সমগ্ৰ দেশতে কভিড সংক্ৰমণৰ হাৰ তুংগত আছিল। হাজাৰ হাজাৰ লোকৰ মৃত্যু হৈছিল। সেই সময়ত ২০২১ চনৰ ২৯ মে’ত ‘পি এম কেয়াৰছ ফৰ চিলড্ৰেন স্কিম ফৰ ক’ভিড অনাথ আঁচনি’ নামেৰে চৰকাৰী শিশু সুৰক্ষা আঁচনি আৰম্ভ কৰা হৈছিল। ঘোষণা কৰা হৈছিল যে এই প্ৰকল্পই ২০২০ চনৰ ১১ মাৰ্চৰ পৰা ২০২৩ চনৰ ৫ মে’লৈ Covid মহামাৰীৰ বাবে অভিভাৱক নোহোৱাকৈ থকা শিশুসকলক সহায় কৰিব। অভিযোগ অনুসৰি এই প্ৰকল্পত চৰকাৰক দাখিল কৰা আবেদনৰ ৫১ শতাংশ আবেদন নাকচ কৰা হৈছে। কিন্তু কিয় এই আৱেদনসমূহ মানি লোৱা নহ’ল, কেন্দ্ৰীয় চৰকাৰৰ সদনৰ পৰা কোনো সন্তোষজনক উত্তৰ পোৱা নাই।
পি এম কেয়াৰছৰ অধীনত এই আঁচনিখনে ২৩ বছৰ বয়সলৈকে অনাথসকলক বিনামূলীয়া স্বাস্থ্য বীমা, শিক্ষা আৰু আৰ্থিক সাহায্য প্ৰদান কৰে। দত্তক সন্তানৰ পিতৃ-মাতৃৰ মৃত্যুৰ সময়তো একেই সকাহ আবণ্টন দিয়া হয়। পিতৃ-মাতৃ নথকা শিশুৰ অভিভাৱকৰ মৃত্যুৰ বাবেও চৰকাৰী সাহায্যৰ ব্যৱস্থা কৰাৰ কথা। চৰকাৰী নথি অনুসৰি দেশৰ ৩৩খন ৰাজ্য আৰু কেন্দ্ৰীয় শাসিত অঞ্চলৰ ৬১৩খন জিলাৰ পৰা মুঠ ৯৩৩১খন আৱেদন লাভ কৰা হৈছে। ইয়াৰ ভিতৰত ৩২খন ৰাজ্য আৰু কেন্দ্ৰীয় শাসিত অঞ্চলৰ ৫৫৮খন জিলাৰ পৰা মাত্ৰ ৪৫৩২খন আৱেদন অনুমোদন কৰা হৈছে। ইয়াতকৈ অধিক ৪৭৮১ টা আৱেদন নাকচ কৰা হয়। ১৮ খন আৱেদনৰ বাবে এতিয়াও সিদ্ধান্ত লোৱা হোৱা নাই। অনাথ শিশুক সহায়ৰ বাবে এনে আঁচনিৰ বাবে কিয় ইমান আৱেদন নাকচ হ’ল, সেই সন্দৰ্ভত নিশ্চিত উত্তৰ দিব পৰা নাই কেন্দ্ৰীয় মহিলা আৰু শিশু উন্নয়ন মন্ত্ৰালয়ে।
সৰ্বাধিক আৱেদন লাভ কৰিছিল ৰাজস্থান, মহাৰাষ্ট্ৰ আৰু উত্তৰ প্ৰদেশৰ পৰা (ক্ৰমে ১৫৫৩, ১৫১১ আৰু ১০০৭)। ৰাজস্থানত মাত্ৰ ২১০ খন, উত্তৰ প্ৰদেশত ৪৬৭ খন আৰু মহাৰাষ্ট্ৰত ৮৫৫ খন আৱেদন অনুমোদন কৰা হয়।
