পাঁচ ‘ফৰাচী যোদ্ধা’ই দুৰন্ত গতিৰে আহি আছে ভাৰতৰ দিশে।
চীন-পাকিস্তান আদি দেশৰ পৰা ভাৰতৰ প্ৰতি অহৰহ ভাবুকি আহি থকাৰ সময়তে এই পাঁচ ফৰাচী যোদ্ধা আহিছে ভাৰতক সহায় কৰিবলৈ।
এই পাঁচ ফৰাচী যোদ্ধা আন একো নহয়। এয়া হৈছে ফ্ৰান্সে ভাৰতলৈ প্ৰেৰণ কৰা পাঁচ খন ৰাফেল যুদ্ধ বিমান।
ভাৰতে ফ্ৰান্সৰ পৰা ৩৬ খন ৰাফেল বিমান ক্ৰয় কৰাৰ বাবে ফ্ৰান্সৰ চৰকাৰৰ সৈতে চুক্তিত স্বাক্ষৰ কৰিছিল।
সমগ্ৰ বিশ্ব জুৰি হৈ থকা ক’ৰ’ণাতংকৰ বাবে ফ্ৰান্সে ভাৰতলৈ ৰাফেল বিমান প্ৰেৰণ কৰিব পৰা নাছিল।
এতিয়া চীনৰ সৈতে ভাৰতৰ সংঘাত সৃষ্টি হোৱাৰ পিছতে ভাৰতৰ অনুৰোধ ৰক্ষা কৰি ফ্ৰান্সে ভাৰতলৈ প্ৰেৰণ কৰিছে পাঁচখন ৰাফেল বিমান।
যুদ্ধক্ষেত্ৰত শত্ৰু পক্ষৰ ওপৰত চিলাৰ দৰে জঁপিয়াই পৰিব পৰা এই বিমান কেইখন ফ্ৰান্সৰ পৰা উৰুৱাই আনিছে ভাৰতীয় বায়ু সেনাৰ ১২ গৰাকী পাইলটে।
মঙলবাৰে বিমান কেইখন আহি উপস্থিত হয় সংযুক্ত আৰৱ গণ ৰাজ্যৰ অল ডাৰফাৰ বিমান বন্দৰত।
ক্ষন্তেক জিৰণিৰ অন্তত পুনৰ ভাৰতমুখী যাত্ৰা পাঁচো খন বিমানৰ।
২৯ জুলাইত ভাৰতৰ আম্বালা বিমান ঘাটিত আহি উপস্থিত হ’ব যুদ্ধ বিমান কেইখন। ৰাফেল বিমানৰ আগমণে নিঃসন্দেহে শক্তিশালী কৰি তুলিব দেশৰ প্ৰতিৰক্ষা ক্ষেত্ৰখনক।
