অমৰ সিং চামকিলা আৰু তেওঁৰ পত্নী অমৰজোতক ১৯৮৮ চনৰ ৮ মাৰ্চত মেহছামপুৰ গাঁৱত অনুষ্ঠানলৈ গৈ থকা অৱস্থাত মটৰ চাইকেলত অহা অচিনাক্ত বন্দুকধাৰীয়ে গুলীয়াই হত্যা কৰে। এই হত্যাকাণ্ডৰ অমীমাংসিত ৰহস্যৰ আজিও চৰ্চা চলি আছে। শেহতীয়াকৈ এই হত্যাকাণ্ডক লৈ এখন চিনেমা নিৰ্মাণ কৰা হৈছিল, য’ত নাম ভূমিকাত অভিনয় কৰিছিল দিলজিৎ দোছাঞ্জে।
