ইণ্ডিয়ান প্ৰিমিয়াৰ লীগ (আই পি এল) মানেই এক জুৱাৰ বজাৰ। আই পি এলৰ প্ৰতিখন মেচৰ নামত কোটি কোটি টকাৰ জুৱাৰ বেহা বহে। এই বেহাত ভাগ লৈ কোনোবা নিশাটোৰ ভিতৰতে হৈ পৰে ধনকুবেৰ, আন কোনোবাৰ আকৌ উদং হয় পকেটৰ তলি।
এনেদৰেই আই পি এলত বাজি লগাই মূৰে কঁপালে হাত দিব লগীয়া হৈছে এজন পোষ্টমাষ্টৰে। কেৱল পোষ্টমাষ্টৰেই নহয়, তেওঁৰ লগতে মূৰত সৰগ সৰি পৰিছে ২৪ টা পৰিয়ালৰ। কিন্তু কিয় এজন পোষ্টমাষ্টৰৰ দুখৰ সমভাগী হৈছে এই পৰিয়াল সমূহ? জানিলে আচৰিত হ’ব আপুনিও।
দৰাচলতে মধ্য প্ৰদেশৰ এই পোষ্টমাষ্টাৰ জনে আই পি এলত বাজি লগাই হেৰুৱাইছে ১ কোটি টকা। কিন্তু এই হেৰুওৱা টকাখিনি পোষ্টমাষ্টৰ জনৰ নিজৰ নাছিল। ২৪ টা পৰিয়ালে সঞ্চয়ৰ বাবে জমা দিয়া ধনৰাশিহে আছিল এইয়া।
এই পৰিয়ালসমূহৰ ধন সাগৰ জিলাৰ এটা উপ ডাকঘৰত জমা কৰিব লাগিছিল। কিন্তু পোষ্টমাষ্টৰ জনে এই ধনৰাশি ডাকঘৰত জমা দিয়াৰ পৰিৱৰ্তে জুৱাত বিনিয়োগ কৰে আৰু জুৱাত হাৰি গোটেই টকাখিনি হেৰুৱাই পেলায়।
বিনা উপ-ডাকঘৰৰ এই বিশাল আহিৰৱাৰ নামৰ পোষ্টমাষ্টৰ জনক ইতিমধ্যে ২০ মে’ত বিনা চৰকাৰী ৰেল আৰক্ষীয়ে গ্ৰেপ্তাৰ কৰিছে। তেওঁ এই অপৰাধৰ বিষয়ে আৰক্ষীৰ ওচৰত নিজেই স্বীকাৰ কৰিছে।
আৰক্ষীয়ে জানিবলৈ দিয়া মতে অভিযুক্ত পোষ্টমাষ্টৰজনে ভুৱা এফডি একাউণ্টৰ বাবে প্ৰকৃত পাছবুক জাৰী কৰিছিল আৰু যোৱা দুবছৰৰ পৰা আই পি এল ক্ৰিকেট বেটিংত সম্পূৰ্ণ ধন বিনিয়োগ কৰিছিল।
“ধৃত বিশাল আহিৰৱাৰৰ বিৰুদ্ধে আইপিচিৰ ধাৰা ৪২০ আৰু ৪০৮ ৰ অধীনত গোচৰ ৰুজু কৰা হৈছে। পৰৱৰ্তী সময়ত অনুসন্ধানৰ ফলাফলৰ ওপৰত ভিত্তি কৰি গোচৰটোত অধিক শাখা যোগ কৰিব পাৰি।” বিনা-জিআৰপি আৰক্ষী থানাৰ ভাৰপ্ৰাপ্ত বিষয়া অজয় ধুৰ্ভেই কয়।