চুৰাটৰ বিশেষ অৰ্থনৈতিক মণ্ডলৰ ফায়াৰ ষ্টাৰ ডাইমণ্ড ইউনিটত অগ্নিকাণ্ড সংঘটিত গৈছে। এই ইউনিটটো পলাতক নীৰৱ মোডীৰ সৈতে জড়িত। দুদিন ধৰি ঘটা এই অগ্নিকাণ্ডৰ ঘটনাই সকলোৰে মনত সন্দেহৰ সৃষ্টি কৰিছে। বহুতে সন্দেহ কৰে যে এই ঘটনাটো কেৱল এক দুৰ্ঘটনা নে ইয়াৰ আঁৰত প্ৰমাণ ধ্বংস কৰাৰ ইচ্ছাকৃত প্ৰচেষ্টা আছে।
বৃহস্পতিবাৰে নিশা ফায়াৰ ষ্টাৰ ডাইমণ্ডৰ তলৰ মহলাত প্ৰথমটো অগ্নিকাণ্ড সংঘটিত হয়। বহু বছৰৰ আগতেই চুৰাটৰ শচীন পথত অৱস্থিত এই ঠাইখন বলবৎকাৰী সঞ্চালকালয়ে (ইডি) ছীল কৰি দিছিল। ঘটনাৰ খবৰ পাই অগ্নিনিৰ্বাপক বাহিনীয়ে ক্ষীপ্ৰতাৰে অঞ্চলটোত উপস্থিত হয়। কিন্তু দুৰ্ঘটনাটোৰ এদিন পিছত অৰ্থাৎ শুকুৰবাৰে একে ঠাইতে পুনৰ অগ্নিকাণ্ড সংঘটিত হয়।
প্ৰায় ছয় ঘণ্টাৰ চেষ্টাৰ অন্তত নিয়ন্ত্ৰণলৈ অনা হয় অগ্নিকাণ্ড। কিন্তু জনা গৈছে যে জুই নিয়ন্ত্ৰণ কৰাৰ আগতেই সকলো সম্পূৰ্ণৰূপে জ্বলি গৈছিল। অগ্নিনিৰ্বাপক বাহিনীয়ে কয়, “ভিতৰৰ সকলো বস্তু ছাইলৈ পৰিণত হৈছে। এচি ইউনিট, কম্পিউটাৰ, আচবাব, ছেফ, মেচিন একো ৰক্ষা পৰা নাই। আনকি গুৰুত্বপূৰ্ণ নথি-পত্ৰও সম্পূৰ্ণৰূপে জ্বলি গৈছে।” অৱশ্যে এই ঘটনাত কোনো লোক আহত বা হতাহতৰ খবৰ পোৱা নাই।
বহু বছৰৰ আগতে ইডিয়ে ছীল কৰি দিছিল ফায়াৰ ষ্টাৰ ডাইমণ্ড। এই দোকানখনৰ বিদ্যুৎ সংযোগ, পানীৰ লাইন আৰু নলা বন্ধ কৰি দিয়া হৈছে। ইয়াৰ ফলত বিদ্যুতৰ সংযোগ নথকা ঠাইত কেনেকৈ জুই লাগিব পাৰে সেই প্ৰশ্ন উত্থাপন হৈছে। একেৰাহে দুটাকৈ অগ্নিকাণ্ড সংঘটিত হোৱাৰ পাছত সকলোৰে মনত সন্দেহ বাঢ়িছে। ইয়াৰ উপৰিও সংস্থাটোৰ দুৱাৰ-খিৰিকী ভাঙি থকা বুলিও জনা গৈছে।
এজন বিষয়াই কয়, “এয়া মুকলি ঔদ্যোগিক অঞ্চল নহয়। ইয়াত প্ৰৱেশৰ ওপৰত কঠোৰ নিয়ন্ত্ৰণ আছে।” তেওঁ লগতে কয় যে “যদি কোনোবাই ছীল কৰা অঞ্চলত প্ৰৱেশ কৰে, তেন্তে ই গুৰুতৰ নিৰাপত্তা ভংগৰ ইংগিত।”
ঘটনা সন্দৰ্ভত আৰক্ষীয়ে তদন্ত আৰম্ভ কৰিছে। কিন্তু সকলো নথি-পত্ৰ জ্বলি যোৱাৰ লগতে প্ৰৱেশদ্বাৰ ভাঙি থকাৰ কাৰণে সকলোৰে ধাৰণা যে ফায়াৰ ষ্টাৰ ডাইমণ্ডৰ জুই এতিয়া সাধাৰণ অগ্নিকাণ্ডৰ ঘটনা নহয়।
