শনিবাৰে তিতাবৰৰ জৱাহৰ নৱোদয় বিদ্যালয়ৰ এজন ছাত্ৰৰ মৃত্যুত চৌহদত প্ৰতিবাদৰ সৃষ্টি হয়। সহপাঠী ছাত্ৰ-ছাত্ৰীসকলে কৰ্তৃপক্ষৰ বিৰুদ্ধে অৱহেলাৰ অভিযোগ তুলি প্ৰতিবাদ সাৱ্যস্ত কৰে।
বাতৰি অনুসৰি মনি মাধৱ নামৰ ছাত্ৰজন কিছুদিনৰ পৰা অসুস্থ হৈ আছিল। তেওঁৰ পিতৃয়ে তেওঁক চিকিৎসাৰ বাবে ঘৰলৈ নিবলৈ বিদ্যালয়খনলৈ গৈছিল যদিও তেওঁক তেনে কৰাৰ অনুমতি দিয়া হোৱা নাছিল বুলি অভিযোগ উঠিছে।
এজন আত্মীয়ই কয়, ‘তেওঁ জ্বৰত আক্ৰান্ত আছিল আৰু স্কুলৰ নাৰ্চে ঔষধ যোগান ধৰিছিল যদিও ঔষধ খোৱাৰ পিছতো তেওঁৰ জ্বৰ কমা নাছিল। আছাম ট্ৰিবিউনৰ প্ৰতিবেদনত এই কথা প্ৰকাশ পাইছে।
জানিব পৰা মতে, জানুৱাৰী মাহৰ পৰা ছাত্ৰজন অসুস্থ হৈ আছিল। তেওঁৰ স্বাস্থ্যৰ অৱস্থাৰ অৱনতি ঘটাৰ লগে লগে অৱশেষত বিদ্যালয় কৰ্তৃপক্ষই পৰিয়ালটোক খবৰ দিয়ে।
আত্মীয়জনৰ অভিযোগ, ‘অৱশ্যে যেতিয়া তেওঁৰ স্বাস্থ্যৰ অৱনতি ঘটিবলৈ ধৰিলে তেতিয়া হাউচমাষ্টৰে অভিভাৱকক খবৰ দিলে, কিন্তু ভাৰপ্ৰাপ্ত শিক্ষকজনে সেই সময়ত অধ্যক্ষ উপস্থিত নথকাৰ বাবে অধ্যক্ষৰ অনুমোদন অবিহনে ছাত্ৰজনক যাবলৈ অনুমতি নিদিলে। ভাৰপ্ৰাপ্ত শিক্ষকজনে আনকি ছাত্ৰজনে অভিনয় কৰা বুলিহে দাবী কৰিছিল।’
সহপাঠী ছাত্ৰ-ছাত্ৰীৰ বাৰে বাৰে অনুৰোধৰ পিছতহে বিদ্যালয় প্ৰশাসনে তেওঁক যাবলৈ অনুমতি দিছিল বুলি পৰিয়ালৰ লোকে দাবী কৰে। চিকিৎসাৰ বাবে নিয়াৰ পিছতো ছাত্ৰজনৰ ধেমাজিত মৃত্যু হয়।
ঘটনাৰ পিছতে জৱাহৰ নৱোদয় বিদ্যালয়, তিতাবৰৰ ছাত্ৰ-ছাত্ৰীসকলে চৌহদৰ ভিতৰতে প্ৰতিবাদ সাব্যস্ত কৰি কি কাৰণে হোৱা মৃত্যুৰ পৰিস্থিতি ঘটিল তাৰ সম্পূৰ্ণ তদন্তৰ দাবী জনায়।
ভুক্তভোগীৰ আত্মীয়জনে লগতে কয়, ‘মই বিষয়টোৰ উপযুক্ত তদন্ত বিচাৰো। যদি পুনৰ এনেধৰণৰ ঘটনা ঘটে তেন্তে কোনে দায়িত্ব ল’ব? এইটো প্ৰথম ঘটনা নহয়, ইয়াৰ আগতে একেধৰণৰ ঘটনাত এগৰাকী ছাত্ৰীৰো মৃত্যু ঘটিছিল।‘
ইপিনে, বিদ্যালয় কৰ্তৃপক্ষ আৰু তিতাবৰ মহকুমা প্ৰশাসনে চৌহদত সংবাদ মাধ্যমৰ প্ৰৱেশ নিষিদ্ধ কৰা বুলি জানিব পৰা গৈছে।
