ৰাজনীতিৰ কথাৰ বাহিৰে কোনো কাৰণতে তেওঁ আন কথাত মূৰ সোমাবলৈ আগ্ৰহী নহয়। নিজৰ লক্ষ্যত অটল থাকিয়েই ৰাজনৈতিক জীৱনৰ নতুন পৰিকল্পনাৰ দিশে আগবাঢ়িছে নিৰ্বাচনী ৰণনীতিবিদ প্ৰশান্ত কিশোৰে।
সূত্ৰসমূহৰ মতে সোমবাৰেই প্ৰশান্ত কিশোৰে তেওঁৰ নতুন পৰিকল্পনাৰ কথা সদৰী কৰিব। আনকি তেওঁ নিজৰ নতুন দলৰ কথাও ঘোষণা কৰিব পাৰে। ৰাজনৈতিক দল খুলি সংসদীয় ৰাজনীতিত খোজ পেলাব নেকি সেয়া সোমবাৰে স্পষ্ট হ’ব।
একাংশ ৰাজনৈতিক মহলৰ মতে প্ৰশান্ত কিশোৰে নিজাকৈ ৰাজনৈতিক দল খুলিব বুলি তেওঁলোকে ধাৰণা কৰিছে। তেওঁলোকৰ মতে কংগ্ৰেছৰ সৈতে কেইবালানিও আলোচনাত বহিও যেতিয়া কোনো সমাধান সূত্ৰ নোলাল তেতিয়াই প্ৰশান্ত কিশোৰৰ ভৱিষ্যৎ পৰিকল্পনাৰ বিষয়ে অনুমান কৰিব পৰা গৈছিল।
লগতে পঢ়ক: ৰাছিয়াৰ ৰাষ্ট্ৰপতি পুটিনৰ আছে দুই ‘গোপন’ পুত্ৰ সন্তান! সন্ধান দিলে ছুইচ সংবাদ মাধ্যমে
আন একাংশৰ দাবী যে আন ৰাজনৈতিক দলৰ সৈতে নহয়, এইবাৰ নিজেই ৰাজনৈতিক দল খুলি পোনপটীয়াকৈ নিৰ্বাচনী যুঁজত অৱতীৰ্ণ হ’ব কিশোৰ।
কিন্তু তাৰমাজতে কিছুমানে দাবী কৰিব খোজে যে তেওঁ নিৰ্বাচনী ৰণনীতিবিদ হিচাপে নিজৰ কেৰিয়াৰ আগবঢ়াই নিব। এতিয়াও তেওঁ নিৰ্বাচনী ৰণনীতিবিদ হিচাপে তৃণমূল কংগ্ৰেছৰ সৈতে থকাৰ কথা পশ্চিমবংগৰ মুখ্যমন্ত্ৰী মমতা বেনাৰ্জীয়ে স্পষ্ট কৰিছে।
কংগ্ৰেছক পুনৰুজ্জীৱিত কৰাৰ বাবে প্ৰশান্ত কিশোৰে যি পৰিকল্পনা দাঙি ধৰিছিল সেয়া কংগ্ৰেছ নেতৃত্বই মানি লৈছিল যদিও সেয়া কাৰ্যকৰী কৰাৰ ক্ষেত্ৰত কংগ্ৰেছ নেতৃত্বই তেওঁক পতিয়ন নিয়াব নোৱাৰিলে।
লগতে পঢ়ক: যুদ্ধৰ আঁৰৰ খৱৰ: ডলাৰৰ বিপৰীতে অবিশ্বাস্যভাৱে বৃদ্ধি পাইছে ৰাছিয়াৰ মুদ্ৰাৰ মূল্য!
প্ৰশান্ত কিশোৰে জানিবলৈ দিছিল যে আগন্তুক দিনত তেওঁ এগৰাকী ৰাজনীতিবিদ হিচাপেই কাম কৰিব বিচাৰে। তেতিয়াৰে পৰাই বিভিন্ন মহলত তেওঁৰ নতুন ৰাজনৈতিক জীৱনকলৈ বিভিন্ন জল্পনা-কল্পনা আৰম্ভ হৈছে।
এই সকলো জল্পনা-কল্পনাৰ ওৰ পেলাই আজি প্ৰশান্ত কিশোৰে তেওঁৰ নতুন পৰিকল্পনা সদৰী কৰিব। ইয়াৰ বাবে তেওঁ ইতিমধ্যে গৈ পাটনাত উপস্থিত হৈছে।