গুৱাহাটী আমবাৰীৰ পৰা নুনমাটিলৈ নিৰ্মাণ কৰি থকা ফ্লাই’অভাৰ নিৰ্মাণাকাৰী সংস্থা ক্ৰমে গৌতম আৰু অনুপম কংষ্ট্ৰাকচনে সকলো নীতি-নিয়ম উলংঘা কৰাৰ ফলত ছাত্ৰ-ছাত্ৰী-ব্যৱসায়ীৰ লগতে সৰ্বসাধাৰণ ৰাইজে ভয়ংকৰ বিপদৰ সন্মুখীন হ’বলগীয়া হৈছে।
নিৰ্মাণকাৰী দুই প্ৰতিষ্ঠানে ৰাইজৰ সুৰক্ষাত কোনো গুৰুত্ব নিদি আৰু কোনো সুৰক্ষামূলক ব্যৱস্থা নোলোৱাকৈ কাম কৰি গৈছে। ইফালে দুইটা চাৰ্ভিচ ৰোড খলা-বমা হৈ যাতায়াতৰ অনুপযোগী হৈ পৰিছে যদিও মেৰামতিৰ বাবেও কোনো পদক্ষেপ লোৱা নাই। কোনো আঁৰ-বেৰ নিদিয়া কৈয়ে পথত প্ৰকাণ্ড গাঁত খান্দিছে। আৰু সমগ্ৰ পথছোৱা ধূলি-বালিয়ে আগুৰি পেলাইছে যদিও তাক নিষ্কাষণৰ বাবেও কোনো পদক্ষেপ গ্ৰহণ কৰা নাই।
নিৰ্মাণ প্ৰতিষ্ঠানৰ চূড়ান্ত হেমাহি আৰু দায়িত্বহীনতাৰ প্ৰতিবাদ জনাই আজি গুৱাহাটীৰ শিলপুখুৰীত ভাৰতৰ ছাত্ৰ ফেডাৰেছন (এছ এফ আই), ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই), নিখিল ভাৰত গণতান্ত্ৰিক মহিলা সমিতি (এ আই ডি ডব্লিউ এ) আৰু চি আই টি ইউৰ উদ্যোগত প্ৰতিবাদ সাব্যস্ত কৰে।
ইয়াৰ উপৰি সমগ্ৰ অঞ্চলটোৰ ব্যৱসায়-বাণিজ্য স্থবিৰ হৈ পৰিছে যদিও এই পৰ্যন্ত ক্ষতিগ্ৰস্ত ব্যৱসায়ীক ক্ষতিপূৰণ দিবলৈ কোনো পদক্ষেপ গ্ৰহণ কৰা পৰিলক্ষিত হোৱা নাই।
নিয়ম ভংগকাৰী দুই প্ৰতিষ্ঠানে শীঘ্ৰে ব্যৱস্থা গ্ৰহণ নকৰিলে আৰু ৰাইজৰ উপযোগী যাতায়ত ব্যৱস্থা নিশ্চিত নকৰিলে পুনৰ আন্দোলন কাৰ্যসূচী গ্ৰহণ কৰিব বুলি সংগঠন কেইটাৰ যৌথ নেতৃত্বই আজি প্ৰতিবাদস্থলীৰ পৰা সকিয়াই দিয়ে।
