দেশ স্বাধীন হোৱাৰ পূৰ্বৰে পৰা বসবাস কৰি অহা ৰাজ্যৰ ভূমিপুত্ৰ আৰু আদিবাসীসকলক উচ্ছেদ কৰি ব্যক্তিগত খণ্ডক ভূমি গটোৱাৰ চৰকাৰী সিদ্ধান্তৰ বিৰুদ্ধে তীব্ৰ প্ৰতিক্ৰিয়া প্ৰকাশ কৰিছে অসমৰ একাংশ বিশিষ্ট নাগৰিকে। এই উচ্ছেদৰ বিৰুদ্ধে গণতান্ত্ৰিক আন্দোলনৰ নেতৃত্ব দিয়া সমাজকৰ্মী প্ৰণৱ দলে, আদিত্য ৰাভা আৰু তেওঁলোকৰ সতীৰ্থসকলক গ্ৰেপ্তাৰ কৰা কাৰ্যক কঠোৰ ভাষাৰে গৰিহণা দিয়াৰ লগতে তেওঁলোকক অনতিপলমে বিনাচৰ্তে মুকলি কৰি দিবলৈ চৰকাৰৰ ওচৰত দাবী জনাইছে।
এই সন্দৰ্ভত ৰাজ্যৰ কেইবাগৰাকীও বুদ্ধিজীৱী আৰু সমাজকৰ্মীয়ে এক বিবৃতিযোগে ক্ষোভ প্ৰকাশ কৰি কয় যে, পূৰ্বপুৰুষৰ আমোলৰ পৰা খেতি-বাতি কৰি জীৱন নিৰ্বাহ কৰি থকা লোকসকলক বসুন্ধৰা আঁচনিৰ অধীনত ভূমিৰ পট্টা প্ৰদান কৰাৰ সলনি চৰকাৰে বৰ্তমান উচ্ছেদৰ ভাবুকিহে প্ৰদান কৰিছে। চৰকাৰে এই ভূমিপুত্ৰসকলক নিজৰ ভেটি-মাটিৰ পৰা উচ্ছেদ কৰি সেই মাটি আদানী, আম্বানীৰ দৰে বৃহৎ ব্যক্তিগত খণ্ডক বিভিন্ন নিৰ্মাণ প্ৰকল্পৰ বাবে হস্তান্তৰ কৰাৰ অভিসন্ধি ৰচনা কৰা বুলি তেওঁলোকে অভিযোগ উত্থাপন কৰে। নিজৰ মাটি আৰু ঘৰ বচাবৰ বাবে ক্ষুব্ধ জনসাধাৰণে কৰা প্ৰতিবাদক সম্পূৰ্ণ ন্যায়সঙ্গত বুলিও তেওঁলোকে অভিহিত কৰে।
বিবৃতিটোত লগতে উল্লেখ কৰিছে যে, ভূমিপুত্ৰসকলৰ এই দুৰ্দশাৰ সময়ত তেওঁলোকৰ কাষত থিয় দি গণতান্ত্ৰিকভাৱে শান্তিপূৰ্ণ আন্দোলনৰ নেতৃত্ব দিয়াটো কোনো পধ্যে অপৰাধ হ’ব নোৱাৰে। এখন গণতান্ত্ৰিক দেশত নিজৰ প্ৰাপ্য অধিকাৰ আৰু ন্যায় বিচাৰি আন্দোলন কৰাৰ অধিকাৰ সাধাৰণ জনতাৰ আছে বুলি উল্লেখ কৰি বিশিষ্ট নাগৰিকসকলে কয় যে কেৱল চৰকাৰী সিদ্ধান্তৰ বিৰোধিতা কৰাৰ বাবেই প্ৰণৱ দলে, আদিত্য ৰাভা আৰু তেওঁলোকৰ সতীৰ্থসকলক গ্ৰেপ্তাৰ কৰা কাৰ্য ঘোৰ অন্যায়।
চৰকাৰৰ এনে কাৰ্যৰ প্ৰতিবাদ জনাই জ্যেষ্ঠ সাংবাদিক তথা সাংসদ অজিত কুমাৰ ভূঞা, অধ্যাপক আব্দুল মান্নান, অপূৰ্ব শৰ্মা, ড° সীতানাথ লহকৰ, ড° অপূৰ্ব কুমাৰ বৰুৱা, লক্ষ্মীনাথ তামুলী, ইন্দ্ৰাণী দত্ত, দেবেন তামুলী, পৰেশ মালাকাৰ, মুনীন বায়ন, শান্তনু বৰঠাকুৰ আৰু কবি নীলিম কুমাৰ। ইয়াৰ উপৰিও পূৰ্ণেশ্বৰ নাথ, ড° পৰমানন্দ মজুমদাৰ, পদ্মপাণী, শিৱানন্দ কাকতি, প্ৰণৱজ্যোতি ডেকা, সূপৰ্ণা লাড়িৰী বৰুৱা, হৰপ্ৰিয়া বাৰুকিয়াল বৰগোহাঁইকে ধৰি ৰাজ্যৰ সমাজ জীৱনৰ অৰ্ধশতাধিক চিনাকি মুখ এই প্ৰতিবাদী বিবৃতিত স্বাক্ষৰকাৰী হিচাপে আছে।
সামগ্ৰিকভাৱে, চৰকাৰৰ ভূমি নীতি আৰু আন্দোলনকাৰীক গ্ৰেপ্তাৰৰ বিষয়ক লৈ ৰাজ্যৰ বৌদ্ধিক মহলত সৃষ্টি হোৱা এই অসন্তুষ্টিয়ে এক নতুন বিতৰ্কৰ সূচনা কৰিছে। গ্ৰেপ্তাৰ হোৱা নেতাসকলৰ মুক্তিৰ দাবীত সৰৱ হোৱা বিশিষ্ট নাগৰিকসকলৰ এই স্পষ্ট স্থিতিৰ প্ৰতি প্ৰশাসনে কেনে সঁহাৰি জনায়, সেয়া পৰৱৰ্তী সময়ত লক্ষণীয় হ’ব।
