চলিত আইপিএল-২০২৬ৰ ৬৮ সংখ্যক খেলত পঞ্জাৱ আৰু লক্ষ্ণৌ মুখামুখি হয়। পঞ্জাৱৰ বাবে সেয়া আছিল বৰ্তি থকাৰ যুঁজ। গুৰুত্বপূৰ্ণ খেলখনত অধিনায়ক শ্ৰেয়াছ আয়াৰে দলটোক দুৰ্দান্ত বেটিং প্ৰদৰ্শনেৰে জয়ৰ দিশে আগুৱাই লৈ যায়। দুটা অভাৰ বাকী থকা অৱস্থাত পঞ্জাবে ৭ উইকেটত জয়লাভ কৰে। ফলত ১৫ পইণ্টেৰে চতুৰ্থ স্থানলৈ উন্নীত হয় পঞ্জাৱ। লগতে শেষৰ চাৰিটা স্থানত উপনীত হোৱাৰ আশাও জীয়াই ৰাখিলে।
টছত জয়ী হৈ পঞ্জাবে প্ৰথমে বলিং কৰাৰ সিদ্ধান্ত লয়। প্ৰথমে বেটিং কৰি লক্ষ্ণৌৱে ৬টা উইকেট হেৰুৱাই ১৯৬ ৰান সংগ্ৰহ কৰে। এই ৰানত যশ ইংলিছে সৰ্বাধিক অৰিহণা যোগায়। তেওঁৰ ৪৪ বলৰ ৭২ ৰানৰ ইনিংছত ৯টা চাৰি আৰু ২টা ছয় আছিল।
তেওঁ আউট হোৱাৰ পিছত বেটিঙত আন কোনোৱে বিশেষ চমক দেখুৱাব পৰা নাছিল। আয়ুষ বদোনীয়ে চেষ্টা কৰিছিল যদিও ৪৩ ৰান কৰি ড্ৰেছিং ৰুমলৈ উভতি যায়। বাকীসকলৰ ভিতৰত আব্দুল ছামাদ (৩৭), ঋষভ পন্ত (২৬), অৰ্জুন তেণ্ডুলকাৰ (৫), নিকোলাছ পুৰাণ (২), মুকুল চৌধুৰী (১) ৰানৰ অৰিহণা যোগায়।
ইয়াৰ প্ৰত্যুত্তৰত পঞ্জাৱে আৰম্ভণিতে প্ৰিয়ংশ আৰ্য্যৰ উইকেট হেৰুৱায় যদিও সতীৰ্থসকলে নিয়ন্ত্ৰণ কৰিবলৈ সক্ষম হয়। পঞ্জাৱৰ বেটছমেনে খুতি পুতি বহি ৰ’ল। এই জয়ৰ মূল কাৰণ আছিল অধিনায়ক শ্ৰেয়াছ আয়াৰ। ৫১টা বলৰ পৰা তেওঁৰ ১০১ ৰান (অপৰাজিত) ইনিংছত দলটোৱে এখন গুৰুত্বপূৰ্ণ মেচত জয়লাভ কৰে। তেওঁৰ ইনিংছত ১১টা চাৰি আৰু ৫টা ছয় আছিল।
তদুপৰি প্ৰভসিমৰণেও শ্ৰেয়াছৰ সৈতে সংগ দিয়ে। তেওঁ ৩৯টা বলত ৬৯ ৰানৰ আক্ৰমণাত্মক ইনিংছ খেলিছিল। কুপাৰ কনলি (১৮) আৰু সূৰ্য্যংশে (৯) সামান্য ৰানৰ অৰিহণা যোগায়।
পঞ্জাৱৰ হৈ মাৰ্কো জান্সেন আৰু যুজবেন্দ্ৰ চাহালে ২টাকৈ উইকেট দখল কৰে। ইয়াৰ উপৰিও এ ওমৰজাই আৰু শশাংক সিঙে ১টাকৈ উইকেট দখল কৰে।
আনহাতে, লক্ষ্ণৌৰ বলিং সম্পূৰ্ণ নিষ্ক্ৰিয় হৈ পৰিছিল। মহম্মদ ছামীয়ে ২টা আৰু অৰ্জুন তেণ্ডুলকাৰে ১টা উইকেট দখল কৰে। ইয়াৰ বাহিৰে বাকীবোৰ সফল নহ’ল।
