আমেৰিকাৰ মিনিয়াপলিছত প্ৰব্ৰজন আইন বলবৎকাৰী ফেডাৰেল সংস্থা আইচিই এজেণ্টে এজন আমেৰিকান নাগৰিকক গুলীয়াই হত্যা কৰাৰ পিছত তীব্ৰ প্ৰতিবাদৰ সৃষ্টি হৈছে। স্থানীয় নেতাসকলে এই হত্যাকাণ্ডক গৰিহণা দিছে।
শনিবাৰে আইচিইৰ এজেণ্টে ৩৭ বছৰীয়া এলেক্স প্ৰিটিক গুলীয়াই হত্যা কৰে। আইচিইৰ এজেণ্টে তেওঁক মাটিত বগৰাই আটক কৰাৰ পিছত পিঠিত কেইবাবাৰো গুলীয়াই হত্যা কৰে।
চলিত মাহত মিনিয়াপলিছত আইচিইৰ গুলীত নিহত হোৱা এইজন দ্বিতীয়জন আমেৰিকান নাগৰিক। চলিত মাহৰ আৰম্ভণিতে আই চি ইয়ে ৰেনী গুড নামৰ এগৰাকী মহিলাক গুলীয়াই হত্যা কৰিছিল।
ট্ৰাম্প প্ৰশাসনৰ অনুপ্ৰৱেশ বিৰোধী নীতি আৰু কঠোৰ দমনৰ বিৰুদ্ধে প্ৰচণ্ড ঠাণ্ডাৰ মাজতো প্ৰতিবাদ সাব্যস্ত কৰি মিনিয়াপলিছত ১০ হাজাৰৰো অধিক লোকে ৰাজপথলৈ ওলাই অহাৰ এদিন পিছতে প্ৰিটিক গুলীওৱাৰ ঘটনা সংঘটিত হয়।
প্ৰিটিৰ গুলীচালনাৰ পিছতে অঞ্চলটোত সমবেত হয় শ শ প্ৰতিবাদকাৰী। তেওঁলোকৰ মুখামুখি হয় অস্ত্ৰধাৰী আৰু মাস্ক পৰিহিত আইচিইৰ সদস্যৰ। আইচিইৰ সদস্যসকলে প্ৰতিবাদকাৰীৰ ওপৰত কন্দুৱা গেছৰ গোলা আৰু ফ্লেছবেং গ্ৰেনেড নিক্ষেপ কৰে।
পৰিস্থিতি নিয়ন্ত্ৰণৰ বাবে ঘটনাস্থলীত উপস্থিত হয় নগৰ আৰক্ষী আৰু ৰাজ্যিক আইন প্ৰয়োগকাৰী সংস্থা। শনিবাৰে নিশা ফেডাৰেল এজেণ্টে অঞ্চলটো এৰি যোৱাৰ পিছত পৰিস্থিতি কিছু শান্ত হয়। অৱশ্যে কেইবা ঘণ্টা ধৰি ৰাজপথত আছিল প্ৰতিবাদকাৰীসকল।
এই কাণ্ডৰ ফলত কেৱল মিনিয়াপলিছতে নহয়, নিউয়ৰ্ক, ৱাশ্বিংটন ডি চি আৰু ছান ফ্ৰান্সিস্কোতো প্ৰতিবাদৰ সৃষ্টি হয়।
ইতিমধ্যে কেইবাটাও ঘটনাত ক্ষুব্ধ হৈ পৰিছে মিনিয়াপলিছৰ বাসিন্দাসকল। ইয়াৰ ভিতৰত গুডক হত্যা কৰা, ঘৰৰ পৰা চুটি কাপোৰ পিন্ধা অৱস্থাত এজন আমেৰিকান নাগৰিকক গ্ৰেপ্তাৰ কৰা, স্কুলীয়া ছাত্ৰ-ছাত্ৰীক গ্ৰেপ্তাৰ কৰা আদি অন্যতম।
স্থানীয় বিষয়াসকলে সকলোকে সংযম ৰাখিবলৈ আহ্বান জনাইছে। মিনিয়াপলিছৰ আৰক্ষী অধীক্ষক ব্রায়ান অ’হাৰাই কয়, “অনুগ্রহ কৰি আমাৰ চহৰখন ধ্বংস নকৰিব৷”
