আজি নিশা ঠিক ৮:৩০ বজাত দেশবাসীক সম্বোধন কৰিব প্ৰধানমন্ত্ৰী নৰেন্দ্ৰ মোদীয়ে। তেওঁ কি কি বিষয়কলৈ বক্তব্য ৰাখিব, নতুন কিবা ঘোষণা কৰিব নেকি? ইতিমধ্যে ইয়াক লৈ সমগ্ৰ দেশতে জল্পনা-কল্পনা আৰম্ভ হৈছে।
এন ডি এয়ে মহিলা সংৰক্ষণ বিধেয়ক লোকসভাত গৃহীত কৰিব নোৱাৰিলে। শুকুৰবাৰে ভোটদানত স্তব্ধ হৈ পৰে সংশোধনী বিধেয়কখন। ঠিক তাৰ পিছদিনাই এই বিষয়টো প্ৰধানমন্ত্ৰীয়ে জাতিটোক দিয়া ভাষণত অন্তৰ্ভুক্ত হ’ব পাৰে বুলি ৰাজনৈতিক মহলৰ অধিকাংশই অনুমান কৰিছে। তেওঁ কি কি বিষয়ৰ ওপৰত গুৰুত্ব দিব সেই সন্দৰ্ভত একো জনোৱা নাই প্ৰধানমন্ত্ৰীৰ কাৰ্যালয়ে।
সংবিধান সংশোধনী বিধেয়কক লৈ দেশৰ ৰাজনীতি অস্থিৰ হৈ পৰাৰ সময়তে প্ৰধানমন্ত্ৰীয়ে দেশবাসীক ভাষণ দিয়াৰ কথা ঘোষণা কৰিছে। এই বিধেয়কখনে লোকসভাত প্ৰয়োজনীয় দুই তৃতীয়াংশৰ সমৰ্থন লাভ কৰাত ব্যৰ্থ হয়।
এই বিধেয়কখনত সংসদ আৰু ৰাজ্যিক বিধানসভাত মহিলাৰ বাবে ৩৩% সংৰক্ষণ প্ৰৱৰ্তন, লোকসভাৰ আসনৰ সংখ্যা ৫৪৩ৰ পৰা ৮৫০লৈ বৃদ্ধি আৰু ২০১১ চনৰ লোকপিয়লৰ ভিত্তিত পুনৰ সীমা নিৰ্ধাৰণৰ প্ৰস্তাৱ দিয়া হৈছিল। আনহাতে ২৯৮ জন সাংসদে বিধেয়কখনৰ সপক্ষে ভোটদান কৰাৰ বিপৰীতে ২৩০ জন সাংসদে বিৰোধিতা কৰে।
সূত্ৰ অনুসৰি, শনিবাৰৰ কেবিনেট বৈঠকত প্ৰধানমন্ত্ৰীয়ে বিৰোধীক ‘দোষী’ আখ্যা দি বিধেয়কখনক সমৰ্থন নকৰাৰ বাবে বিৰোধীয়ে মহিলাৰ বিৰুদ্ধে স্থিতি লোৱাৰ অভিযোগ উত্থাপন কৰে। বিৰোধীৰ এই স্থিতিক ডাঙৰ ভুল বুলি অভিহিত কৰি ভৱিষ্যতে ইয়াৰ ৰাজনৈতিক মূল্য দিব লাগিব বুলি সকীয়াই দিয়ে।
প্ৰধানমন্ত্ৰীয়ে জোৰ দি কয় যে বিৰোধীৰ মহিলাৰ প্ৰতি নেতিবাচক দৃষ্টিভংগী আছে। সূত্ৰ অনুসৰি বিৰোধী দলসমূহে এতিয়া নিজৰ স্থিতি বুজাবলৈ বিপাঙত পৰিছে। এন ডি এৰ দাবী, লোকসভাত বিধেয়কখন গৃহীত নোহোৱাৰ বাবে মহিলাৰ বাবে সংৰক্ষণ আৰু সীমা নিৰ্ধাৰণৰ বিষয়টো অনিশ্চয়তাৰ মাজত পৰি ৰ’ল। এতিয়া সকলোৰে দৃষ্টি আজি নিশা প্ৰধানমন্ত্ৰীৰ ভাষণৰ ওপৰত।
ইপিনে, মধ্যপ্ৰাচ্যতো যুদ্ধ চলি আছে। সমগ্ৰ দেশতে গেছৰ সংকটৰ সৃষ্টি হৈছে। কেন্দ্ৰই বাৰে বাৰে দাবী কৰি আহিছে যে ভাৰতত পৰ্যাপ্ত পৰিমাণৰ তেল আৰু গেছ মজুত আছে। অৱশ্যে ইন্ধন লকডাউনৰ জল্পনা-কল্পনাৰ সৃষ্টি হৈছিল। মুঠৰ ওপৰত এইবাৰ মোডীৰ ৰাষ্ট্ৰক উদ্দেশ্যি দিয়া ভাষণক লৈ উৎকন্ঠিত হৈ ৰৈছে দেশবাসী।
