সাহিত্যিক, বিশিষ্ট ঔপন্যাসিকা পূৰবী বৰমুদৈৰ আজি পুৱা ৬ বজাত গুৱাহাটী মেডিকেল কলেজ হাস্পতালত দেহাৱসান হয়। দীৰ্ঘদিন ধৰি অসুস্থ হৈ থকা বৰমুদৈ গুৱাহাটী মেডিকেল কলেজ হাস্পতালত চিকিৎসাধীন অৱস্থাত আছিল।
বুৰঞ্জীমূলক উপন্যাসৰ ৰচিয়তা পূৰবী বৰমুদৈৰ ১৯৫০ চনৰ ৮ মে’ত তেজপুৰৰ দেউৰীগাঁৱত জন্ম হৈছিল। ১৯৬৭ চনত পূৰবী বৰমুদৈয়ে তেজপুৰ উচ্চতৰ মাধ্যমিক বহুমুখী বালিকা বিদ্যালয়ৰ পৰা উচ্চতৰ মাধ্যমিক পৰীক্ষাত উত্তীৰ্ণ হৈ ১৯৭০ চনত দৰং মহাবিদ্যালয়ৰ পৰা স্নাতক ডিগ্ৰী লাভ কৰে। ইয়াৰ পিছতে গুৱাহাটী বিশ্ববিদ্যালয়ৰপৰা ১৯৭৩ চনত বুৰঞ্জী বিষয়ত স্নাতকোত্তৰ ডিগ্ৰী লাভ কৰে।
উল্লেখযোগ্য যে বিশিষ্ট ঔপন্যাসিকাগৰাকীয়ে প্ৰথম অৱস্থাত শিক্ষকৰ চাকৰি লাভ কৰিছিল যদিও সাহিত্য চৰ্চাৰ বাবে শিক্ষকৰ চাকৰি ত্যাগ কৰিছিল।
প্ৰথমে কবিতা ৰচনাৰে সাহিত্যিক জীৱনৰ পাতনি মেলা বৰমুদৈৰ প্ৰথম উপন্যাস ‘গজৰাজ প্ৰেম আৰু বন্দীত্ব’ প্ৰকাশ পাইছিল ১৯৯৯ চনত।
ইয়াৰ পিছৰে পৰা ঔপন্যাসিকা গৰাকীয়ে ‘বাঘশাল, বাঘজাল আৰু মানুহ’, (২০০২ চন), ‘ৰূপোৱালী নৈৰ সোণোৱালী ঘাট’ (২০০১চন), ‘শান্তনুকুলনন্দন’ (২০০৫ চন) আদিকে ধৰি কেইবাখনো ঔপন্যাস লিখিছিল।
বিশিষ্ট ঔপন্যাসিকা গৰাকীয়ে ১৯৭৬ চনত বিশিষ্ট শিক্ষাবিদ, সমালোচক আনন্দ বৰমুদৈৰ লগত বিবাহ পাশত আবদ্ধ হয়। বৰমুদৈয়ে তেওঁৰ সৃষ্ট সাহিত্যৰ বাব বিভিন্ন বঁটা লাভ কৰিবলৈ সক্ষম হৈছিল।
২০০০চনত ‘বাসন্তী বৰদলৈ বঁটা'( গজৰাজ, প্ৰেম আৰু বন্দীত্ব), ২০০৬ চনত সদৌ অসম লেখিকা সমাৰোহৰ প্ৰথম লেখিকা বঁটা, ২০০৭ চনত প্ৰবীণা শইকীয়া বঁটা, ২০০৭ চনত সাহিত্য অকাডেমী বঁটা আৰু ২০১১ চনত অসম উপত্যকা বঁটাকে ধৰি আৰু বিভিন্ন বঁটা লাভ কৰিছিল সাহিত্যিক পূৰবী বৰমুদৈয়ে।
পূৰবী বৰমুদৈৰ দেহাৱসান অসমীয়া সাহিত্য জগতৰ বাবে এক আপুৰুগীয়া ক্ষতি। সাহিত্যিক গৰাকীৰ মৃত্যুৰ বাতৰিয়ে সমগ্ৰ ৰাজ্যত শোকৰ ছাঁ পেলাইছে।
