লোকসভাৰ বিৰোধী দলৰ নেতা ৰাহুল গান্ধীয়ে মণিপুৰৰ প্ৰখ্যাত সংগীত শিল্পী চাংথাম বিক্ৰম সিঙৰ স্মৃতিচাৰণ অনুষ্ঠানত অংশগ্ৰহণ কৰি তেওঁৰ মৃত্যুত গভীৰ শোক প্ৰকাশ কৰে। বৃহস্পতিবাৰে নতুন দিল্লীৰ ড০ আম্বেদকাৰ আন্তঃৰাষ্ট্ৰীয় কেন্দ্ৰত আয়োজন কৰা স্মৃতিচাৰণ সভাত বিক্ৰমৰ পৰিয়াললৈ সমবেদনা জ্ঞাপন কৰি ন্যায়ৰ দাবী জনায়।
এই ঘটনাত ঈৰ্ষা, ঘৃণা আৰু অহংকাৰ প্ৰকাশ পোৱা বুলিও অভিযোগ কৰে ৰাহুলে। তেওঁ লগতে মন্তব্য কৰে যে ক্ষমতা থাকিলেই হিংসাত্মক আচৰণ কৰিব পাৰে বুলি যি মানসিকতা সেয়া বিপজ্জনক।
ৰাহুলে কয়, ‘এজন যুৱকক হত্যা কৰা হৈছে – এয়া এক ভয়ংকৰ ট্ৰেজেডী। একে সময়তে মণিপুৰৰ জনসাধাৰণৰ বাবেও ই এক ট্ৰেজেডী।’ তেওঁৰ ভাষাত যোৱা কেইবছৰমানৰ পৰা মণিপুৰৰ জনসাধাৰণে বাৰে বাৰে ভয়ংকৰ পৰিস্থিতিৰ সন্মুখীন হ’বলগীয়া হৈছে৷ সেই পৰিস্থিতিত এজন মহান প্ৰতিভাক হেৰুওৱাটো আৰু বেছি কষ্টদায়ক।
বিক্ৰমৰ কথা উল্লেখ কৰি ৰাহুলে কয় যে তেওঁৰ পুত্ৰই আৰু কেতিয়াও পিতৃক দেখা নাপাব, পিতৃ-মাতৃয়ে আৰু কেতিয়াও তেওঁলোকৰ সন্তানক ঘূৰাই নাপাব। এই ঘটনাত ‘হিংসা, ঘৃণা আৰু অহংকাৰ’ নিহিত আছিল বুলিও ৰাহুলে মন্তব্য কৰে।
ৰাহুলে কয় যে আজিকালি এনে এটা প্ৰৱণতাৰ সৃষ্টি হৈছে য’ত বিশ্বাস কৰা হয় যে যিসকল শক্তিশালী তেওঁলোকেহে হিংসাত্মক আচৰণ বা অহংকাৰ দেখুৱাব পাৰে। কিন্তু এনে পৰিস্থিতিৰ প্ৰতি কেতিয়াও খঙেৰে প্ৰত্যুত্তৰ দিয়া উচিত নহয়।
বিক্ৰমক প্ৰেম, স্নেহ আৰু প্ৰতিভাৰে ভৰা জীৱনৰ প্ৰতীক বুলি উল্লেখ কৰি ৰাহুলে কয় যে তেওঁক লৈ তেওঁলোক অতি গৌৰৱান্বিত। বিক্ৰমৰ পৰিয়ালৰ কাষত থিয় দিব বুলি আশ্বাস দি তেওঁ কয়, “আমি ন্যায় বিচাৰো। আমি ন্যায় পাম আৰু হিংসাৰ আগত ভয় বা নতিস্বীকাৰ নকৰো।”
কংগ্ৰেছে দাবী কৰিছে যে কেৱল ঘৰৰ সন্মুখত কোলাহল কমাবলৈ অনুৰোধ কৰাৰ বাবেই বিক্ৰমক নিৰ্মমভাৱে প্ৰহাৰ কৰি হত্যা কৰা হৈছিল। তেওঁৰ স্মৃতিত শ্ৰদ্ধাঞ্জলি জনাই ৰাহুলে পৰিয়ালৰ কাষত থিয় দিয়াৰ বাৰ্তাও আগবঢ়ায়।
মণিপুৰৰ সংগীত শিল্পী চাংথাম বিক্ৰম সিং (৫৪)ক দেওবাৰে নিশা দিল্লীত আক্ৰমণ কৰা হৈছিল। প্ৰহাৰত তেওঁ গুৰুতৰভাৱে আহত হয়। পিছত সোমবাৰে চিকিৎসালয়ত চিকিৎসাধীন হৈ থকা সংগীতজ্ঞজনৰ মৃত্যু হয়।
২০০৪ চনত দিল্লীলৈ গুচি আহিছিল বিক্ৰম। তেওঁ আগতে সংগীতৰ অনুশীলন কৰিছিল আৰু প্ৰশিক্ষণ দিছিল। তেওঁ আল্ট্ৰা ভাইৰিজ, ফিনিক্স আৰু ইষ্টাৰ্ণ ডাৰ্ক নামৰ বেণ্ডৰ সৈতে কাম কৰিছিল।
বিক্ৰমক প্ৰহাৰ কৰি হত্যা কৰাৰ ঘটনা পোহৰলৈ অহাৰ পিছতে দিল্লীৰ আইন-শৃংখলাৰ পৰিস্থিতিৰ অৱনতি ঘটাৰ অভিযোগ উত্থাপন কৰি বিজেপি চৰকাৰক আক্ৰমণ কৰে ৰাহুল গান্ধী-মল্লিকাৰ্জুন খৰ্গেকে ধৰি নেতাসকলে।
খাৰ্গেই অভিযোগ কৰে যে উত্তৰ-পূব ভাৰতৰ লোকৰ বিৰুদ্ধে বৈষম্য কৰা হৈছে। তেওঁ ছ’চিয়েল মিডিয়াত লিখিছে, ‘মোডী চৰকাৰৰ অযোগ্যতাৰ বাবে মণিপুৰৰ জনসাধাৰণে নিজৰ ৰাজ্য আৰু ৰাজ্যৰ বাহিৰতো-সকলোতে দুৰ্ভোগ ভূগিবলগীয়া হৈছে।’
