ভাৰতৰ ঔষধ মহানিয়ন্ত্ৰকে চমুকে ডিচিজিআই দেশৰ প্ৰথমটো ডেংগু ভেকচিনৰ বজাৰ অনুমোদন প্ৰদান কৰিছে। টেকেডা বায়’ফাৰ্মাচিউটিকেলছ ইণ্ডিয়া নামৰ প্ৰতিষ্ঠানটোৱে বিকাশ কৰা ‘কিউডেংগা’ নামৰ এই ভেকচিনবিধ ৪ ৰ পৰা ৬০ বছৰ বয়সৰ লোকৰ বাবে অনুমোদন জনোৱা হৈছে। এই ভেকচিনৰ আটাইতকৈ গুৰুত্বপূৰ্ণ দিশটো হ’ল যে ইয়াক গ্ৰহণ কৰাৰ পূৰ্বে ব্যক্তিসকলে পূৰ্বতে ডেংগুত আক্ৰান্ত হৈছিল নে নাই, সেয়া পৰীক্ষা কৰাৰ কোনো প্ৰয়োজন নহ’ব। যোগ্য ব্যক্তিসকলে টিকাকৰণৰ পূৰ্বৰ স্ক্ৰীণিঙৰ অবিহনেই এই ভেকচিন গ্ৰহণ কৰিব পাৰিব।
টেকেডাই প্ৰকাশ কৰা অনুসৰি, এই অনুমোদন ভাৰতৰ ডেংগু প্ৰতিৰোধৰ যুঁজত এক বৃহৎ মাইলৰ খুঁটি। ‘কিউডেংগা’ ভেকচিনবিধ ০.৫ মিলিলিটাৰকৈ দুটা পালি হিচাপে ছালৰ তলত প্ৰদান কৰা হ’ব আৰু দুয়োটা পালিৰ মাজত তিনি মাহৰ ব্যৱধান থাকিব। ভেকচিনবিধৰ অনুমোদন টেকেডাৰ গোলকীয় ক্লিনিকেল পৰীক্ষণৰ ফলাফলৰ ওপৰত আধাৰিত। ডেংগুৰ প্ৰাদুৰ্ভাৱ থকা আৰু নথকা দুয়োবিধ অঞ্চলৰ ২৮,০০০ তকৈ অধিক অংশগ্ৰহণকাৰীৰ মাজত সম্পন্ন হোৱা ১৯ টা পৰ্যায়ৰ (প্ৰথম, দ্বিতীয় আৰু তৃতীয় পৰ্যায়) ক্লিনিকেল পৰীক্ষণৰ অন্তত এই সিদ্ধান্ত গ্ৰহণ কৰা হৈছে। ভাৰতত সম্পন্ন হোৱা ‘ডিইএন-৩০২’ নামৰ তৃতীয় পৰ্যায়ৰ ক্লিনিকেল পৰীক্ষণৰ ফলাফলেও ৪ ৰ পৰা ৬০ বছৰ বয়সৰ লোকৰ শৰীৰত এই ভেকচিনৰ সুৰক্ষা আৰু ৰোগ প্ৰতিৰোধ ক্ষমতাক নিশ্চিত কৰিছে।
টেকেডাৰ আন্তঃমহাদেশীয় বজাৰৰ মুৰব্বী মহেন্দ্ৰ নায়কে এই প্ৰসংগত কয় যে ২০২২ চনত মুকলি হোৱাৰ পিছৰে পৰা ‘কিউডেংগা’ই ৪৩ খন দেশত অনুমোদন লাভ কৰিছে আৰু গোলকীয়ভাৱে ৩ কোটি ২০ লাখৰো অধিক পালি বিতৰণ কৰা হৈছে। তেওঁ লগতে কয় যে এই অনুমোদনে ভাৰতত ডেংগু প্ৰতিৰোধ ব্যৱস্থা শক্তিশালী কৰাৰ ক্ষেত্ৰত এক গুৰুত্বপূৰ্ণ পদক্ষেপ হিচাপে কাম কৰিব। প্ৰতিষ্ঠানটোৱে দাবী কৰা অনুসৰি, যোৱা সাত বছৰৰ দীৰ্ঘম্যাদী তথ্যই প্ৰমাণ কৰিছে যে এই ভেকচিনে ডেংগু ভাইৰাছৰ চাৰিওটা চেৰ’টাইপৰ বিৰুদ্ধে নিৰন্তৰ সুৰক্ষা প্ৰদান কৰে আৰু ৰোগীক চিকিৎসালয়ত ভৰ্তি হোৱাৰ পৰা ৰক্ষা কৰে।
টেকেডাৰ দক্ষিণ-পূব এছিয়া আৰু ভাৰতীয় শাখাৰ চিকিৎসা পৰিক্ৰমাৰ মুৰব্বী গোহ চু বেঙে প্ৰকাশ কৰে যে পূৰ্বৰ সংক্ৰমণৰ অৱস্থা যিয়েই নহওক কিয়, ‘কিউডেংগা’ই ডেংগুৰ চাৰিওটা চেৰ’টাইপৰ পৰা সুৰক্ষা প্ৰদান কৰিবলৈ সক্ষম। তেওঁ কয় যে ৰোগবাহক নিয়ন্ত্ৰণ, নিৰীক্ষণ আৰু জনসজাগতাৰ লগতে এই ভেকচিনৰ অনুমোদনে ভাৰতৰ সামগ্ৰিক ডেংগু প্ৰতিৰোধ ব্যৱস্থাক অধিক সুদৃঢ় কৰিব। উল্লেখযোগ্য যে বিশ্ব স্বাস্থ্য সংস্থায়ো (WHO) ডেংগু প্ৰৱণ অঞ্চলসমূহত এই ভেকচিন ব্যৱহাৰৰ বাবে পৰামৰ্শ আগবঢ়াইছে আৰু গুণগত মান, সুৰক্ষা তথা কাৰ্যকাৰিতাৰ ক্ষেত্ৰত ইয়াক আন্তঃৰাষ্ট্ৰীয় স্বীকৃতি প্ৰদান কৰিছে। ইয়াৰ জৰিয়তে ইউনিচেফ আৰু পান আমেৰিকান হেল্থ অৰ্গেনাইজেশ্যনৰ দৰে সংস্থাসমূহেও এই ভেকচিন ক্ৰয় কৰাৰ যোগ্যতা অৰ্জন কৰিছে।
বিশ্বৰ ১২৫ খনতকৈও অধিক দেশত প্ৰভাৱ বিস্তাৰ কৰা মহামাৰী ডেংগুৰ গোলকীয় বোজাৰ প্ৰায় এক-তৃতীয়াংশ কেৱল ভাৰতেই বহন কৰি আহিছে। দ্ৰুত নগৰীকৰণ, জলবায়ু পৰিৱৰ্তন আৰু মহৰ বংশবৃদ্ধিৰ বাবে সমগ্ৰ দেশত এই সংক্ৰমণৰ আশংকা ক্ৰমান্বয়ে বৃদ্ধি পাইছে। এনে এক স্পৰ্শকাতৰ সময়ত ‘কিউডেংগা’ৰ বজাৰ অনুমোদনে দেশৰ জনস্বাস্থ্য খণ্ডলৈ আশাৰ বতৰা কঢ়িয়াই আনিছে। পৰৱৰ্তী সময়ত এই ভেকচিন সাধাৰণ ৰাইজৰ বাবে কেতিয়াৰ পৰা উপলব্ধ হ’ব আৰু ৰাজহুৱা টিকাকৰণ কাৰ্যসূচীত ইয়াক কেনেদৰে অন্তৰ্ভুক্ত কৰা হ’ব, সেয়া চৰকাৰ আৰু সংশ্লিষ্ট কৰ্তৃপক্ষৰ পৰৱৰ্তী কাৰ্যপন্থাৰ পাছতহে স্পষ্ট হ’ব।
