সদৌ অসম বাঙালী যুৱ ছাত্ৰ ফেডাৰেইশ্যনৰ ৰাজ্যিক সভাপতি কমল চৌধুৰীয়ে আজি সংগঠনটোৰ পৰা পদত্যাগ কৰে।
মহানগৰীৰ লখৰাস্থিত হোটেল ভি আই পিত আনুষ্ঠানিকভাৱে পদত্যাগ কৰে বাঙালী ছাত্ৰ নেতাজনে।
উল্লেখযোগ্য যে যোৱা ১৭ ফেব্ৰুৱাৰিত সদৌ অসম বাঙালী যুৱ ছাত্ৰ ফেডাৰেইশ্যনৰ তিনিওটা গোট একত্ৰিত হৈছিল আৰু তেতিয়া কমল চৌধুৰীয়ে সভাপতিৰ দায়িত্ব লৈছিল।
পদত্যাগ কৰা চৌধুৰীৰ ঠাইত মহানন্দ দত্ত সৰকাৰক সংগঠনটোৰ ৰাজ্যিক সভাপতিৰ দায়িত্ব দিয়া হৈছে বুলি সংগঠনটোৰ সূত্ৰই কয়।
ইপিনে, পদত্যাগৰ কাৰণ সম্পূৰ্ণ ব্যক্তিগত বুলি সাংবাদিকৰ আগত চৌধুৰীয়ে কয় যদিও তেওঁ অচিৰেই বিজেপিত যোগদান কৰিব বুলি এক সূত্ৰৰ পৰা জানিব পৰা গৈছে।
“বিজেপিত যোগদান কৰিব নেকি” বুলি সাংবাদিকে সোধাত তেওঁ পোনপটীয়াকৈ নস্যাৎ নকৰি কয়, “সদ্যহতে বিজেপিত যোগদান বুলিয়েই নহয়, অলপ ব্যক্তিগত তথা ঘৰুৱা কাম আছে। কেইদিনমানৰ পাছত এই বিষয়ত চিন্তা চৰ্চা কৰিম”।
উল্লেখযোগ্য যে, কমল চৌধুৰী ১৯৯৯ চনৰ পৰাই সদৌ অসম বাঙালী যুৱ ছাত্ৰ ফেডাৰেইশ্যনৰ সৈতে জড়িত হৈ আছিল। প্ৰথমে তেওঁ মহানগৰ জিলা সমিতিৰ সভাপতি হিচাপে কাৰ্য্যনিৰ্বাহ কৰিছিল আৰু শেহতীয়াকৈ ৰাজ্যিক সভাপতিৰ দায়িত্ব পাইছিল।
আজি সংগঠনৰ অন্য বিষয়ববীয়াসকলে তেওঁক গামোচা-জাপিৰে সম্বৰ্ধনা জনাই সংগঠনৰ মজিয়াৰ পৰা বিদায় দিয়ে।