গাঁৱখনত কোনো ৰাস্তা নাই। ধাৰাসাৰ বৰষুণৰ বাবে সকলো ৰাস্তা বোকাৰে ভৰি পৰিছে। য’ৰ পৰা খোজকাঢ়ি যোৱাটো কঠিন। সেই পথটোত এম্বুলেন্সখনো সোমাব পৰা নাছিল। কেইকিলোমিটাৰমান দূৰৈত গাড়ীখন ৰখাই থোৱা আছিল। ঘৰৰ পৰা এম্বুলেন্সলৈকে গৰ্ভৱতী যুৱতীগৰাকীয়ে সেই বোকাময় পথটো পাৰ হৈ গ’ল।
প্ৰসৱৰ পূৰ্বে যন্ত্ৰণাত কাতৰ হৈ পৰিছিল মহিলাগৰাকী। খোজ কাঢ়িব পৰা অৱস্থা তেওঁৰ নাছিল। অৱশেষত তেওঁক এখন ‘সাঙী’ত লৈ যোৱা হ’ল। অৱশ্যে এই ‘সাঙী’ দোলাৰ দৰে নিৰাপদ নহয়। বাঁহ আৰু কাপোৰত ওলমিয়েই তেওঁ কেইকিলোমিটাৰমান অতিক্ৰম কৰিলে।
গৰ্ভৱতী মহিলাগৰাকীৰ এই ঘটনাই সমগ্ৰ ৰাজ্যতে চাঞ্চল্যৰ সৃষ্টি কৰিছে। জানিব পৰা মতে, মহিলাগৰাকীয়ে চিকিৎসালয় পোৱাৰ আগতেই সন্তান জন্ম দিছিল। এম্বুলেন্সত উঠাৰ পিছত গাড়ীতেই সন্তান জন্ম দিয়ে। যিটো ঘটনাত আকৌ এবাৰ সৰৱ হৈ পৰিছে সমাজকৰ্মীসকল।
সৰ্বভাৰতীয় সংবাদ মাধ্যমৰ সূত্ৰ অনুসৰি এই ঘটনা সংঘটিত হৈছে মধ্যপ্ৰদেশৰ চিধি জিলাত। জানিব পৰা মতে, চিধি জিলাৰ বাৰিগৱান গাঁৱত সংঘটিত হৈছে এই ঘটনা। এই গাঁৱত প্ৰধানকৈ জনজাতীয় লোকে বসবাস কৰে। মুঠতে ৭০টা পৰিয়াল আছে। জনজাতীয় মহিলাগৰাকীৰ নাম প্ৰীতি ৰাৱট।
প্ৰতি বছৰে বাৰিষাৰ সময়ত বাৰিগৱান গাঁৱৰ বাসিন্দাসকলে যথেষ্ট দুৰ্ভোগৰ সন্মুখীন হয়। মূল পথৰ পৰা গাঁওখনলৈ কোনো পকী পথ নাই। ধাৰাসাৰ বৰষুণৰ বাবে গাঁওখন নদীৰ পানীত ডুব যায়। গাঁৱৰ আটাইকেইটা ৰাস্তা বোকাৰে ভৰি পৰে।
এই গাঁৱৰ বাসিন্দাসকলে বিদ্যালয়, মহাবিদ্যালয়, বজাৰ, স্বাস্থ্যকেন্দ্ৰলৈ যাবলৈ যথেষ্ট সংগ্ৰাম কৰিবলগীয়া হৈছে। আনকি ছাত্ৰ-ছাত্ৰীসকলেও প্ৰতিদিনে নিজৰ জীৱনকো তুচ্ছ কৰি বিদ্যালয়ত উপনীত হ’বলৈ কঠোৰ পৰিশ্ৰম কৰে। বিশেষকৈ যেতিয়া কোনোবা গুৰুতৰভাৱে অসুস্থ হৈ পৰে তেতিয়া প্ৰসৱৰ দৰে ক্ষেত্ৰত পৰিস্থিতি আৰু অধিক দুখজনক হৈ পৰে।
কিছুদিন আগতে প্ৰীতি ঘৰতে প্ৰসৱ বেদনাত ছটফটাবলৈ আৰম্ভ কৰে। এম্বুলেন্সক খৰধৰকৈ খবৰ দিয়া হ’ল। সময়মতে গাঁও পালেহি এম্বুলেঞ্চ। কিন্তু চালকজনে কয় যে মূল পথৰ পৰা এম্বুলেন্সখন গাঁৱত প্ৰৱেশ কৰিব নোৱাৰে। বোকাত এবাৰ গাড়ীৰ চকা আবদ্ধ হৈ পৰিলে বিপদ বাঢ়িব। এনে পৰিস্থিতিত চালকজনে কয় যে এম্বুলেন্সখন গাঁৱত সোমাব নোৱাৰিব।
তাৰ পাছত পৰিয়ালৰ লোকে প্ৰীতিক এখন ‘সাঙী’ত উঠাই এম্বুলেন্সলৈ ৰাওনা হ’ল। বাঁহৰ লাঠিত কাপোৰ এখন ওলোমাই ৰছীৰে ওলোমাই থোৱা হ’ল। সেই কাপোৰখনত ওলমি থকা প্ৰীতি দুই কিলোমিটাৰ দূৰত্ব পাৰ হৈ মূল পথত এম্বুলেন্সত উঠিল। চিকিৎসালয়লৈ যোৱাৰ আগতে তেওঁ এম্বুলেন্সতে সন্তান জন্ম দিলে। পৰিয়ালৰ লোকে জনোৱা মতে, মাতৃ আৰু শিশু দুয়োজনেই সুস্থ। সম্প্ৰতি ছেমৰিয়া চিকিৎসালয়ত ভৰ্তি হৈ আছে।
মুখ্য চিকিৎসা আৰু স্বাস্থ্য বিষয়া ডাঃ ববিতা খাৰে কয় যে এম্বুলেন্সখন সময়মতে পোৱাৰ পিছতো গাঁওখনত প্ৰৱেশ কৰিব নোৱাৰিলে। পকী পথ নথকাৰ বাবেই সমস্যাৰ সৃষ্টি হৈছিল। মূল পথত ৰৈ আছিল এম্বুলেন্সখন।
সামাজিক কৰ্মীসকলে এই ঘটনাক সমালোচনা কৰিছে। তেওঁলোকৰ দাবী, যদি পৰিয়ালৰ লোকসকল সময়মতে মহিলাগৰাকীৰ সৈতে নগলেহেঁতেন তেন্তে মাতৃ আৰু সন্তানৰ মৃত্যু হ’ব পাৰিলেহেঁতেন। ৰাজ্য চৰকাৰৰ গাফিলতিৰ বাবে এতিয়া গৰ্ভৱতী মহিলাৰ জীৱন বিপদত পৰিছে।
