শুকুৰবাৰে আম আদমী পাৰ্টীৰ (আপ) জ্যেষ্ঠ নেতা তথা সাংসদ ৰাঘৱ চাদ্দাই নিজৰ দলৰ বিৰুদ্ধে তীব্ৰ ক্ষোভ প্ৰকাশ কৰে। ৰাজ্যসভাৰ উপ-দলপতি পদৰ পৰা অপসাৰণ কৰাৰ এদিন পিছতে সাংসদগৰাকীয়ে অভিযোগ উত্থাপন কৰে যে দলে তেওঁক সংসদত মাত মাতিবলৈ বাধা প্ৰদান কৰিছে। সামাজিক মাধ্যম এক্সত (পূৰ্বৰ টুইটাৰ) এটা ভিডিঅ’ বাৰ্তাযোগে চাদ্দাই স্পষ্ট কৰি দিয়ে যে তেওঁক “নীৰৱ কৰোৱা হৈছে, কিন্তু পৰাজিত কৰিব পৰা নাই।”
ভিডিঅ’ বাৰ্তাটোত ৰাঘৱ চাদ্দাই প্ৰশ্ন কৰে যে যেতিয়াই তেওঁ সংসদত সুযোগ পায়, তেতিয়াই সাধাৰণ মানুহৰ সৈতে জড়িত গুৰুত্বপূৰ্ণ বিষয়সমূহ উত্থাপন কৰে। কিন্তু ৰাইজৰ সমস্যাৰ কথা কোৱাটো অপৰাধ নেকি বুলি তেওঁ খেদ প্ৰকাশ কৰে। চাদ্দাই দাবী কৰে যে আপ নেতৃত্বই ৰাজ্যসভাৰ সচিবালয়ক অৱগত কৰিছে যাতে তেওঁক সংসদত ভাষণ দিবলৈ সময় দিয়া নহয়। ভিডিঅ’টোৰ অন্তত তেওঁ এক বিশেষ পংক্তি আওৰাই কয় যে তেওঁৰ নীৰৱতাক কোনেও পৰাজয় বুলি ভাবিব নালাগে, তেওঁ এনে এখন নদী যিয়ে সময় আহিলে বানপানীৰ ৰূপ ল’ব পাৰে।
উল্লেখ্য যে, বৃহস্পতিবাৰে আম আদমী পাৰ্টীয়ে ৰাজ্যসভাৰ সচিবালয়লৈ এখন পত্ৰ প্ৰেৰণ কৰি ৰাঘৱ চাদ্দাক সদনত দলৰ উপ-দলপতি পদৰ পৰা অপসাৰণ কৰাৰ বাবে অনুৰোধ জনাইছিল। তেওঁৰ স্থানত পঞ্জাৱৰ আন এগৰাকী সাংসদ অশোক মিট্টলক উক্ত পদত নিযুক্তি দিয়াৰ প্ৰস্তাৱ আগবঢ়োৱা হৈছিল। সূত্ৰৰ খবৰ অনুসৰি, পত্ৰখনত আপ নেতৃত্বই অনুৰোধ কৰিছিল যাতে দলৰ আবণ্টিত সময়ৰ পৰা ৰাঘৱ চাদ্দাক সদনত ভাষণ দিবলৈ সময় নিৰ্ধাৰণ কৰা নহয়।
চাদ্দাই নিজৰ বক্তব্যত উল্লেখ কৰে যে তেওঁ সদায় সাধাৰণ মানুহৰ উপকাৰ হোৱা বিভিন্ন বিষয়, যেনে— বিমানবন্দৰৰ খাদ্যৰ অস্বাভাৱিক মূল্য, জ’মাট’ বা ব্লিঙ্কিটৰ দৰে প্ৰতিষ্ঠানৰ কৰ্মীৰ সমস্যা আৰু মধ্যবিত্ত শ্ৰেণীৰ কৰৰ বোজা আদিৰ দৰে প্ৰসংগ সংসদত উত্থাপন কৰি আহিছে। এই বিষয়সমূহে আম আদমী পাৰ্টীৰ কি ক্ষতি কৰিলে বুলিও তেওঁ প্ৰশ্ন কৰে। এসময়ত অৰবিন্দ কেজৰিৱালৰ আটাইতকৈ বিশ্বাসভাজন নেতা হিচাপে পৰিচিত চাদ্দাই তেওঁক কিয় নীৰৱ কৰিব বিচৰা হৈছে বুলি মুকলিকৈ প্ৰশ্ন উত্থাপন কৰে।
আনহাতে, ৰাঘৱ চাদ্দাৰ এই মন্তব্যৰ পিছতে আপৰ আন কেইবাগৰাকীও জ্যেষ্ঠ নেতাই তেওঁক তীব্ৰ সমালোচনাৰে প্ৰত্যুত্তৰ দিয়ে। আপৰ নেত্ৰী আতিশীয়ে চাদ্দাক উদ্দেশ্যি কয় যে বৰ্তমান দেশৰ সংবিধানৰ প্ৰতি ভাবুকি অহাৰ সময়ত তেওঁ সৰু-সুৰা বিষয়ক লৈ নিজৰ দায়িত্বৰ পৰা ফালৰি কাটিছে। নিৰ্বাচন আয়ুক্তৰ বিৰুদ্ধে বিৰোধীয়ে অনা অনাস্থা প্ৰস্তাৱতো চাদ্দাই কিয় স্বাক্ষৰ কৰিবলৈ ভয় খাইছে বুলি আতিশীয়ে প্ৰশ্ন কৰে। একেদৰে জ্যেষ্ঠ নেতা সৌৰভ ভৰদ্বাজে চাদ্দাক কটাক্ষ কৰি কয় যে তেওঁ ভয় খাইছে আৰু ৰাজনৈতিকভাৱে চৰকাৰক জবাবদিহি কৰিব পৰা বিষয়সমূহৰ পৰা আঁতৰি কেৱল ‘চিঙৰাৰ মূল্য’ক লৈ প্ৰশ্ন কৰাত ব্যস্ত হৈ আছে। এই সাম্প্ৰতিক ঘটনাক্ৰমে আম আদমী পাৰ্টীৰ ভিতৰচ’ৰাত চলি থকা তীব্ৰ সংঘাতক পোহৰলৈ আনিছে।
