তামিলনাডুৰ বিধানসভা নিৰ্বাচনৰ পূৰ্বে উত্তপ্ত হৈ পৰিছে দক্ষিণৰ ৰাজনীতি। এইবাৰ সেই বিতৰ্কত ইন্ধন যোগাইছে প্ৰবীণ অভিনেতা প্ৰকাশ ৰাজে। মেগাষ্টাৰ বিজয়ৰ (থালাপতি বিজয়) ৰাজনীতিত প্ৰৱেশক প্ৰত্যক্ষভাৱে আক্ৰমণ কৰি তেওঁ স্পষ্ট কৰি দিলে যে পৰ্দাৰ জনপ্ৰিয়তা আৰু বাস্তৱ জীৱনৰ নেতা হোৱাটো দুটা সম্পূৰ্ণ বেলেগ কথা।
শেহতীয়াকৈ পালানীত চি পি আই (এম)ৰ প্ৰাৰ্থীৰ বাবে প্ৰচাৰ চলাওঁতে প্ৰকাশ ৰাজে তামিলনাডুৰ বৰ্তমানৰ ৰাজনৈতিক ধাৰাটোক দ্ৰাবিড় মডেল, দাস বা নিৰ্ভৰশীল মডেল আৰু চিনেমা মডেল হিচাপে তিনিটা ভাগত বিভক্ত কৰিব বিচাৰিছে।
তেওঁ পোনপটীয়াকৈ বিজয়ৰ নাম উল্লেখ কৰা নাই যদিও প্ৰকাশে ‘চিনেমা মডেল’ৰ কথা উল্লেখ কৰি কয়, “চিনেমাত যিকোনো ব্যক্তিয়ে মুখ্যমন্ত্ৰী বা ডাক্তৰ সাজিব পাৰে, কিন্তু বাস্তৱ ৰাজনীতিত এনে নহয়। দেশ চলোৱাৰ দায়িত্ব কেৱল আৱেগৰ বশত এজন অভিনেতাৰ হাতত তুলি দিব নোৱাৰি।”
আমোদজনক কথাটো হ’ল প্ৰকাশ ৰাজ আৰু বিজয় পৰ্দাত অতি পৰিচিত যুটি। ‘ঘিল্লী’ৰ পৰা আৰম্ভ কৰি ‘ৱাৰিছু’লৈকে কেইবাখনো ব্লকবাষ্টাৰ ছবিত একেলগে অভিনয় কৰিছে। প্ৰকাশ ৰাজে এসময়ত বিজয়ক ‘চেল্লাম’ বুলি মৰমেৰে মাতিছিল। কিন্তু প্ৰকাশে আজি স্পষ্ট কৰি দিলে যে সেই ব্যক্তিগত সম্পৰ্ক ৰাজনৈতিক ক্ষেত্ৰখনত কোনো কামত নাহিব।
প্ৰকাশ ৰাজে বিজয়ৰ বাবে ৩টা কঠিন প্ৰশ্ন উত্থাপন কৰিছে। এক, আপুনি কেতিয়াবা ৰাইজৰ সমস্যাৰ কথা কৈছেনে? দুই, আপুনি কেতিয়াবা ভাষা, সংস্কৃতি বা আত্মসন্মান ৰক্ষাৰ স্বাৰ্থত ৰাজপথলৈ ওলাই আহিছেনে? তিনি, পোষ্টাৰ লগাই মানুহে আপোনাক মৰম দিছে, কিন্তু সেই মৰমেৰে দেশ চলোৱা সম্ভৱনে?
থালাপাতি বিজয়ে ২০২৬ চনৰ নিৰ্বাচনত নিজৰ দল তামিলাগা ভেট্টি কাঝাগাম (টিভিকে)ৰ জৰিয়তে প্ৰতিদ্বন্দ্বিতা কৰিব বুলি ঘোষণা কৰিছে। তেওঁৰ বিশাল অনুৰাগীৰ ভিত্তি আৰু জনপ্ৰিয়তাই তামিল ৰাজনীতিত প্ৰতিষ্ঠিত দলসমূহক চিন্তাত পেলাইছে। কিন্তু প্ৰকাশ ৰাজৰ দৰে সমাজ সচেতন অভিনেতাৰ এই সমালোচনা বিজয়ৰ ‘ৰাজনৈতিক ভাবমূর্তি’ৰ প্রতি এক ডাঙৰ প্রত্যাহবান হ’ব পাৰে৷
এতিয়া চিনেমাৰ ভাবমূর্তি আৰু বাস্তৱ যুঁজ – শেষত তামিলনাডুৰ ভোটাৰে কাক বাছি ল’ব সেয়া লক্ষ্যণীয় হ’ব।
