পুৰীৰ ৰথ যাত্ৰাত বিশৃংখলতা। দেওবাৰে পুৱা পুৰীৰ গুণ্ডিচা মন্দিৰৰ সমীপত সংঘটিত পদপিষ্টৰ ঘটনাত কমেও তিনিজন লোকৰ মৃত্যু হোৱাৰ খবৰ পোৱা গৈছে। আৰু বহু লোক আহত হয়।
পুৰীৰ মূল মন্দিৰৰ পৰা গুণ্ডিচা মন্দিৰৰ দূৰত্ব প্ৰায় তিনি কিলোমিটাৰ। কিন্তু এই তিনি কিলোমিটাৰ পথ অতিক্ৰম কৰি থাকোঁতে তিনিখন ৰথ— নন্দিঘোষ, তালধৱাজ আৰু দৰ্পাদলন— বাৰে বাৰে আবদ্ধ হৈ পৰিল। এই তিনিখন ৰথত জগন্নাথ, বলোভদ্ৰ, আৰু সুভদ্ৰাৰ মূৰ্তি আছিল। যদিও শুকুৰবাৰে মূল মন্দিৰৰ পৰা গুণ্ডিচা মন্দিৰলৈ ৰাওনা হয়, তথাপিও গন্তব্য স্থানত উপনীত হ’ব পৰা নাছিল। শনিবাৰে তিনিখন ৰথ উপস্থিত হয় গুণ্ডিচা মন্দিৰত। কিন্তু শনিবাৰে জগন্নাথ, বলোভদ্ৰ আৰু সুভদ্ৰাক ৰথৰ পৰা নমাই দিব নোৱাৰিলে। গোটেই ৰাতি তিনিখন ৰথৰ চাৰিওফালে বহু ভক্তৰ ভিৰ। আৰক্ষী আৰু প্ৰশাসনৰ নিৰ্দেশ অমান্য কৰি ভক্তই ৰথৰ ওচৰ পাবলৈ চেষ্টা কৰিছিল। আৰু তাতেই এই পৰিস্থিতিৰ সৃষ্টি হয়।
দেওবাৰে মাজনিশাৰ পৰা গুণ্ডিচা মন্দিৰৰ সমীপত ভগৱান জগন্নাথৰ ৰথ ঘেৰাও কৰা জনসমাগম বৃদ্ধি পাবলৈ ধৰিলে। সংবাদ মাধ্যমৰ সূত্ৰৰ পৰা জানিব পৰা মতে, পুৱা প্ৰায় ৪:৩০ বজাত মন্দিৰৰ ফালে ৰথবোৰ গতি কৰিবলৈ আৰম্ভ কৰাৰ লগে লগে ৰাইজৰ মাজত বিশৃংখলতাৰ সৃষ্টি হয়। কিছুমান মানুহ ভিৰৰ মাজত পৰিল। পদপিষ্ট হৈ তিনিজন লোকৰ থিতাতে মৃত্যু হয়। মৃতসকলৰ ভিতৰত আছিল দুগৰাকী মহিলা— প্ৰভাতী দাস আৰু বসন্তী চাহু। আনজন হৈছে প্ৰেমাকান্ত মহন্ত। জানিব পৰা মতে তিনিওজনেই ওড়িশাৰ খুৰ্দা জিলাৰ বাসিন্দা। তেওঁ ৰথ যাত্ৰাৰ বাবে পুৰীলৈ আহিছিল। এই ঘটনাত কেইবাজনো লোক আহত হয়। উদ্ধাৰ কৰি ততাতৈয়াকৈ চিকিৎসালয়লৈ প্ৰেৰণ কৰা হয়।
শুকুৰবাৰে পুৱাৰে পৰা ৰথ উৎসৱৰ বাবে দীঘা জনসমাগমেৰে ভৰি পৰিছিল। তথ্য অনুসৰি শুকুৰবাৰে পুৰীত লোকৰ সংখ্যা আছিল প্ৰায় ১৩ লাখ। কিন্তু শুকুৰবাৰৰ পৰা যাত্ৰা আৰম্ভ হ’লেও তিনিখন ৰথ তাত উপস্থিত হ’ব পৰা নাছিল। তাৰ পূৰ্বে ৰাইজৰ হেঁচাত ৬০০ লোক অসুস্থ হৈ পৰে। এতিয়াও কমেও ৭০জন লোক চিকিৎসালয়ত ভৰ্তি হৈ আছে।
