টকিঅ’ অলিম্পিকত ব্ৰঞ্জৰ পদক বিজয়ী ভাৰতীয় পুৰুষ হকী দলৰ অভিজ্ঞ গ’লৰক্ষক পি আৰ শ্ৰীজীশে তেওঁৰ ২০২১ চনৰ প্ৰদৰ্শনৰ বাবে ৱৰ্ল্ড গেমচ্ এথলীট অৱ দ্য ইয়েৰ সন্মান অৰ্জন কৰিছে।
এই সন্মান লাভ কৰা কেৱল দ্বিতীয় গৰাকী ভাৰতীয় হিচাপে পৰিগণিত হয় শ্ৰীজেশ। ইয়াৰ পূৰ্বে ২০১৯ বৰ্ষত ভাৰতৰ মহিলা হকী দলৰ অধিনায়ক ৰাণী ৰামপালে এই সন্মান লাভ কৰিছিল।
TheWorldGames.org ত বিশ্বব্যাপী অনুৰাগীৰ ভোটৰ ভিত্তিত শ্ৰীজেশে ২৪ গৰাকী খেলুৱৈৰ তালিকাত শীৰ্ষত থাকে। শ্ৰীজেশে ১,২৭,৬৪৭ টা ভোট লাভ কৰাৰ বিপৰীতে দ্বিতীয় স্থানত থকা স্পেনিছ এথলীট স্পোৰ্ট ক্লাইম্বিং এচ এলবাৰ্ট গিনেছ লোপেজে ৬৭,৪২৮ টা ভোট লাভ কৰে।
এই সন্মান লাভ কৰি অত্যন্ত সন্মানিত হোৱা বুলি মন্তব্য কৰে শ্ৰীজেশে। ৱৰ্ল্ড গেমচ্ এথলীট অৱ দ্য ইয়েৰ সন্মানৰ বাবে মনোনীত কৰাৰ বাবে FIH ক ধন্যবাদ জনোৱাৰ লগতে তেওঁক ভোট দিয়া প্ৰতিজন ভাৰতীয় হকী প্ৰেমীক ধন্যবাদ জনায় তাৰকা খেলুৱৈ গৰাকীয়ে।
তিনিবাৰৰ অলিম্পিয়ানগৰাকীয়ে ব্যক্তিগত সন্মানতকৈ দলীয় সফলতাক অগ্ৰাধিকাৰ দিয়ে বুলি মন্তব্য কৰে।
তেওঁ লগতে কয়, “এয়া কেৱল ৩৩ জন খেলুৱৈৰ দল নহয়, ইয়াৰ আঁৰত বহুতো লোক জড়িত আছে। প্ৰশিক্ষণ কৰ্মচাৰী, সহায়ক কৰ্মচাৰী, হকী ইণ্ডিয়াৰ দৰে এক সংগঠন আছে যি আমাক যথেষ্ট সমৰ্থন কৰি আছে।”
ভাৰতীয় ক্ৰীড়া প্ৰাধিকৰণ (ছাই)- এ প্ৰশিক্ষণৰ বাবে সকলো বিশ্বমানৰ সুবিধা প্ৰদান কৰি আছে বুলিও উল্লেখ কৰে শ্ৰীজেশে। শ্ৰীজেশে লগতে ক্ৰীড়াৰ বিকাশৰ ক্ষেত্ৰত উৰিষ্যা চৰকাৰ অটল সমৰ্থনৰো শলাগ লয়।
ৰাষ্ট্ৰৰ এক সামূহিক প্ৰচেষ্টাৰ ফলতহে এনে স্বীকৃতি লাভ কৰা সম্ভৱ হৈছে বুলি গুৰুত্বপূৰ্ণ মন্তব্য কৰে শ্ৰীজেশে।
উল্লেখ্য যে যোৱা বৰ্ষৰ অক্টোবৰত FIH ষ্টাৰ্ছ এৱাৰ্ডছত শ্ৰীজেশক ২০২১ বৰ্ষৰ বাবে বছৰটোৰ গ’লৰক্ষক হিচাপে মনোনীত কৰা হৈছিল।
