শান্ত হোৱা নাই ৰাভা জনগোষ্ঠীয় সংগঠন সমূহ! চৰকাৰে জনজাতিসকলৰ বিৰুদ্ধে লোৱা সিদ্ধান্ত বাতিল কৰিবলৈ দাবী এইবাৰ ৰাভা জাতীয় যুৱ পৰিষদৰ ৷ চৰকাৰে সিদ্ধান্ত সলনি নকৰিলে তীব্ৰ আন্দোলনৰ হুংকাৰ সংগঠনটোৰ৷
দুধনৈত আয়োজন কৰা এক সংবাদমেলত ৰাভা জাতীয় যুৱ পৰিষদে উল্লেখ কৰে যে, Forest Dwellars act-2006 মৰ্মে জনজাতি সকলৰ লগতে পৰম্পৰাগত বন নিবাসী সকলক সুদীৰ্ঘ ১৫ বছৰে ভূমি আৱন্টনৰ ব্যবস্থা নকৰি ট্ৰাইবেল বেল্ট আৰু ব্লকৰ ভূমি অ-জনজাতি লোক আৰু বণিক গোষ্ঠীক ভূমি আবন্টন, লীজ, আৰু হস্তান্তৰ কৰাৰ অগাধ ক্ষমতা গুৱাহাটী মহানগৰ আৰু গ্ৰাম্য জিলাৰ উপায়ুক্ত সকলক প্ৰদান কৰিব বিচৰা চৰকাৰী কেবিনেট বৈঠকৰ হঠকাৰী সিদ্ধান্তৰ বিৰোধিতাৰে তীব্ৰ প্ৰতিবাদ জনাইছোঁ ৷
দুধনৈ পৰিদৰ্শন ভৱন ভৱনৰ সভাকক্ষত আয়োজিত এক সংবাদ মেলত সগঠনটোৰ নেতাদ্বয় ক্ৰমে প্ৰফুল্ল ৰাভা আৰু প্ৰফুল্ল ৰংখই সংবাদ মাধ্যমক কয় যে, চৰকাৰৰ এই সিদ্ধান্তই জনজাতি লোকসকলৰ জাতীয় সত্বা, অস্তিত্বৰ প্ৰতি সংকট নমাই আনিব৷
আনহাতে, ৰাভা হাছং পৰিষদখনলৈও এই সিদ্ধান্তই প্ৰবল ভাবুকি কঢ়িয়াই আনিব৷
সংগঠনটোৱে চৰকাৰৰ এই সিদ্ধান্তক পুনৰ বিবেচনাৰ বাবে আহ্বান জনাই কয় যে যদিহে চৰকাৰে এই সিদ্ধান্ত বাতিল নকৰে তেতিয়া ৰাভা জাতীয় যুৱ পৰিষদে হাত সাৱটি বহি নাথিকিব৷
জনজাতীয় লোক সকলৰ ভূমিৰ অধিকাৰ সুৰক্ষিত হৈ থকাৰ স্বাৰ্থত আন্দোলনৰ কাৰ্যসূচী গ্ৰহণ কৰিব বুলিও চৰকাৰক সকীয়াই দিয়ে ৰাভা জাতীয় যুৱ পৰিষদে ৷
এনেদৰে এতিয়া এটাৰ পিচত আন এটা ৰাভা সংগঠনে হুংকাৰ প্ৰদান কৰিছে চৰকাৰক ৷ এই ক্ষেত্ৰত চৰকাৰে ব্যৱস্থা গ্ৰহণ নকৰিলে যে পুনৰ উত্তপ্ত হ’ব ৰাভা হাছং এলেকা সেয়া নিশ্চিত ৷
