লকডাউনৰ বাবে যোৰহাট জিলাৰ টীয়কৰ কলিয়াপানীস্থিত নিৰ্মিয়মান ১৩২ কে ভি বৈদ্যুতিক উপ কেন্দ্ৰৰ কামত নিয়োজিত হৈ থকা শ্ৰমিক সকলৰ মাজত পাৱাৰ গ্ৰীডে নিজৰ দায়িত্ব স্বীকাৰ কৰি খাদ্য সামগ্ৰী বিতৰণ কৰিছে।
পাৱাৰ গ্ৰীডৰ জ্যেষ্ঠ উপ প্ৰবন্ধক এচ এন দেৰ নেতৃত্বত আনুষ্ঠানিকভাৱে এই সামগ্ৰী সমূহ বিতৰণ কৰা হৈছে। প্ৰায় ৪৫ জনৰো অধিক অসম তথা ভাৰতৰ বিভিন্ন প্ৰান্তৰ শ্ৰমিকে এই গ্ৰীডত কৰ্মৰত হৈ আছিল।
লকডাউনৰ ফলত কাম চলা নাই যদিও ঘৰলৈ যাব নোৱাৰাৰ বাবে আজিলৈকে এই শ্ৰমিকসকল সেই স্থানতে থাকিবলগীয়া হৈছে। সেয়ে চৰকাৰে তেনে শ্ৰমিকসকলৰ বাবে ঘোষণা কৰা বিভিন্ন আঁচনিলৈ বাট নাচাই পাৱাৰ গ্ৰীড কৰ্তৃপক্ষই প্ৰতিজন শ্ৰমিকৰ বাবে প্ৰয়োজনীয় খাদ্য সামগ্ৰী যোগান ধৰি আহিছে আৰু সেয়া কৰ্তৃপক্ষৰ নিজৰ দায়িত্ব বুলি মন্তব্য কৰিছে।
লগতে চৰকাৰী নীতি নিৰ্দেশনা অৱলম্বন কৰি সামাজিক দূৰত্ব বৰ্তাই সকলো শ্ৰমিককে নিজ নিজ স্থানতে লকডাউন চলি থকা পৰ্যন্ত অৱস্থান কৰিবলৈ আহ্বান জনাইছে।