বুধবাৰে অনুষ্ঠিত ফিফা বিশ্বকাপৰ এখন গুৰুত্বপূৰ্ণ মেচত ডি আৰ কংগোৰ বিৰুদ্ধে ১-১ গ‘লত ড্ৰ খেলি পৰ্তুগালে হতাশাজনকভাৱে নিজৰ অভিযান আৰম্ভ কৰিছে। মেচখনৰ প্ৰথমভাগতেই পৰ্তুগালে অগ্ৰগতি লাভ কৰিছিল যদিও প্ৰতিৰক্ষণ বিভাগৰ দুৰ্বলতাৰ সুযোগ লৈ কংগোৱে সমতা স্থাপন কৰে। এই মেচখনৰ পাছতেই ৪১ বছৰীয়া অধিনায়ক ক্ৰিষ্টিয়ানো ৰোনাল্ডোৰ দুৰ্বল প্ৰদৰ্শন আৰু সমগ্ৰ মেচখনত তেওঁক খেলোৱাক লৈ প্ৰশিক্ষক ৰবাৰ্তো মাৰ্টিনেজৰ সিদ্ধান্ত সন্দৰ্ভত তীব্ৰ প্ৰশ্নৰ উত্থাপন হৈছে।
মেচখনৰ ষষ্ঠ মিনিটতেই পেদ্ৰ‘ নেট‘ৰ এক ক্ৰছৰ পৰা অহা বলত নিখুঁত হেডাৰেৰে জোৱাও নেভেছে গ‘ল দি পৰ্তুগালক অগ্ৰগতি প্ৰদান কৰিছিল। কিন্তু কংগোৱে নিজৰ প্ৰতিৰক্ষণ কটকটীয়া কৰি আক্ৰমণাত্মক কৌশল গ্ৰহণ কৰে। ইয়াৰ পৰিণতিত সোঁফালৰ পৰা অহা এক ক্ৰছত য়োয়ান উইছাই হেডাৰেৰে গ‘ল দি কংগোৰ হৈ সমতা স্থাপন কৰে। এই গ‘লটোৰ সময়ত পৰ্তুগালৰ প্ৰতিৰক্ষণ বিভাগৰ খেলুৱৈ ৰেনাটো ভেগা আৰু টমাছ আৰাউহোৰ মাজত বুজাবুজিৰ অভাৱ পৰিলক্ষিত হয়। এই দুৰ্বলতাৰ সময়ত ভিআইপি বক্সত উপস্থিত থকা প্ৰাক্তন তাৰকা ডিফেণ্ডাৰ পেপে আৰু ডাগআউটত থকা ৰিকাৰ্ডো কাৰ্ভালহোৱে নিজৰ দলৰ এনে অৱস্থা প্ৰত্যক্ষ কৰিবলগীয়া হয়।
সমসাময়িক তাৰকা খেলুৱৈ লিঅ‘নেল মেছিয়ে হেট্ৰিক অৰ্জন কৰাৰ লগতে আৰ্লিং হালান্দ আৰু কিলিয়ান এমবাপ্পেই নিজৰ প্ৰথমখন মেচতেই গ‘ল দিয়াৰ বিপৰীতে ৰোনাল্ডোৱে দৰ্শকক নিৰাশ কৰে। সমগ্ৰ মেচখনত অংশগ্ৰহণ কৰিও তেওঁ কোনো সুন্দৰ সুযোগ সৃষ্টি কৰিব নোৱাৰিলে বা আন খেলুৱৈয়ে সৃষ্টি কৰা সুযোগৰ সদ্ব্যৱহাৰ কৰিবলৈ সক্ষম নহ‘ল। দ্বিতীয়ার্ধত বদলি খেলুৱৈ হিচাপে পথাৰত প্ৰৱেশ কৰা ফ্ৰান্সিস্কো কনচেইকাওৱে দুটাকৈ সুন্দৰ পাছ দিয়াৰ পাছতো ৰোনাল্ডোৱে বলটো সঠিকভাৱে নিয়ন্ত্ৰণ কৰিব নোৱাৰি মাটিত বাগৰি পৰে। বয়সৰ বাবে উইঙত দ্ৰুতগতিত দৌৰিব নোৱাৰা ৰোনাল্ডোৱে বিপক্ষৰ পৰা বল কাঢ়ি অনাৰ ক্ষেত্ৰতো কোনো প্ৰয়াস নকৰাত খেলপথাৰত পৰ্তুগালে দহজন খেলুৱৈৰে খেলা যেন অনুভৱ হৈছিল।
আনহাতে, কংগোৰ দীৰ্ঘকায় ডিফেণ্ডাৰসকলৰ বাবে পৰ্তুগালে এৰিয়েল বলৰ জৰিয়তে আক্ৰমণ কৰাত বাধাৰ সন্মুখীন হৈ চুটি কৰ্ণাৰ ল‘বলৈ বাধ্য হৈছিল যদিও সফল হ‘ব পৰা নাছিল। ব্ৰুনো ফাৰ্ণাণ্ডেজ, বাৰ্নাৰ্ডো চিলভা আৰু ভিটিনহাৰ দৰে তাৰকাৰে গঠিত পৰ্তুগালৰ মিডফিল্ডৰ মাজতো মেচখনত কোনো পাৰস্পৰিক বুজাবুজি দেখা নগ‘ল। সমগ্ৰ মেচখনত পৰিশ্ৰম কৰি সুযোগ সৃষ্টিৰ প্ৰয়াস কৰা ভিটিনহাক মেচৰ শেষৰ ফালে উঠাই অনা হয়, কিন্তু দুৰ্বল প্ৰদৰ্শনৰ পাছতো ৰোনাল্ডোক খেলপথাৰত ৰখা হয়। ইয়াৰ উপৰি, পূৰ্বৰ বিশ্বকাপত হেট্ৰিক কৰা গন্সালো ৰামোছক মেচৰ একেবাৰে শেষ মুহূৰ্তত নমোৱা আৰু সৃষ্টিশীল মিডফিল্ডাৰ জোৱাও ফেলিক্সক সুযোগ নিদিয়াৰ বাবে প্ৰশিক্ষক মাৰ্টিনেজৰ দল নিৰ্বাচনক লৈ সমালোচনা আৰম্ভ হৈছে।
প্ৰথমখন মেচত জয়লাভৰ পৰা বঞ্চিত হোৱাৰ পাছত পৰ্তুগাল দলটোৰ লগতে প্ৰশিক্ষক মাৰ্টিনেজ বৰ্তমান যথেষ্ট হেঁচাৰ সন্মুখীন হৈছে। কাটাৰ বিশ্বকাপৰ পাছত ৰোনাল্ডোক মূল একাদশত নৰখাৰ বাবে ইগোৰ সংঘাতৰ সন্মুখীন হৈ প্ৰাক্তন প্ৰশিক্ষক ফাৰ্ণাণ্ডো চাণ্ট‘ছে চাকৰি হেৰুৱাব লগা হৈছিল। পৰ্তুগালৰ বৰ্তমানৰ এই সোণালী প্ৰজন্মই যদি আগন্তুক মেচসমূহত উন্নত প্ৰদৰ্শন কৰাত ব্যৰ্থ হয়, তেন্তে মাৰ্টিনেজেও চাণ্ট‘ছৰ দৰেই পৰিস্থিতিৰ সন্মুখীন হোৱাৰ সম্ভাৱনা আছে। বৰ্তমান পৰৱৰ্তী মেচৰ বাবে দলটোৰ ৰণনীতি কি হ‘ব, সেয়া ক্ৰীড়াপ্ৰেমীসকলৰ বাবে লক্ষণীয় হৈ পৰিছে।