প্ৰিটি হত্যাকাণ্ডই স্থানীয় আৰু ফেডাৰেল বিষয়াসকলৰ মাজত উত্তেজনা বৃদ্ধি কৰিছে। ৭ জানুৱাৰীত আন এগৰাকী আমেৰিকান ৰেনী গুডক গুলীয়াই হত্যা কৰাক লৈ স্থানীয় বিষয়াৰ সৈতে ট্ৰাম্প প্ৰশাসনৰ মাজত মতানৈক্যৰ সৃষ্টি হৈছে।
আমেৰিকাৰ গৃহ নিৰাপত্তা সচিব ক্ৰীষ্টি ন’মে সাংবাদিকৰ আগত কয় যে শনিবাৰে নিহত হোৱা লোকজনে এজেণ্টক আক্ৰমণ কৰিছিল। অৱশ্যে তেওঁ অস্ত্ৰ উলিয়াইছিল নে নাই সেয়া তেওঁ কোৱা নাই।
ফেডাৰেল বিষয়াসকলে জনোৱা মতে, প্ৰিটিৰ হাতত এটা আগ্নেয়াস্ত্ৰ আছিল। অস্ত্ৰটোৰ এখন ফটো তেওঁলোকে মুকলি কৰে।
সংবাদমেলত নোমে কয় যে মানুহজন (প্ৰিটি) শান্তিপূৰ্ণভাৱে প্ৰতিবাদ কৰিবলৈ তালৈ যোৱা নাছিল। বৰঞ্চ তেওঁৰ উদ্দেশ্য আছিল হিংসাৰ।
অৱশ্যে স্থানীয় নেতাসকলে ফেডাৰেল চৰকাৰৰ এই দাবীক লৈ প্ৰশ্ন উত্থাপন কৰিছে। মিনেছ’টাৰ গৱৰ্ণৰ টিম ৱালজে কয় যে, “মই ভিডিঅ’টো বিভিন্ন কোণৰ পৰা চাইছো আৰু ই ভয়ংকৰ।”
গৱৰ্ণৰ টিম ৱালজেও কয় যে এই কাণ্ডৰ তদন্তৰ নেতৃত্ব দিবলৈ ফেডাৰেল চৰকাৰক বিশ্বাস কৰিব নোৱাৰি। বিষয়টো চম্ভালিব ৰাজ্য চৰকাৰে।
মিনেছ’টা ব্যুৰো অৱ ক্রিমিনেল ইনভেষ্টিগেশ্যনৰ মুৰব্বী ড্রু ইভান্সে কয় যে শনিবাৰে ফেডাৰেল এজেণ্টে তেওঁৰ দলটোক তদন্ত আৰম্ভ কৰাত বাধা দিছিল৷
মিনিয়াপলিছৰ আৰক্ষী অধীক্ষক ব্রায়ান অ’হাৰাই জনোৱা মতে, লোকজনৰ হাতত আইনী অস্ত্ৰ আছিল। তেওঁৰ কোনো অপৰাধজনিত অভিলেখ নাছিল। তেওঁৰ বিৰুদ্ধে মাত্ৰ কেইটামান ট্ৰেফিক উলংঘাৰ অভিযোগ উত্থাপন হৈছিল।
গৱৰ্ণৰ টিম ৱালজ আৰু অন্যান্য স্থানীয় বিষয়াসকলে ট্ৰাম্প প্ৰশাসনৰ অনুপ্ৰৱেশ বিৰোধী দমন শীঘ্ৰে বন্ধ কৰাৰ দাবী জনাইছে।
মিনিয়াপলিছৰ মেয়ৰ জেকব ফ্ৰেইয়ে এখন সংবাদমেলত প্ৰশ্ন কৰে যে, “এই দমন বন্ধ হোৱাৰ আগতে আৰু কিমান বাসিন্দা, আৰু কিমান আমেৰিকান নাগৰিকৰ মৃত্যু হ’ব লাগিব বা গুৰুতৰভাৱে আহত হ’ব লাগিব?”
আমেৰিকাৰ ৰাষ্ট্ৰপতি ড’নাল্ড ট্ৰাম্পে স্থানীয় নিৰ্বাচিত বিষয়াসকলে বিদ্ৰোহৰ উচটনি দিয়াৰ অভিযোগ উত্থাপন কৰিছে।
