শিক্ষামন্ত্ৰী ডাঃ ৰনোজ পেগুৱে বৃহস্পতিবাৰে দশম আৰু দ্বাদশ শ্ৰেণী পৰীক্ষাৰ ফলাফল ঘোষণা সম্পৰ্কত প্ৰকাশ কৰা নীতিক লৈ এতিয়া ৰাজ্যৰ বিভিন্ন দল-সংগঠনে প্ৰতিক্ৰিয়া প্ৰকাশ কৰিছে।
দুৰ্নীতি বিৰোধী যুৱ শক্তি অসমৰ সভাপতি ধৰ্মকান্ত গগৈয়ে এক বিবৃতিযোগে চৰকাৰক এনে ছাত্ৰ-ছাত্ৰী বিৰোধী নীতি পৰিহাৰ কৰিবলৈ আহ্বান জনাই কয় যে চৰকাৰে মাৰ্কশ্বীটখনক বৈধতা প্ৰদান কৰক, অন্যথা ফলাফল ঘোষণাৰ নাটক নকৰিব।
বৃহস্পতিবাৰে শিক্ষা মন্ত্ৰী ৰণোজ পেগুৱে ঘোষণা কৰা নীতি অনুসৰি এই বছৰৰ ফলাফল কেৱল নামভৰ্তিৰ বাবেহে প্ৰযোজ্য হ’ব। এই বৰ্ষৰ কোনো ছাত্ৰ-ছাত্ৰীয়ে যদি ভৱিষ্যতে চৰকাৰী চাকৰি কৰিব বিচাৰে তেনেহ’লে তেওঁলোকে পুনৰ পৰীক্ষাত বহিব লাগিব।
শিক্ষামন্ত্ৰীৰ এনে ঘোষণাৰ পাছতে স্বাভাৱিকতে সৰ্বত্ৰে প্ৰতিক্ৰিয়াৰ সৃষ্টি হৈছে। প্ৰকৃততে চৰকাৰৰ উদ্যোগত গ্ৰহণ কৰা এই নীতি এক টোগলকী নীতি হিচাপেহে পৰগণিত হ’বলৈ আগবাঢ়িছে।
দুৰ্নীতি বিৰোধী যুৱ শক্তি অসমৰ সভাপতি ধৰ্মকান্ত গগৈয়ে কয় যে ফলাফল দিব, কিন্তু সেই ফলাফলৰ একো ভৱিষ্যত নাথাকিব। অৰ্থাৎ ঘোষিত ফলাফলৰ মাৰ্কশ্বীটে ছাত্ৰ-ছাত্ৰী সকলক কোনো ফলাফল বা লাভালাভ নিদিব।
তেনেহ’লে এনে ফলাফল ঘোষণা কৰাৰ কাৰণ কি? বুলিও প্ৰশ্ন কৰে গগৈয়ে।
দশম আৰু দ্বাদশ শ্ৰেণী উত্তীৰ্ণ মাৰ্কশ্বীটখন অতি প্ৰয়োজনীয় তথা গুৰুত্বপূৰ্ণ বুলি উল্লেখ কৰি ধৰ্মকান্ত গগৈয়ে কয় যে এই নম্বৰ সমূহে যিকোনো চাকৰি বা প্ৰতিযোগিতামূলক পৰীক্ষা সমূহত বিশেষ ভুমিকা গ্ৰহণ কৰে।
চৰকাৰৰলৈ গগৈৰ প্ৰশ্ন, তেনেহ’লে ২০২১ বৰ্ষৰ দশম আৰু দ্বাদশ শ্ৰেণীৰ পৰীক্ষাৰ্থীসকলক ফলাফলৰ নামত মাত্ৰ এখন উকা কাগজ দিয়া হ’ব কিয়?
তেওঁ শিক্ষা বিভাগ আৰু চৰকাৰলৈ দাবী জনাই কয় যে চৰকাৰে ঘোষিত হ’বলগীয়া ফলাফলৰ ভিত্তিত প্ৰদান কৰিবলগীয়া মাৰ্কশ্বীটখনক বৈধতা প্ৰদান কৰক।
