বহু উৎকন্ঠাৰ অন্ত পৰিল। পৰিয়াল তথা অসমবাসীৰ কাতৰ অনুৰোধত আলফা স্বাধীনে মুকলি কৰি দিলে কুইপ’ৰ অভিযন্তা প্ৰনৱ কুমাৰ গগৈক।
শনিবাৰে নিশা প্ৰায় ৯ বজাত শিৱসাগৰৰ হাবিৰাম বৰা পথত থকা নিজ গৃহত উপস্থিত হয় আলফা(স্বাধীনৰ)ৰ দ্বাৰা অপহৃত প্ৰণৱ কুমাৰ গগৈ।
প্ৰণৱ কুমাৰ গগৈ নিজ গৃহত উপস্থিত হোৱাৰ লগে লগেই অঞ্চলটোত আনন্দৰ বন্যা বয়। পৰিয়ালৰ লোকে আলফা (স্বাধীন) সেনাধক্ষ্য পৰেশ বৰুৱাক ধন্যবাদ জনোৱাৰ লগতে অসম চৰকাৰ, কুইপ’ কোম্পানী আৰু সমগ্ৰ ৰাজ্যবাসীক ধন্যবাদ জনায়।
প্ৰণৱ কুমাৰ গগৈৰ পত্নীয়ে জনোৱা মতে শনিবাৰে পুৱা তেওঁলৈ এটা ফোন কল আহে আৰু জনায় যে আপোনাৰ স্বামীক মুকলি কৰি দিয়া হৈছে, আপোনালোক আহিব লাগিব বুলি। সেইমতে পৰিয়ালৰ লোক পুৱাই শিৱসাগৰৰ পৰা ৰাওনা হয় আৰু অসম -অৰুণাচল সীমান্তৰ জয়ৰামপুৰ আৰক্ষী থানাত প্ৰণৱ কুমাৰ গগৈক লগ পায়।
ইপিনে এক নতুন জীৱন লাভ কৰা বুলি মন্তব্য কৰে প্ৰণৱ কুমাৰ গগৈয়ে। তেওঁ জনোৱা মতে শুকুৰবাৰে দিনৰ দুই বজাত তেওঁক মুকলি কৰাৰ খবৰ লাভ কৰে আৰু সেই স্থানৰ পৰা তেওঁক অসম অৰুণাচল সীমান্তৰ দিশে লৈ অনা হয়।
নিশা প্ৰায় দহ বজাত এক নিদিষ্ট স্থানত ৰাতিটো কটোৱা হয় আৰু পুনৰ পুৱা ছয় বজাত তাৰ পৰা যাত্ৰা আৰম্ভ কৰে আৰু লুংৰী বস্তি নামৰ ঠাইত তেওঁক অকলে এৰি দিয়ে। সম্পূৰ্ণ বাটচোৱা খোজকাঢ়ি অহা বুলি কয় প্ৰণৱ কুমাৰ গগৈয়ে।
আনহাতে, চাৰি মাৰ্চলৈকে একেলগে থকা বিহাৰৰ ৰাম কুমাৰক সেইদিনাৰ পৰা পৃথকে ৰখা হৈছিল। বৰ্তমানলৈকেও ৰাম কুমাৰক মুকলি কৰি দিয়া নাই আলফা(স্বাধীনে)।
আলফা (স্বাধীনৰ) কবলত থকা সময়ত খাদ্য হিচাপে নিমখ ভাতৰ লগতে জংগলত পোৱা শাক, কল পচলা, কলদিল খাইছিল বুলি মন্তব্য কৰে প্ৰণৱ কুমাৰ গগৈয়ে।
দহজনীয়া এটা দলে তেওঁ আৰু ৰাম কুমাৰক অপহৰণ কৰি আনিছিল আৰু পাহাৰৰ লুং লুঙীয়া পথ, শিলৰ নদী, ওখ পাহাৰ, হাবি জংঘল অতিক্ৰম কৰি এক নিদিষ্ট স্থানত তেওঁলোকক ৰখা হৈছিল।
এই তিনিমাহ চৈধ্য দিন বহিঃজগতৰ লগতে কোনো সম্পৰ্ক নাছিল তেওঁলোকৰ। তেওঁলোকে গম পোৱা নাছিল আলফা(স্বাধীন)ই বান্ধি দিয়া ডেড লাইনৰ কথা তথা চূড়ান্ত সিদ্ধান্তৰ কথা।
আজি পৰিয়ালৰ লোকক পুনৰ লগ পাই তেওঁ সুখী অনুভৱ হোৱা বুলি মন্তব্য কৰাৰ লগতে তেওঁৰ সতীৰ্থ ৰাম কুমাৰকো অতি সোনকালে মুকলি কৰি দিবলৈ অনুৰোধ জনায় আলফা(স্বাধীনক)।
