ৰাষ্ট্ৰপতি কোবিন্দে অহা ২৯ নৱেম্বৰত ১১৮ হেলিকপ্টাৰ য়ুনিট আৰু লক্ষ্ণৌৰ মেমাউৰাত থকা এয়াৰ ডিফেন্স কলেজক প্ৰেচিডেণ্টছ ষ্টেণ্ডাৰ্ড এণ্ড কালাৰ্ছ বঁটা প্ৰদান কৰিব। এই বঁটা প্ৰদান উপলক্ষে গুৱাহাটী বায়ুসেনা ঘাটীত অনুষ্ঠিত আনুষ্ঠানিক পেৰেড অনুষ্ঠানত ৰাষ্ট্ৰপতিগৰাকীৰ উপৰিও অসমৰ ৰাজ্যপাল জগদীশ মুখী, মুখ্য মন্ত্ৰী সৰ্বানন্দ সোণোৱাল আৰু ভাৰতীয় বায়ুসেনা বাহিনীৰ চীফ অব এয়াৰ ষ্টাফ অৰূপ ৰাহা উপস্থিত থাকিব বুলি ইষ্টাৰ্ন এয়াৰ কামাণ্ডৰ এয়াৰ অফিচাৰ কামাণ্ডিং-ইন-চীফ এয়াৰ মাৰ্শ্বেল ৰঘূনাথ নাম্বিয়াৰে আজি সাংবাদিকৰ আগত এই কথা প্ৰকাশ কৰিছে।
উল্লেখ্য যে প্ৰচিডেণ্টছ ষ্টেণ্ডাৰ্ড এণ্ড কালাৰ্ছ বঁটা হৈছে সামৰিক বাহিনীৰ য়ুনিটক প্ৰদান কৰা সৰ্বোচ্চ বঁটা। শান্তি আৰু অশান্তিৰ সময়ত ৰাষ্ট্ৰৰ নিৰাপত্তালৈকে আগবঢ়োৱা অসামান্য অৱদানৰ স্বীকৃতি হিচাপে এই সন্মান প্ৰদান কৰা হয়।
১১৮ হেলিকপ্টাৰ য়ুনিট (চেলেঞ্জাৰ) হৈছে এমআই-৮ (Mi-8) শ্ৰেণীৰ হেলিকপ্টাৰেৰে সজ্জিত ইষ্টাৰ্ন এয়াৰ কামাণ্ডৰ অধীনস্থ য়ুনিট আৰু গুৱাহাটীৰ সমীপৱৰ্তী বৰঝাৰৰ বায়ুসেনা ঘাটীত অৱস্থিত। এই য়ুনিটটো ১১৯৭১ চনৰ ২২ নৱেম্বৰত চাবুৱাত আৰম্ভ কৰা হৈছিল।
আনহাতে লক্ষ্ণৌৰ মেমাৰুৱাস্থিত এয়াৰ ডিফেন্স কলেজ ভাৰতীয় বায়ুসেনা বাহিনীৰ এখন আগশাৰিৰ প্ৰতিষ্ঠান।
এইখন এয়াৰ ডিফেন্স কলেজখনেই ভাৰতীয় বায়ুসেনা বাহিনীৰ ফাইটাৰ কণ্ট্ৰোলাৰসকলক প্ৰশিক্ষণ দিয়া একমাত্ৰ শিক্ষা প্ৰতিষ্ঠান। ১৯৫৮ চনত যোধপুৰত ইয়াক কণ্ট্ৰোল এণ্ড ৰিপ’ৰ্টিং স্কুল হিচাপে স্থাপন কৰা হৈছিল।
এই বঁটাৰ বাবে নিৰ্বাচিত হোৱা অতি গুৰুত্বপূৰ্ণ যিহেতু ২০১৮ চনত ডিফেন্স কলেজর হীৰক জয়ন্তী বৰ্ষ। দেশৰ সেৱাত গৌৰৱোজ্জল ৬০ বছৰীয়া সেৱাৰ স্বীকৃতিই স্বৰূপে এই বঁটা অতি গুৰুত্বপূৰ্ণ বুলি নাম্বিয়াৰে প্ৰকাশ কৰিছে।