অসমৰ বিভিন্ন প্ৰান্তৰ লগতে পশ্চিম অসমৰ ধুবুৰী জিলাৰ চাপৰ চহৰত গোৱালপাৰীয়া লোকসংগীতক জগত সভাত প্ৰতিষ্ঠা কৰা লোকসংগীত সম্ৰাজ্ঞী তথা ‘হস্তীৰ কন্যা’ হিচাপে খ্যাত প্ৰতিমা বৰুৱা পাণ্ডেক আজি ১৯সংখ্যক স্মৃতি দিৱসত সশ্ৰদ্ধ স্মৰণ কৰা হয়।
চাপৰ পৌৰ সভাৰ উদ্যোগত পৌৰ সভা কাৰ্য্যালয়ৰ সন্মুখত থকা শিল্পীগৰাকীৰ প্ৰতিমূৰ্তিত মাল্যাৰ্পণ আৰু বন্তি প্ৰজ্বলনেৰে শ্ৰদ্ধাঞ্জলি অনুষ্ঠান মুকলি কৰে চাপৰ পৌৰ সভাৰ কাৰ্যবাহী বিষয়া তথা চক্ৰ বিষয়া শান্তনু গগৈয়ে।
তাৰ পিছতে পৌৰ সভাখনৰ সমূহ কৰ্মচাৰীৰ লগতে চাপৰৰ চক্ৰ বিষয়া ৰ কাৰ্যালয়ৰ কৰ্মচাৰীসকলেও হস্তীৰ কন্যা গৰাকীক স্মৰণ কৰি গভীৰ শ্ৰদ্ধাৰ্ঘ্য নিবেদন কৰে।
শ্ৰদ্ধাঞ্জলি অনুষ্ঠানৰ পিছতেই বিশ্ববৰেণ্য শিল্পীগৰাকীৰ সোঁৱৰণত অনুষ্টুপীয়াকৈ এখনি স্মৃতিচাৰণ সভাও অনুষ্ঠিত হয়।
বঙাইগাঁৱত অসম সাহিত্য সভাৰ প্ৰতিষ্ঠা দিৱস উদযাপনৰ লগতে লোকগীতৰ সম্ৰাজ্ঞী প্ৰতিমা বৰুৱা পাণ্ডেৰ স্মৃতিচাৰণ সভা
বঙাইগাঁও শতদল শাখা সাহিত্য সভাই সোমবাৰে অসম সাহিত্য সভাৰ ১০৫ সংখ্যক প্ৰতিষ্ঠা দিৱস আৰু গোপালপাৰীয়া লোকগীতৰ সম্ৰাজ্ঞী প্ৰতিমা বৰুৱা পাণ্ডেৰ ১৯ সংখ্যক মৃত্যুবাৰ্ষিকীৰ লগত সংগতি ৰাখি স্মৃতিচাৰণ সভা অনুষ্ঠিত কৰে ৷
শাখা সভাৰ ভাৰপ্ৰাপ্ত সভাপতি জ্যোৎস্নাপ্ৰিয়া দেৱীয়ে পুৱা পতাকা উত্তোলনেৰে কাৰ্যসূচীৰ শুভাৰম্ভ কৰাৰ পিছত স্মৃতি তৰ্পণ কৰে সভাৰ বিশিষ্ট বক্তা ডঃ সান্ত্বনাময়ী মজুমদাৰে ৷
ইয়াৰ পিছতে শাখাৰ ভাৰপ্ৰাপ্ত সভাপতি জ্যোৎস্নাপ্ৰিয়া দেৱীৰ সভাপতিত্বত অনুষ্ঠিত সভাৰ আৰম্ভণিতে ‘ বিনীতা শৰ্মাৰ পৰিচালনাত সদস্যসকলে ‘চিৰ চেনেহী মোৰ ভাষা জননী ‘ শীৰ্ষক গীতটো পৰিৱেশন কৰে ৷ সম্পাদক মীনা দেৱীয়ে সভাৰ উদ্দেশ্য ব্যাখ্যা কৰা সভাত বিশিষ্ট বক্তা ডঃ সান্ত্বনাময়ী মজুমদাৰে লোকগীত সম্ৰাজ্ঞীগৰাকীৰ জীৱন, সৃষ্টিৰাজিৰ ওপৰত আলোকপাত কৰে ৷
সেইদৰে আনগৰাকী বিশিষ্ট বক্তা তথা বঙাইগাঁও জিলা সাহিত্য সভাৰ প্ৰাক্তন সভাপতি অজিত কুমাৰ দাসে অসম সাহিত্য সভাৰ চমু ইতিবৃত্ত ডাঙি ধৰে ৷
আনহাতে সমজুৱাৰ ফালৰ পৰা দীপক কুমাৰ দত্তই প্ৰতিমা বৰুৱা পাণ্ডেৰ জীৱন কাহিনী চমুকৈ উল্লেখ কৰাৰ লগতে সোণালী কণ্ঠৰগৰাকী প্ৰয়াত শিল্পীগৰাকীক শ্ৰদ্ধাৰে সোঁৱৰে ৷মীনা দেৱীয়ে অসম সাহিত্য সভাৰ আৰম্ভণি,কাৰ্যকলাপ আদি বিষয় সামৰি পৰ্যালোচনা আগবঢ়ায় ৷
অনুষ্ঠানত ধীৰেশ চন্দ্ৰ ৰায় আৰু গায়ত্ৰী দেৱীয়ে স্বৰচিত কবিতা পাঠ, অনিল চন্দ্ৰ শৰ্মাই স্বৰচিত গীত, জ্যোতিকা ৰায়, মাজেন নাথ আৰু বিনীতা শৰ্মাই কেইবাটাও গোৱালপাৰীয়া লোকগীত পৰিৱেশন কৰে ৷
শেষত সভাপতিৰ চমু বক্তব্যৰ পিছতে মীনা দেৱীয়ে শলাগৰ শৰাই আগবঢ়ায় আৰু অসম সংগীতেৰে সভাৰ সামৰণি পৰে ৷ সন্ধিয়া অসম সাহিত্য সভাৰ প্ৰতিষ্ঠা দিৱসৰ লগত সংগতি ৰাখি শাখা সাহিত্য সভা ভৱনৰ চৌহদত ১০৫ গছি বন্তি প্ৰজ্বলন কৰা হয় ৷
