সকলো স্তৰৰ লোকৰ উন্নয়নৰ শ্ল’গানেৰে শাসনলৈ অহা ড° হিমন্ত বিশ্ব শৰ্মা নেতৃত্বাধীন মিত্ৰজোঁটৰ চৰকাৰ খনে নিযুক্তিৰ নামত প্ৰতিবন্ধী লোকক প্ৰতাৰণাৰ অভিযোগ উত্থাপন কৰিছে প্ৰতিবন্ধী সুৰক্ষা সংস্হা অসমে৷
চৰকাৰ খনে দায়িত্ব লোৱাৰ পিছতে এবছৰত ১লাখ নিবনুৱা যুৱক যুৱতীক নিযুক্তি দিব বুলি ঘোষণা কৰিছিল যদিও ৭মাহ উকলি যোৱাৰ পিছতো এটায়ো প্ৰতিবন্ধীক নিযুক্তি দিব নোৱাৰাতো চৰকাৰৰ ব্যৰ্থতা বুলি অভিহিত কৰিছে৷
শেহতীয়াকৈ স্বাস্থ্য বিভাগে প্ৰতিবন্ধীৰ নিযুক্তি বিজ্ঞাপনৰ ক্ষেত্ৰত শ্ৰেণী বিভাজন কৰিছে বুলি গুৰুত্বপূৰ্ণ অভিযোগ কৰিছে প্ৰতিবন্ধী সুৰক্ষা সংস্হা অসমৰ সম্পাদক নৃপেন মালাকাৰে৷
স্বাস্থ্য বিভাগে প্ৰকাশ কৰা বিজ্ঞাপনত প্ৰতিবন্ধী আইন ২০১৬ উলংঘন কৰা বুলি অভিযোগ কৰি আজি হেঙেৰাবাৰীস্হিত স্বাস্থ্য সেৱা সঞ্চালকক স্মাৰক পত্ৰ প্ৰদান কৰে প্ৰতিবন্ধী সংগঠনটোৱে৷
স্মাৰক পত্ৰ প্ৰদান কৰি নৃপেন মালাকাৰে কয় “৭ডিচেম্বৰত বাতৰি কাকত যোগে HSE/APTT/68/p-ll/2019/9031 নম্বৰত স্বাস্থ্য বিভাগত তৃতীয় আৰু চতুৰ্থ বৰ্গৰ মুঠ ২৭২০টা পদ পূৰনৰ বাবে বিজ্ঞাপন প্ৰকাশ কৰিছে যদিও তাত প্ৰতিবন্ধী আইন ২০১৬ৰ ৩৪নং দফাৰ ৪শতাংশ আসন সংৰক্ষণৰ লগতে অসম চৰকাৰৰ ২০১৯ চনৰ ১০০পইন্ট ৰোস্তাৰ মতে দৃষ্টিহীন, শ্ৰৱণশক্তিহীন, অস্হি প্ৰতিবন্ধকতা আৰু অন্যান্য প্ৰতিবন্ধীতাৰ সংৰক্ষণৰ বাবে তাত স্পষ্টভাৱে উল্লেখ আছে৷
“কিন্তু এই সকলো নিয়ম জলাঞ্জলি দি বিভাগটোৱে যি বিজ্ঞাপন প্ৰকাশ কৰিলে তাত প্ৰতিবন্ধী সকলৰ শ্ৰেণী বিভাজন কৰি অনুসুচীত জাতি, জনজাতি, অন্যান্য পিছপৰা জাতি আৰু সাধাৰণ শ্ৰেণীত ভাগ ভাগ কৰাৰ ফলত প্ৰকৃত প্ৰতিবন্ধী যে নিযুক্তিৰ পৰা বঞ্চিত হব সেয়া নিশ্চিত৷” এইদৰে কয় মালাকাৰে।
গতিকে বিভাগে প্ৰকাশ কৰা বিজ্ঞাপনটো অহা ৭দিনৰ ভিতৰত শুধৰণি কৰি প্ৰকাশ কৰিবলৈ দাবী জনায় মালাকাৰে।
অন্যথা অনাগত দিনত তীব্ৰ প্ৰতিবাদী কাৰ্যসূচী গ্ৰহণ কৰা হব বুলি হুংকাৰ দিছে সংগঠনটোৱে৷